அமெரிக்காவில் கண்டெடுக்கப்பட்ட அபூர்வமான டைனோசர் எலும்புக்கூடு ஒன்று, கோடிக்கணக்கான ரூபாய்க்கு ஏலம் போகும் என எதிர்பார்க்கப்படுகிறது. கேரி கஸ் லிக்கிங் (Cary Gus Licking) என்பவரைக் கௌரவிக்கும் விதமாக, இந்த டைனோசருக்கு ‘கஸ் டி-ரெக்ஸ்’ (Gus T-Rex) எனப் பெயரிடப்பட்டுள்ளது.
அமெரிக்காவின் தெற்கு டகோட்டாவில் உள்ள ஹார்டிங் கவுண்டியில், கேரி கஸ் லிக்கிங்கிற்குச் சொந்தமான நிலம் அமைந்துள்ளது. இப்பகுதியில் உள்ள ‘ஹெல் க்ரீக்’ (Hell Creek) பாறை அடுக்குகளின் வரலாறு மீது அவர் மிகுந்த ஆர்வம் கொண்டிருந்தார். பல ஆண்டுகளாகத் தனது பண்ணையில் பற்களையும் சிறிய எலும்புத் துண்டுகளையும் கண்டெடுத்த அவர், இப்பகுதியில் புதைபடிவங்கள் இருப்பதற்கான வலுவான சாத்தியக்கூறுகள் இருப்பதை உணர்ந்தார்.
இதனைத் தொடர்ந்து, தொல்லியல் வல்லுநர் ஹெய்ட்கேம்ப் (Heitkamp) மற்றும் அவரது குழுவினருடன் இணைந்து, 2021-ம் ஆண்டில் புதைபடிவங்களைத் தேடும் பணியை கேரி தொடங்கினார். சுமார் 6,500 ஏக்கர் பரப்பளவு கொண்ட தனது நிலத்தில், எந்தப் பகுதியில் அகழ்வாராய்ச்சி செய்ய வேண்டும் என்பதை அவரே சுட்டிக்காட்டினார். எனினும், இப்பணி தொடங்கிய ஓராண்டு காலத்திலேயே கேரி கஸ் காலமானார்.
கேரி சுட்டிக்காட்டிய இடம் மிகச் சரியாக அமைந்தது. அங்கு 2023-ம் ஆண்டு சுமார் 38 அடி (11.6 மீட்டர்) நீளமும், 12.5 அடி (3.8 மீட்டர்) உயரமும் கொண்ட பிரமாண்டமான டைனோசர் எலும்புக்கூடு கண்டெடுக்கப்பட்டது. இது, இதுவரை கண்டெடுக்கப்பட்ட டைனோசர் புதைபடிவங்களில் மிக முழுமையான மற்றும் மிகப்பெரிய எலும்புக்கூடுகளில் ஒன்றாகக் கருதப்படுகிறது.
இந்த ஆண்டு (2026) எலும்புகள் அனைத்தும் முறையாகச் சுத்தம் செய்யப்பட்டு, முழுமையான டி-ரெக்ஸ் எலும்புக்கூடு காட்சிப்படுத்தத் தயாரானது. தனது வாழ்நாளில் இந்த அற்புதமான கண்டுபிடிப்பைக் காண முடியாத கேரியைக் கௌரவிக்கும் விதமாக, இதற்கு ‘கஸ் டி-ரெக்ஸ்’ என்று பெயரிடப்பட்டது.
இந்த எலும்புக்கூடு, வருகின்ற ஜூலை 14-ம் திகதி மாலை 7.30 மணியளவில் நியூயார்க்கில் உள்ள ‘சோத்பீஸ்’ (Sotheby’s) நிறுவனத்தின் மூலம் ஏலம் விடப்படவுள்ளது. இந்த ஏலத்தின் ஆரம்ப விலை 19 லட்சம் அமெரிக்க டாலர்களாக நிர்ணயிக்கப்பட்டுள்ளது. இது மிகவும் அரிதான மற்றும் பழமையான எலும்புக்கூடு என்பதால், 20 லட்சம் முதல் 30 லட்சம் அமெரிக்க டாலர்கள் வரை ஏலம் போகலாம் என எதிர்பார்க்கப்படுகிறது. இதன் தற்போதைய இந்திய மதிப்பு சுமார் ரூ. 250 கோடியாகும்.
