சென்னை:

சட்டப் பேரவையில் குரல் எழுப்புவதைத் தடுக்கவே எதிர்க்கட்சித் தலைவர் உதயநிதி ஸ்டாலின் மீது கைது நடவடிக்கை எடுக்கப்பட்டிருப்பதாக திமுக முன்னாள் அமைச்சர் செந்தில் பாலாஜி பகிரங்கமாகக் குற்றம்சாட்டியுள்ளார். தவெக எம்.எல்.ஏ-க்களிடம் பேரம் பேசியதாகத் தொடுக்கப்பட்ட வழக்கில், முன்னாள் அமைச்சர் செந்தில் பாலாஜி மற்றும் அசோக் குமார் ஆகியோர் சென்னை திருவல்லிக்கேணி காவல் நிலையத்தில் இன்றும் ஆஜராகினர். காவல் நிலையத்தில் கையெழுத்திட்டு விசாரணை முடிந்து வெளியே வந்த செந்தில் பாலாஜி, செய்தியாளர்களைச் சந்தித்துப் பேசினார். அப்போது அவர், காவிரியின் குறுக்கே மேகதாதுவில் அணை கட்டும் விவகாரம் தொடர்பாகத் தஞ்சாவூரில் உதயநிதி ஸ்டாலின் தலைமையில் நேற்று மாபெரும் ஆர்ப்பாட்டம் நடைபெற்றதை சுட்டிக்காட்டினார்.

மேலும் பேசிய அவர், “விவசாயிகளின் நலனைப் பாதுகாக்கும் வகையில் தவெக அரசு எந்த நடவடிக்கையும் எடுக்கவில்லை. தேர்தல் வாக்குறுதியில் ஆட்சி அமைந்த அடுத்த நிமிடமே விவசாயிகளுக்கான கடன்கள் தள்ளுபடி செய்யப்படும் என அறிவிக்கப்பட்டது. ஆனால், ஆட்சி அமைந்த பிறகு குறிப்பிட்ட சில விவசாயிகளுக்கு மட்டும் கடன் தள்ளுபடி செய்துள்ளனர். விவசாயக் கடனை முழுமையாகத் தள்ளுபடி செய்யக் கோரி விவசாயிகள் தொடர்ந்து போராட்டங்களில் ஈடுபட்டு வருகின்றனர். விவசாயிகளின் பிரச்சனைகள், மேகதாது அணை விவகாரம் உள்ளிட்டவற்றைச் சட்டப்பேரவையில் பேசுவோம் என உதயநிதி ஸ்டாலின் கூறியிருந்தார். சட்டப்பேரவை நாளை கூட இருக்கும் நிலையில், அவைக்கு வந்து உதயநிதி தொடர்ந்து கேள்வி எழுப்புவதைத் தடுக்கவே இந்தக் கைது நடவடிக்கை மேற்கொள்ளப்பட்டுள்ளது” என்று சாடினார்.

தொடர்ந்து பேசிய செந்தில் பாலாஜி, “தவெக அரசுக்கு எதிராகக் குரல் கொடுப்பவர்கள், அரசின் குறைகளைச் சுட்டிக்காட்டுபவர்கள், பத்திரிகையாளர்கள் உள்ளிட்டோர் மீது பொய் வழக்குப் பதிவு செய்வதையே இலக்காகக் கொண்டு இந்த அரசு செயல்பட்டு வருகிறது. தமிழக அரசியல் வரலாற்றில் இதுவரை இல்லாத ஒரு மோசமான சூழலை தவெக அரசு உருவாக்க முயற்சித்து வருகிறது; இது கடும் கண்டனத்துக்குரியது. இந்த அடக்குமுறைகளை உதயநிதி ஸ்டாலின் சட்டரீதியாகவும் நீதியின் மூலமாகவும் எதிர்கொண்டு வெற்றி பெறுவார்; தமிழக மக்களுடன் துணை நிற்கும் இயக்கம் திமுக என்பதை அவர் நிரூபித்துக் காட்டுவார்” என்று திட்டவட்டமாகத் தெரிவித்தார்.

#SenthilBalaji #UdhayanidhiStalin #TVKGovt #DMK #BmNews #TamilNews #BreakingNewsTN #TamilNaduPolitics #FarmersIssue #PoliticalUpdate #TamilNewsLive