நீண்டகாலமாகத் தாமதிக்கப்பட்டு வரும் மாகாண சபைத் தேர்தலை (Provincial Council elections) மேலும் தாமதமின்றி நடத்துமாறு ஆறு தமிழ் பேசும் அரசியல் கட்சிகள் கூட்டாக அரசாங்கத்திற்கு அழைப்பு விடுத்துள்ளன. அத்துடன், பொதுவான பிரச்சினைகளுக்குத் தீர்வுகாண்பதற்கான கூட்டு முயற்சியையும் அவை அறிவித்துள்ளன.
அகில இலங்கை மக்கள் காங்கிரஸ் (ACMC), இலங்கைத் தொழிலாளர் காங்கிரஸ் (CWC), ஜனநாயக தமிழ்த் தேசியக் கூட்டணி (DTNA), இலங்கைத் தமிழ் அரசுக் கட்சி (ITAK), ஸ்ரீலங்கா முஸ்லிம் காங்கிரஸ் (SLMC) மற்றும் தமிழ் முற்போக்குக் கூட்டணி (TPA) ஆகியவற்றின் பிரதிநிதிகள் இன்று (13) கொழும்பில் நடைபெற்ற ஊடகவியலாளர் சந்திப்பொன்றில் இந்த உடன்பாட்டை அறிவித்தனர்.
முன்னாள் நாடாளுமன்ற உறுப்பினர் எம். ஏ. சுமந்திரன் இங்கு கருத்துத் தெரிவிக்கையில், அரசாங்கம் பதவியேற்று ஓராண்டிற்குள் மாகாண சபைத் தேர்தலை நடத்துவதாக உறுதியளித்திருந்த போதிலும், இதுவரை அதில் குறிப்பிடத்தக்க முன்னேற்றம் எதுவும் ஏற்படவில்லை என்று கூறினார்.
ஆட்சியில் பிராந்திய பிரதிநிதித்துவத்தை உறுதி செய்வதற்கும், தேர்தல் செயல்முறைகளை முன்னெடுத்துச் செல்வதற்கும் அரசாங்கத்திடம் கட்சிகள் கூட்டாக கோரிக்கை விடுக்கவுள்ளதாக அவர் தெரிவித்தார்.
இந்தக் கட்சிகள் நான்கு முக்கிய விடயங்களில் ஒருமித்த கருத்தை எட்டியுள்ளதாக அவர் கூறினார்:
-
புதிய அரசியலமைப்பை உருவாக்குதல்.
-
மாகாண சபைத் தேர்தலை நடத்துதல்.
-
அனைத்து சமூகங்களையும் பாதிக்கும் காணி (நிலம்) சார்ந்த பிரச்சினைகளுக்குத் தீர்வுகாண்பதல்.
-
சிறுபான்மையினர் சார்ந்த கவலைகளுக்கு கலந்துரையாடல்கள் மூலம் தீர்வு காணுதல்.
இலங்கையில் நல்லிணக்கம், ஜனநாயக ஆட்சி மற்றும் அனைத்து சமூகங்களின் உரிமைகளைப் பாதுகாப்பதை ஊக்குவிப்பதற்காக, இந்தப் பொதுவான தளத்தின் ஊடாகத் தொடர்ந்து கலந்துரையாடல்களை முன்னெடுப்பதற்கான தங்களின் அர்ப்பணிப்பை இக்கட்சிகள் மீண்டும் உறுதிப்படுத்தியுள்ளதாக முன்னாள் நாடாளுமன்ற உறுப்பினர் சுமந்திரன் மேலும் தெரிவித்தார்.
