பெலவத்தை அலுவலகத்தினால் நாட்டுக்கும் குறிப்பாக புத்த சாசனத்துக்கும் பாரிய அநீதி இழைக்கப்படுவதாகவும், கலகொடஅத்தே ஞானசார தேரருக்கு ஜனாதிபதி பொதுமன்னிப்பு வழங்குமாறு கோரி வெள்ளிக்கிழமை (09) தேவேந்திர முனையில் இருந்து கையெழுத்து சேகரிக்கும் நடவடிக்கை ஆரம்பிக்கப்படவுள்ளதாகவும் தித்தகல்லே ஆனந்தசிறி தேரர் தெரிவித்துள்ளார்.

கொழும்பில் புதன்கிழமை (7) நடைபெற்ற ஊடகவியலாளர் சந்திப்பில் கலந்து கொண்டு கருத்து தெரிவிக்கும் போதே அவர் மேற்கண்டவாறு குறிப்பிட்டார்.

அவர் அங்கு மேலும் தெரிவிக்கையில்,

ரில்வின் சில்வா உள்ளிட்ட பெலவத்தை அரசியல் தரப்பினர் தொடர்பில் நான் கேள்வி எழுப்புகின்றேன். பெலவத்தை அலுவலகத்தினால் நாட்டுக்கும் குறிப்பாக சம்புத்த சாசனத்துக்கும் பாரிய அநீதி இழைக்கப்படுகின்றது. நாட்டை அபிவிருத்தி செய்யாமல் துவேஷத்தை விதைத்து, பழிவாங்கி, மக்களை அநாகரிகமான நிலைக்கு கொண்டு செல்லும் அதர்மமான ஆட்சிக்கு எதிராகவே நான் குரல் எழுப்புகின்றேன்.

கலகொடஅத்தே ஞானசார தேரருக்கு தண்டனை வழங்கப்பட்ட விடயத்தை நாம் ஏற்றுக்கொள்கின்றோம். நீதிமன்றத்துக்கு நாம் நூறு வீதம் மதிப்பளிக்கின்றோம். ஆனால், அரசியலமைப்பின் 34ஆவது உறுப்புரையின் கீழ் ஜனாதிபதிக்கு மன்னிப்பு வழங்கும் அதிகாரம் உள்ளது. அந்த அதிகாரத்தைப் பயன்படுத்தி ஞானசார தேரருக்கு பொதுமன்னிப்பு வழங்குமாறு ஜனாதிபதி அநுரகுமார திசாநாயக்கவிடம் கேட்டுக்கொள்கின்றேன்.

எதிர்வரும் 9ஆம் திகதி காலை 7 மணிக்கு தேவேந்திர முனையில் பூஜை இடம்பெறும். பின்னர் காலை 8 மணியளவில் மாத்தறை நகரம், காலி, ஹபராதுவ, வெலிகம உள்ளிட்ட பகுதிகளில் எமது குழுக்கள் செயற்படும். நாள் முழுவதும் அன்பு, கடமை, நன்றியுணர்வின் அடிப்படையில் மக்களிடம் கையெழுத்துக்களைப் பெற்று, ஞானசார தேரருக்கு பொதுமன்னிப்பு வழங்குமாறு கோரிக்கை விடுப்போம்.

பிக்குகள், பிக்குணிகள், உபாசகர்கள், உபாசிகைகள் என நான்கு தரப்பினரும் இந்த நடவடிக்கையில் இணைந்துகொள்ள வேண்டும். ஞானசார தேரருக்கு மன்னிப்பு வழங்குங்கள் என்று கூறுவதற்குக்கூட சிலர் அஞ்சுகின்றனர். ஊடக அடக்குமுறைக்கு அவர்கள் பயந்துள்ளனர். ஆனால் மக்கள் அஞ்சக்கூடாது.

தேசிய பிக்கு முன்னணியைச் சேர்ந்த தேரர்கள் ஞானசார தேரரின் காவி உடை அகற்றப்பட்டமை தொடர்பில் தமது நிலைப்பாட்டை தெரிவிக்க வேண்டும்.

முன்னாள் ஜனாதிபதி மைத்திரிபால சிறிசேன வழங்கிய மன்னிப்பு பின்னர் நீதிமன்றத்தினால் இரத்துச் செய்யப்பட்டது. 1994ஆம் ஆண்டு சந்திரிகா பண்டாரநாயக்க குமாரதுங்க வழங்கிய மன்னிப்புகளையும், 1977ஆம் ஆண்டு ஜே.ஆர். ஜயவர்தன வழங்கிய மன்னிப்புகளையும் நினைவுகூர்ந்து, அதேபோன்று எமது ஞானசார தேரருக்கும் மன்னிப்பு வழங்குமாறு ஜனாதிபதியிடம் கேட்டுக்கொள்கின்றேன்.

தர்மத்துக்காகவும் அதர்மத்துக்கு எதிராகவும் முன்னெடுக்கப்படும் இந்தப் போராட்டத்தை கைவிடமாட்டேன். இந்த அரக்கர்களை விரட்டும் வரை எனது போராட்டம் தொடரும் என்றார்.