சென்னை
ஆம்ஸ்ட்ராங் கொலை வழக்கில் சேர்த்து விடுவதாக மிரட்டித் தொழிலதிபரிடம் இருந்து 40 லட்சம் ரூபாய் பறித்ததாகக் கைது செய்யப்பட்ட காவல் ஆய்வாளர் புகாரி மற்றும் அவரது கூட்டாளி சீனிவாசன் ஆகிய இருவரையும் 3 நாட்கள் போலீஸ் காவலில் எடுத்துத் தீவிர விசாரணை நடத்தி வருகின்றனர்.
தொழிலதிபரிடம் ரூ.40 லட்சம் பறிப்பு:
சென்னை பழைய வண்ணாரப்பேட்டையைச் சேர்ந்த தொழிலதிபர் அகில் குமார் என்பவர், யானைகவுனி காவல் நிலையத்தில் பரபரப்பு புகார் ஒன்றை அளித்தார். அதில், ‘பகுஜன் சமாஜ் கட்சியின் மாநிலத் தலைவர் ஆம்ஸ்ட்ராங் கொலை வழக்கில் தனது பெயரைச் சேர்த்துவிடுவதாக மிரட்டி, காவல் ஆய்வாளர் புகாரி மற்றும் சீனிவாசன் ஆகியோர் தன்னிடம் இருந்து சிறுகச் சிறுக 40 லட்ச ரூபாய் வரை பறித்துவிட்டதாகக் குறிப்பிட்டிருந்தார். மேலும், சட்டவிரோதமாகப் போதைப்பொருள் வைத்திருப்பதாகப் பொய் வழக்குப்பதிவு செய்துவிடுவதாக மிரட்டிக் கூடுதலாக 5 லட்சம் ரூபாய் வரை பணம் பெற்றதாகவும் அந்தப் புகாரில் அதிர்ச்சித் தகவலைத் தெரிவித்திருந்தார்.
பணியிடை நீக்கம் மற்றும் அதிரடி கைது:
இந்தப் புகாரின் அடிப்படையில் யானைகவுனி போலீசார் வழக்கைப் பதிவு செய்து விசாரணையைத் தீவிரப்படுத்தினர். காவல்துறை உயர் அதிகாரிகள் நடத்திய விசாரணையில், புகாரில் உண்மைத்தன்மை இருப்பது உறுதி செய்யப்பட்டது. இதையடுத்து, ஆலந்தூர் காவல் நிலைய ஆய்வாளராகப் பணிபுரிந்து வந்த புகாரி உடனடியாகப் பணியிடை நீக்கம் செய்யப்பட்டு, துறை ரீதியான விசாரணை நடத்தப்பட்டது. விசாரணையில் காவல் ஆய்வாளர் புகாரியும், பிரண்ட்ஸ் ஆப் போலீசில் பணிபுரிந்து வந்த சீனிவாசனும் இந்த மாபெரும் மோசடியில் ஈடுபட்டது சந்தேகத்திற்கு இடமின்றித் தெரியவந்தது. இதையடுத்து இருவரையும் தனிப்படை போலீசார் அதிரடியாகக் கைது செய்து சிறையில் அடைத்தனர்.
3 நாள் போலீஸ் காவலில் துருவித் துருவி விசாரணை:
இந்த வழக்கில் கூடுதல் ஆதாரங்களைத் திரட்ட, இருவரையும் போலீஸ் காவலில் எடுத்து விசாரிக்க யானைகவுனி போலீசார் நீதிமன்றத்தில் மனு தாக்கல் செய்தனர். மனுவை விசாரித்த நீதிமன்றம், காவல் ஆய்வாளர் புகாரி மற்றும் சீனிவாசன் ஆகிய இருவரையும் 3 நாட்கள் காவலில் எடுத்து விசாரிக்க அதிரடி அனுமதி வழங்கியது. இதனைத் தொடர்ந்து அவர்களைக் காவலில் எடுத்துள்ள போலீசார், பல்வேறு கோணங்களில் தீவிர விசாரணை நடத்தி வருகின்றனர்.
முக்கியத் தகவல்கள் சிக்குமா?:
கைது செய்யப்பட்டுச் சிறையில் அடைக்கப்பட்டுள்ள காவல் ஆய்வாளர் புகாரி, ஏற்கனவே பல்வேறு தனிப்படைகளில் பணியாற்றியவர். எனவே, அந்த காலகட்டங்களில் இதேபோன்று வேறு தொழிலதிபர்களையோ அல்லது குற்றம் புரிந்தவர்களையோ மிரட்டிப் பணம் பறித்தாரா என்பது குறித்துத் தீவிரமாக விசாரிக்கப்பட்டு வருகிறது. இருவரிடம் இருந்தும் பறிமுதல் செய்யப்பட்ட செல்போன்களில் உள்ள வாட்ஸ்அப் மற்றும் தொலைபேசி உரையாடல்களை போலீசார் ஆய்வு செய்து வருகின்றனர்.
குற்றச்சாட்டுகளில் சிக்கும் நபர்களிடம் பணம் வாங்கிக் கொண்டு அவர்களை வழக்கில் இருந்து விடுவித்ததாகவும் புகார்கள் எழுந்துள்ளதால், அவர்கள் பெற்ற பணத்தின் மூலம் வாங்கப்பட்ட சொத்துகள் மற்றும் பணப்பரிமாற்றங்கள் குறித்தும் தனிப்படை போலீசார் தீவிரமாக ஆய்வு செய்து வருகின்றனர். போலீஸ் காவலில் நடைபெற்று வரும் இந்த அதிரடி விசாரணையின் முடிவில் இன்னும் பல திடுக்கிடும் முக்கியத் தகவல்கள் வெளியாகலாம் என எதிர்பார்க்கப்படுகிறது.
#ArmstrongMurderCase #InspectorBuhari #ChennaiPolice #ExtortionCase #TamilNaduNews #Chennai #ViralNewsTN #TrendingTN #LatestNewsTN #TNNewsUpdates
