எட்மன்டன் (Edmonton) நகரின் கத்தோலிக்க உயர்நிலைப் பள்ளி ஒன்றின் முன்னாள் ஆசிரியர், கனடாவுக்குத் திரும்பிய பின்னர் கைது செய்யப்பட்டு, சிறுவர் ஆபாசப் படங்களுடன் தொடர்புடைய பல குற்றச்சாட்டுகளுக்கு முகம் கொடுத்துள்ளார்.
எட்மன்டனிலுள்ள ‘செயிண்ட் ஆஸ்கார் ரொமேரோ’ கத்தோலிக்க உயர்நிலைப் பள்ளியில் (St. Oscar Romero Catholic High School) முன்னர் ஆசிரியராகப் பணியாற்றிய ஜிம்மி புவெனா (Jimmy Buena), கடந்த 2026 ஏப்ரல் 15 அன்று எட்மன்டன் சர்வதேச விமான நிலையத்தில் வைத்து கைது செய்யப்பட்டார். ஃபேஸ்புக் (Facebook) ஊடாக ஆபாசப் பொருட்கள் விநியோகிக்கப்பட்டதாகக் கூறப்படும் குற்றச்சாட்டு குறித்து 2025 ஜூன் மாதம் பொலிஸார் விசாரணைகளைத் தொடங்கியிருந்தனர். எனினும், தம்மைக் கைது செய்வதற்கான பிடியாணை பிறப்பிக்கப்படுவதற்கு முன்னர், புவெனா கனடாவிலிருந்து பிலிப்பைன்ஸுக்குத் தப்பிச் சென்றிருந்ததாக அதிகாரிகள் தெரிவிக்கின்றனர்.
கனடாவுக்குத் திரும்பிய பின்னர் கைது செய்யப்பட்ட புவெனா, நீதிமன்ற நடவடிக்கைகள் நிலுவையில் உள்ள நிலையில் தற்போது காவலில் இருந்து விடுவிக்கப்பட்டுள்ளார். அவர் நாட்டிலிருந்து தப்பிச் சென்றமை தொடர்பாக தற்போதைக்கு மேலதிக குற்றச்சாட்டுகள் எதுவும் அறிவிக்கப்படவில்லை.
இந்த விவகாரத்தில் உள்ளூர் மாணவர்கள் எவரும் சம்பந்தப்பட்டதற்கான எந்தவொரு ஆதாரமும் புலனாய்வாளர்களுக்குக் கிடைக்கவில்லை என பள்ளி அதிகாரிகள் மாணவர்களின் குடும்பங்களுக்குத் தெரிவித்துள்ளனர்.
சிறுவர் ஆபாசப் படங்களை உருவாக்குதல், அவற்றை அணுகுதல் (Accessing), வைத்திருத்தல் மற்றும் பரப்புதல் ஆகிய குற்றச்சாட்டுகள் தொடர்பாக ஜிம்மி புவெனா 2026 ஜூன் 18 அன்று நீதிமன்றத்தில் ஆஜர்படுத்தப்படவுள்ளார். எனினும், இந்த குற்றச்சாட்டுகள் இன்னும் நீதிமன்றத்தில் நிரூபிக்கப்படவில்லை என்பது குறிப்பிடத்தக்கது.
