கடந்த வார இறுதியில் ஓஷாவாவில் உள்ள கோப்பி விற்பனை நிலையத்திற்கு வெளியே இடம்பெற்ற மோதலில் 23 வயது இளைஞர் கொல்லப்பட்ட சம்பவத்தில், பிராம்ப்டனைச் (Brampton) சேர்ந்த 16 வயது சிறுவன் மீது கொலைக் குற்றம் சுமத்தப்பட்டுள்ளது.

இந்தச் சம்பவம் கடந்த சனிக்கிழமை இரவு 8:10 மணியளவில் சிம்கோ ஸ்ட்ரீட் நோர்த் (Simcoe Street North) மற்றும் வின்செஸ்டர் ரோட் ஈஸ்ட் (Winchester Road East) பகுதிக்கு அருகில் இடம்பெற்றுள்ளது. ஆயுதம் ஏந்திய நபர் ஒருவர் அந்தப் பகுதியில் இருப்பதாகக் கிடைத்த தகவலையடுத்து விரைந்த பொலிஸார், அங்கு படுகாயங்களுடன் இருந்த 23 வயது இளைஞரைக் கண்டெடுத்தனர். அவர் சம்பவ இடத்திலேயே உயிரிழந்ததாக அறிவிக்கப்பட்டது.

உயிரிழந்தவரின் பெயர் விபரங்கள் இன்னும் வெளியிடப்படவில்லை. இது 2026 ஆம் ஆண்டில் டர்ஹாம் (Durham) பிராந்தியத்தில் பதிவான மூன்றாவது படுகொலையாகும்.

உடல் ரீதியான மோதலின் போது நடந்த கொலை: 2700 சிம்கோ ஸ்ட்ரீட் நோர்த்தில் உள்ள டிம் ஹார்டன்ஸ் உணவகத்திற்கு வெளியே இரண்டு குழுக்களுக்கு இடையே ஏற்பட்ட உடல் ரீதியான மோதலின் போதே இந்த இளைஞர் உயிரிழந்துள்ளார். தாக்குதலின் பின்னர் சந்தேக நபர் உள்ளிட்ட பல இளைஞர்கள் அங்கிருந்து தப்பியோடியுள்ளனர். எனினும், இது ஒரு தனிப்பட்ட சம்பவம் என்றும், பொதுமக்களின் பாதுகாப்பிற்கு தற்போதைக்கு அச்சுறுத்தல் இல்லை என்றும் பொலிஸார் தெரிவித்துள்ளனர்.

சிறுவன் சரணடைவு: ஹெலிகொப்டர் மற்றும் மோப்ப நாய்களின் உதவியுடன் தீவிர தேடுதல் வேட்டை நடத்தப்பட்ட போதிலும், வார இறுதியில் எவரும் கைது செய்யப்படவில்லை. இந்நிலையில், திங்கட்கிழமை அன்று பிராம்ப்டனைச் சேர்ந்த 16 வயது சிறுவன் ஓஷாவா பொலிஸ் நிலையத்தில் சரணடைந்துள்ளார்.

இளம் குற்றவாளிகள் நீதிச் சட்டத்தின் (Youth Criminal Justice Act) கீழ் அச்சிறுவனின் விபரங்களை வெளியிட முடியாது என்பதால் பெயர் மறைக்கப்பட்டுள்ளது. அவர் மீது இரண்டாம் நிலை கொலைக் குற்றம் (Second-degree murder) சுமத்தப்பட்டு, பிணை விசாரணைக்காக தடுத்து வைக்கப்பட்டுள்ளார்.

விசாரணை தொடர்கிறது: இந்தச் சம்பவம் தொடர்பாக விசாரணை தொடர்ந்து நடைபெற்று வருகிறது. மே 9 ஆம் திகதி இரவு 7:30 முதல் 9:00 மணி வரை அந்தப் பகுதியில் இருந்தவர்கள், தங்களது கையடக்கத் தொலைபேசி அல்லது வாகனங்களில் பதிவான காட்சிகளை (dashcam footage) வழங்கி விசாரணைக்கு உதவுமாறு பொலிஸார் கோரிக்கை விடுத்துள்ளனர்.