பங்களாதேஷிற்கு எதிரான இரண்டாவது டி20 போட்டியில் இலங்கை மகளிர் அணி 21 ஓட்டங்களால் வெற்றி பெற்றுள்ளது.
இதன் மூலம் மூன்று போட்டிகள் கொண்ட தொடரில், இன்னும் ஒரு போட்டி மீதமிருக்க, இலங்கை அணி 2-0 என்ற கணக்கில் முன்னிலை பெற்று தொடரைத் தன்வசப்படுத்தியுள்ளது.
இன்று (30) நடைபெற்ற இந்தப் போட்டியில் முதலில் துடுப்பெடுத்தாடிய இலங்கை அணி, நிர்ணயிக்கப்பட்ட 20 ஓவர்களில் 4 விக்கெட் இழப்பிற்கு 154 ஓட்டங்களைக் குவித்தது.
இலங்கை அணி சார்பில் ஹர்ஷிதா சமரவிக்கிரம 49 ஓட்டங்களையும், சாமரி அத்தபத்து 42 ஓட்டங்களையும் பெற்றுத் துடுப்பாட்டத்தில் பிரகாசித்தனர்.
155 ஓட்டங்கள் என்ற இலக்கை நோக்கித் துடுப்பெடுத்தாடிய பங்களாதேஷ் அணியால், 20 ஓவர்கள் முடிவில் 5 விக்கெட் இழப்பிற்கு 133 ஓட்டங்களை மாத்திரமே பெற முடிந்தது.
இலங்கை அணி சார்பில் சிறப்பான பந்துவீச்சை வெளிப்படுத்திய கவிஷா தில்ஹாரி, 15 ஓட்டங்களை மாத்திரம் வழங்கி 2 விக்கெட்டுகளைக் கைப்பற்றினார்.
இந்தப் போட்டியில் பங்களாதேஷ் அணியின் விக்கெட்டுகள் அதிகளவில் ரன் அவுட் முறையில் வீழ்த்தப்பட்டன.
இந்த டி20 தொடருக்கு முன்னதாக இரு அணிகளுக்கும் இடையே நடைபெற்ற ஒருநாள் தொடரையும் இலங்கை அணி 2-1 என்ற கணக்கில் கைப்பற்றியிருந்தமை குறிப்பிடத்தக்கது.
