இந்துக்களின் முக்கிய பண்டிகைகளில் ஒன்றான நவராத்திரி விரதம் இன்று (11) தொடங்குகிறது.
நவராத்திரியின் முதல் மூன்று நாட்களும் அம்பிகையை துர்க்கையாக, பராசக்தியாக மற்றும் காளியாக உருவகப்படுத்தி வழிபடுவது ஐதீகமாகும்.
நவராத்திரியின் முதல் நாளான இன்று காலையில் எளிய முறையில் ஏதாவது ஒரு பழம் மற்றும் கற்கண்டு ஆகியவற்றைப் படைத்து வழிபாட்டைத் தொடங்கலாம்.
மாலையில் நைவேத்தியம் படைத்து வழிபட வேண்டும். முதல் நாள் என்பதால் வெண்பொங்கல், சர்க்கரை பொங்கல் அல்லது சுண்டல் ஆகியவற்றைச் செய்து படைக்கலாம்.
குறிப்பிட்ட மலர்கள் அல்லது நைவேத்தியங்கள் தான் கிடைக்க வேண்டும் என்ற கட்டாயம் கிடையாது; தமக்கு இயன்றவற்றைக் கொண்டு பக்தி சிரத்தையுடன் வழிபடலாம்.
காலையில் பழங்கள் படைத்து அம்பிகைக்குரிய ஸ்தோத்திரங்கள் அல்லது பாடல்களைப் பாடி வழிபட வேண்டும்.
மாலையில் குங்குமம் மற்றும் மலர்களால் அர்ச்சனை செய்து, அபிராமி அந்தாதி, லலிதா சகஸ்ரநாமம், துர்காஷ்டகம், காமாட்சி அஷ்டகம் அல்லது 108 அம்பாள் போற்றி மந்திரங்களைச் சொல்லி மனதாரப் பிரார்த்திக்கலாம்.
இறுதியில் தீப தூப ஆராதனை காட்டி பூஜையை நிறைவு செய்து, வீட்டிற்கு வருகை தருபவர்களுக்குப் பிரசாதம் மற்றும் தாம்பூலம் வழங்கி மகிழலாம்.
முதல் மூன்று நாட்கள் துர்கா தேவி (பராசக்தி, காளி) வடிவிலான அம்பிகையை வீரியம், தைரியம் மற்றும் தீமைகளை அழிக்கும் சக்தியாகவும் வழிபடுவது வழக்கம்.
அடுத்த மூன்று நாட்கள் மகாலட்சுமி தேவி வடிவில் செல்வம், வளம் மற்றும் அனைத்து வகையான ஐசுவரியங்களையும் வழங்கும் தெய்வமாக அம்பிகையை வழிபட வேண்டும்.
கடைசி மூன்று நாட்கள் சரஸ்வதி தேவி வடிவில் கல்வி, ஞானம், கலை மற்றும் அறிவுச் செல்வத்தை அருளும் தெய்வமாக அம்பிகையைச் சிறப்புடன் வழிபட வேண்டும்.
குறிப்பாக, நவராத்திரியின் கடைசி நாளான விஜயதசமி நாளில் கலை, கல்வி மற்றும் தொழிலைத் தொடங்கும் விசேட வழிபாடுகள் மேற்கொள்ளப்படுவது குறிப்பிடத்தக்கது.
நவராத்திரி காலத்தில் பக்திியுடன் அம்பிகையை வழிபட்டால் வாழ்வில் அனைத்து ஐசுவரியங்களும் பெருகும் என்பது ஐதீகமாகும்.
நவராத்திரி என்பது தீமையின் மீது நன்மை பெற்ற வெற்றியை நினைவுகூரும் வகையில் கொண்டாடப்படும் ஒன்பது நாட்கள் திருவிழா ஆகும். இதன் பின்னணியில் உள்ள முக்கிய புராணக் கதை:
மகிஷாசுரன் என்ற எருமைத் தலை அசுரன் பிரம்மாவை நோக்கி கடுமையான தவம் செய்து, ஆண்பால் வடிவங்களால் தனக்கு மரணம் ஏற்படக்கூடாது என்ற வரத்தைப் பெற்றான்.
இந்த வரத்தின் பலத்தால் அவன் தேவர்களையும் மனிதர்களையும் துயருறுத்தினான். எந்தவொரு ஆணும் அவனைக் கொல்ல முடியாது என்பதால் தேவர்கள் உதவியின்றித் தவித்தனர்.
மும்மூர்த்திகளான பிரம்மா, விஷ்ணு, சிவன் ஆகியோர் தங்கள் சக்திகளை ஒன்றாக இணைத்து ஒரு சக்திவாய்ந்த பெண் தெய்வமான அம்பிகை (துர்கை) தேவியை உருவாக்கினர்.
மூன்று நிலைகள்:
முதல் 3 நாட்கள்: தைம குணங்களை நீக்க துர்க்கை வழிபாடு.
அடுத்த 3 நாட்கள்: ரஜோ குணங்களை வெல்ல மகாலட்சுமி வழிபாடு.
கடைசி 3 நாட்கள்: சத்துவ குணங்களைப் பெற சரஸ்வதி வழிபாடு.
அம்பிகையும் மகிஷாசுரனும் ஒன்பது இரவுகள் கடுமையாகப் போர் புரிந்தனர். பத்தாம் நாளன்று தேவி மகிஷாசுரனை வதம் செய்தாள்.
மகிஷாசுரனை தேவி வென்ற கதை தீமையின் மீது நன்மையின் வெற்றியை குறிக்கும் ஆன்மிக அடையாளமாகப் பார்க்கப்படுகிறது.
பத்தாம் நாள்: வெற்றியைக் குவிக்கும் விஜயதசமி திருநாள்! நவராத்திரி நிறைவடைந்த அடுத்த நாள் விஜயதசமியாகக் கொண்டாடப்படுகிறது.
தெய்வீக கொண்டாட்டம் என்பதால், புராண, இதிகாசங்களின்படி மகிஷன் முதலான அரக்கர்கள் மாய்ந்து அந்த வெற்றியைக் கொண்டாடும் திருநாளாகவும் விஜயதசமி அமைகிறது. அதோடு ஒரு பெண் பூவாகவே இருந்தாலும், அவளும் புயலாக மாறுவாள் என்றும் இந்த சம்பவங்கள் நமக்குத் தெரிவிக்கின்றன. தற்காலத்தில் சமூகத்தின் நடைபெறும் ஒழுக்கக் கேடுகளை நினைத்தால், பெண்கள் மிகுந்த தைரியசாலிகளாகத் திகழ வேண்டிய அவசியத்தை முன்னிறுத்த வேண்டியிருக்கிறது. இந்த நந்நாள், அம்பிகையின் அருளால் பெண்களுக்கு அத்தகைய மன உறுதியை அளிக்கும் திருநாளாக அமைகிறது.
விஜயதசமி நாளில் அம்மன் வழிபாடு, ஆயுத பூஜை பொருட்களுக்கு மரியாதை, மற்றும் புதிய கல்வி அல்லது தொழிலை தொடங்குவது மிகவும் சிறப்புடையதாகும்.
நவராத்திரியின் 10-வது நாளான விஜயதசமியில் குழந்தைகளை கோவில்களுக்கு அழைத்துச் சென்று அரிசியில் ‘அ’ எழுத வைத்து கல்வியைத் தொடங்கலாம். ஆயுத பூஜையின் போது வைக்கப்பட்டுள்ள புத்தகங்கள், எழுதுகோல்கள் மற்றும் தொழில் கருவிகளை எடுத்துப் பயன்படுத்தலாம்.
புதிய தொடக்கங்கள்: இந்த நாளில் எந்தச் செயலைத் தொடங்கினாலும் அது வெற்றியில் முடியும் என்பதால், புதிய தொழில், வேலை அல்லது படிப்பை ஆரம்பிக்கலாம்.
மாணவர்களுக்குப் புத்தகங்கள் அல்லது கல்வி தொடர்பான பொருட்களைத் தானமாக வழங்கலாம். இரும்புத் தளவாடங்கள், தங்கம் அல்லது நிலம், வீடு தொடர்பான முன்னெடுப்புகளைச் செய்யலாம்.
