கனடாவின் ஸ்காபரோ (Scarborough) பகுதியில் உள்ள ஒரு பிரபல வர்த்தக வளாகத்திற்குள் 8 வயது சிறுமியொருவர் பாலியல் வன்புணர்வுக்கு (Sexual assault) உட்படுத்தப்பட்ட அதிர்ச்சிச் சம்பவம் குறித்து, சந்தேகநபரைத் தேடி ரொறன்ரோ பொலிஸார் தீவிர தேடுதல் வேட்டையை ஆரம்பித்துள்ளனர்.
பொலிஸ் புலனாய்வுப் பிரிவினரின் விபரங்களின்படி, கடந்த மே 12 ஆம் திகதி மாலை 4 மணியளவிற்குச் சற்று முன்னர், ஃபின்ச் அவென்யூ கிழக்கு (Finch Avenue East) மற்றும் மெக்கோவன் வீதி (McCowan Road) சந்திப்பில் அமைந்துள்ள ‘வூட்ஸைட் ஸ்குவாஹர்’ (Woodside Square) வர்த்தக வளாகத்திற்குள் (Mall) இந்த விபரீத சம்பவம் இடம்பெற்றுள்ளது.
அங்குள்ள ஒரு வணிகக் கடைக்குள் நின்றிருந்த சிறுமியை நெருங்கிய சந்தேகநபர், அவர் பின்னால் தொடர்ந்து சென்று கண்காணித்துள்ளதுடன், பின்னர் அச்சிறுமியைக் பலவந்தமாகப் பிடித்து இழுத்து இப் பாலியல் துஷ்பிரயோகத்தை மேற்கொண்டுள்ளார். இதனால் அதிர்ச்சியடைந்த அச்சிறுமி, அருகில் இருந்த தனது குடும்பத்தினருக்கு உடனடியாக விபரத்தைக் கூறியுள்ளார். அதனைத் தொடர்ந்து குடும்பத்தினர் அக் குறிப்பிட்ட நபரை மடக்கிப் பிடித்துக் கேள்வி எழுப்பியதை அடுத்து, அவர் சம்பவ இடத்திலிருந்து அவசர அவசரமாகத் தப்பியோடியுள்ளார்.
இக் கொடூரச் செயலில் ஈடுபட்ட சந்தேகநபர், 20 முதல் 30 வயதிற்கு இடைப்பட்ட, கண்பார்வைக் கண்ணாடி அணிந்த ஒரு ஆண் எனப் பொலிஸாரால் விவரிக்கப்பட்டுள்ளது. அவர் இறுதியாகக் காணப்படும் போது, வெள்ளை நிற சுவொஷ் (Swoosh) இலச்சினையைக் கொண்ட பச்சை நிற ‘நைக்கி’ (Nike) தொப்பியைப் பின்னோக்கித் திருப்பி அணிந்திருந்ததுடன், நீண்ட கைகளைக் கொண்ட பச்சை நிற சட்டை மற்றும் இடது காலில் வெள்ளை நிற எழுத்துக்கள் பதிக்கப்பட்ட கறுப்பு நிற டிராக் பேண்ட் (Track pants) ஆகியவற்றை அணிந்திருந்தார் என அடையாளப்படுத்தப்பட்டுள்ளார்.
இவ் விபரீத சம்பவம் குறித்து ஏதேனும் விபரங்கள் தெரிந்தவர்களோ, அல்லது சம்பவ இடத்திலிருந்த சாட்சிகளோ அல்லது சந்தேகநபர் குறித்த தகவல்களைக் கொண்டிருப்பவர்களோ உடனடியாகத் தங்களைத் தொடர்பு கொள்ளுமாறு ரொறன்ரோ பொலிஸார் பொதுமக்களிடம் அவசரமாகக் கோரிக்கை விடுத்துள்ளனர்.
