எட்வர்ட் தீவின் (P.E.I.) சம்மர்சைட் (Summerside) பகுதியில் ஜூலை 28 அன்று இடம்பெற்ற இரண்டு வேறுபட்ட சம்பவங்களைத் தொடர்ந்து, பொது இடத்தில் நிர்வாணமாக இருந்தமை மற்றும் அத்துமீறி வீட்டிற்குள் நுழைந்தமை உட்பட பல குற்றச்சாட்டுகளை 35 வயதுடைய நபர் ஒருவர் எதிர்கொண்டுள்ளார்.
கிங் வீதியில் (King Street) வசிக்கும் ஒருவர், தனது வீட்டின் பின் பக்க தாழ்வாரத்தில் (back porch) நிர்வாண நிலையில் ஒரு நபர் இருப்பதைக்கண்டு 911 அவசர இலக்கத்திற்கு அழைப்பு விடுத்துள்ளார். மாலை 5 மணிக்குக்குப் பின்னர் கிடைத்த இந்த முறைப்பாட்டையடுத்து சம்மர்சைட் பொலிஸார் சம்பவ இடத்திற்கு விரைந்தனர்.
அந்நபர் அந்த வீட்டிலிருந்து ஒரு ஜோடி ஹெட்போன் (headphones) மற்றும் காலணிகளுடன் தப்பிச் சென்றுள்ளதாகக் கூறப்படுகிறது.
ஒரு மணி நேரத்திற்குள், புரோக்வில் வீதியில் (Brockville Street) ஜீப் வண்டி ஒன்று திருடப்பட்டதாக பொலிஸாருக்கு மற்றொரு முறைப்பாடு கிடைத்தது.
கிழக்கு பிரின்ஸ் (East Prince) கனடிய அரச குதிரைப்படைப் பொலிஸார் (RCMP), கிளெர்மொன்ட் வீதியில் (Clermont Road) அந்த ஜீப் வண்டி ஓட்டப்பட்டுச் செல்வதைக் கண்டறிந்தனர்.
“பொலிஸ் அதிகாரி வாகனத்தை நிறுத்தி, அந்த நேரத்தில் நிர்வாணமாக இருந்த சந்தேக நபரை கைது செய்து, சம்மர்சைட் பொலிஸாரிடம் ஒப்படைத்தார்” என்று பொலிஸ் படை வெளியிட்டுள்ள சமூக ஊடகப் பதிவில் தெரிவிக்கப்பட்டுள்ளது.
பொது இடத்தில் நிர்வாணமாக இருந்தமை மற்றும் அத்துமீறி நுழைந்தமை ஆகியவற்றுடன், மோட்டார் வாகனத் திருட்டு மற்றும் நன்னடத்தைப் பிணை விதிகளை மீறியமை ஆகிய குற்றச்சாட்டுகளையும் அந்நபர் எதிர்கொண்டுள்ளார்.
நிரந்தர முகவரி எதுவும் இல்லாத அந்நபர் விளக்கமறியலில் வைக்கப்பட்டுள்ளார். வெள்ளிக்கிழமை நீதிமன்றத்தில் ஆஜர்படுத்தப்பட்ட அவர், இக்குற்றச்சாட்டுகளுக்கு பதிலளிப்பதற்காக புதன்கிழமை மாகாண நீதிமன்றத்தில் ஆஜராகவுள்ளார்.
