சென்னை:

அதிமுகவின் 55ஆவது ஆண்டு தொடக்க விழாவையொட்டி, சென்னையில் உள்ள அதிமுக தலைமை அலுவலகத்தில் பொதுச் செயலாளர் எடப்பாடி பழனிசாமி எம்.ஜி.ஆர், ஜெயலலிதா திருவுருவச் சிலைகளுக்கு மாலை அணிவித்து மரியாதை செலுத்தினார். கட்சி நிர்வாகிகளும் தொண்டர்களும் ஆண்டு விழாவை உற்சாகமாகக் கொண்டாடினர்.

திராவிடன் பீனிக்ஸ் வெளியீடு:

கட்சிக் கொடியை ஏற்றி வைத்த எடப்பாடி பழனிசாமி, திராவிடன் பீனிக்ஸ் என்ற புத்தகத்தை வெளியிட்டார். இந்தப் புத்தகத்தை வெளியிடுவது தனக்குப் பெருமை அளிக்கிறது. இன்றைய இளைய தலைமுறையினருக்கு அதிமுக வரலாற்றைக் கொண்டுசேர்ப்பதே இதன் நோக்கம். இது ஒரு தொடக்கம் மட்டுமே, இறுதி அல்ல. புத்தகத்தில் எம்.ஜி.ஆர் தொடர்பான பொருத்தமான பகுதிகள் இடம்பெற்றுள்ளன என்று அவர் கூறினார். எம்.ஜி.ஆர் 1972ஆம் ஆண்டு அதிமுகவைத் தொடங்கினார். 54 ஆண்டுகள் நிறைவடைந்து 55ஆவது ஆண்டு கொண்டாடப்படுகிறது. பல சவால்களையும் துயரங்களையும் சந்தித்த ஜெயலலிதா, அவற்றைச் சாதனைகளாக மாற்றி கட்சியைக் கட்டிக் காத்தார். தமிழ்நாட்டில் 31 ஆண்டுகள் ஆட்சி செய்த கட்சி அதிமுக. இந்த நாள் அதிமுக வரலாற்றில் முக்கியமான நாள் என்று அவர் நினைவுகூர்ந்தார்.

எந்த கொம்பனாலும் அழிக்க முடியாது:

அதிமுகவை எந்த கொம்பனாலும் அழிக்கவோ, அசைக்கவோ முடியாது. மீண்டும் அதிமுக ஆட்சியை அமைக்க அனைவரும் உறுதியேற்போம் என்று எடப்பாடி பழனிசாமி சூளுரைத்தார்.

வேலுமணிக்கு அக்ரி பதிலடி:

பின்னர் செய்தியாளர்களைச் சந்தித்த அதிமுக கொறடா அக்ரி கிருஷ்ணமூர்த்தி, ஓ.பன்னீர்செல்வத்தை மீண்டும் அதிமுகவில் சேர்க்க வேண்டும் என்ற எஸ்.பி.வேலுமணி கூறியிருப்பது வேடிக்கையாக இருக்கிறது என்றார். ஓ.பன்னீர்செல்வம் அதிமுகவை விட்டு வெளியேறி, உதயசூரியன் சின்னத்தில் போட்டியிட்டு, தற்போது திமுக சட்டமன்ற உறுப்பினராக இருக்கிறார். இதே போக்கில் பார்த்தால், முத்துசாமி, சேகர்பாபு, ரகுபதி ஆகியோரையும் அதிமுகவில் சேர்க்கச் சொல்வார்கள் போலத் தெரிகிறது என்று அவர் கிண்டலாகக் குறிப்பிட்டார். அமமுக பொதுச் செயலாளர் டிடிவி தினகரனும் எடப்பாடி பழனிசாமியும் கூட்டணியில் ஒற்றுமையாகச் செயல்படுகின்றனர். எடப்பாடி பழனிசாமியின் உத்தரவை மீறி தவெகவுக்கு வாக்களித்தவர்களால் எம்.ஜி.ஆர், ஜெயலலிதாவின் ஆட்சியைக் கொண்டுவர முடியுமா என்று அவர் கேள்வி எழுப்பினார். அதிமுகவில் அனைத்து முடிவுகளையும் எடுக்கும் அதிகாரம் பொதுச் செயலாளருக்கு மட்டுமே உள்ளது. அதிமுகவைப் பலவீனப்படுத்தும் நோக்கிலும், தவெக அமைச்சரவையில் பதவியேற்க முடியாத காரணத்தாலும் சிலர் பொய்யான கருத்துகளைப் பரப்பி வருகின்றனர் என்றும் அவர் குற்றம் சாட்டினார்.

#EPS #AIADMK #AIADMK55 #EdappadiPalaniswami #TNPolitics #BmNews #TamilNews #BreakingNews #LatestNews #TamilNewsLive