கொழும்பு கோட்டை நீதவான் நீதிமன்றத்திற்கு வெளியே முன்னாள் ஜனாதிபதி ரணில் விக்கிரமசிங்கவின் பாதுகாப்புப் பிரிவைச் சேர்ந்த அதிகாரி ஒருவருக்கும், தொலைக்காட்சி கேமராமேன் ஒருவருக்கும் இடையே இடம்பெற்ற சம்பவம் குறித்து உடனடியாக நியாயமான மற்றும் நடுநிலையான விசாரணையை நடத்துமாறு இலங்கை உழைக்கும் பத்திரிகையாளர் சங்கம் (SLWJA) கோரிக்கை விடுத்துள்ளது.
அரசு நிதியை தவறாகப் பயன்படுத்தியதாகக் கூறப்படும் வழக்கு விசாரணையை அடுத்து, செப்டம்பர் 30 அன்று விக்கிரமசிங்க நீதிமன்றத்தை விட்டு வெளியேறியபோதே இந்தச் சம்பவம் இடம்பெற்றுள்ளது.
நீதிமன்ற நுழைவாயிலுக்கு அருகில் இடம்பெற்ற இந்தச் சம்பவத்தின் போது, கேமராவால் தலையில் தாக்கப்பட்டதாகக் கூறப்படும் பாதுகாப்பு அதிகாரி, கொழும்பு தேசிய வைத்தியசாலையில் அனுமதிக்கப்பட்டுள்ளதாக SLWJA தெரிவித்துள்ளது.
பொதுமக்களுக்குத் தகவல்களைத் தெரிவிக்கும் ஊடகவியலாளர்களின் உரிமையும், கடமையைச் செய்யும் பாதுகாப்பு அதிகாரிகளின் பாதுகாப்பும் உறுதிசெய்யப்பட வேண்டும் என அச்சங்கம் குறிப்பிட்டுள்ளது.
பாதுகாப்பு அதிகாரியின் கடமைகளுக்குத் இடையூறு விளைவிக்கப்பட்டதா அல்லது ஊடகவியலாளரின் தொழில்முறை கடமைகளைச் செய்வதற்கும் ஊடக சுதந்திரத்தைப் பயன்படுத்துவதற்கும் தடை ஏற்படுத்தப்பட்டதா என்பதைத் தீர்மானிக்க விரைவான, நியாயமான மற்றும் நடுநிலையான விசாரணையை நடத்துமாறு இலங்கை பொலிஸாரிடம் அச்சங்கம் கேட்டுக்கொண்டுள்ளது.
மேலும், இந்தச் சம்பவமானது ஊடகவியலாளர்கள் மற்றும் பாதுகாப்புப் பணியாளர்கள் இருசாராரின் பாதுகாப்பு தொடர்பான பரந்த கவலைகளை வெளிப்படுத்தியுள்ளதாக சுட்டிக்காட்டியுள்ள SLWJA, அதிகாரிகள் இவ்விஷயத்தில் தீவிர கவனம் செலுத்துமாறு வலியுறுத்தியுள்ளது.
இலங்கை உழைக்கும் பத்திரிகையாளர் சங்கத்தின் தலைவர் ரங்க பண்டாரநாயக்க மற்றும் பொதுச்செயலாளர் மிதுன் ஜயவர்தன ஆகியோரினால் இந்த அறிக்கை வெளியிடப்பட்டுள்ளது.
