சென்னை:
திமுகவின் குதிரை பேரம் குறித்து முன்னாள் முதலமைச்சர் மு.க.ஸ்டாலின் ஒப்புதல் வாக்குமூலம் அளித்துள்ளதாக மக்கள் நல்வாழ்வுத்துறை அமைச்சர் அருண்ராஜ் மிகக் கடுமையாக விமர்சித்துள்ளார். இது தமிழக அரசியல் களத்தில் பெரும் பரபரப்பை ஏற்படுத்தியுள்ளது.
ஒப்புதல் வாக்குமூலம்:
இது தொடர்பாகத் தனது எக்ஸ் வலைதளப் பக்கத்தில் பதிவிட்டுள்ள அவர், “முன்னாள் அமைச்சர் கே.என்.நேரு இல்லத் திருமண விழாவில் பேசிய முன்னாள் முதலமைச்சர் மு.க.ஸ்டாலின், தன்னையும் அறியாமல் தான் இப்போது திரைமறைவில் செய்துகொண்டிருக்கிற வேலைகளைப் பற்றிய ஓர் ஒப்புதல் வாக்குமூலத்தை மைக் முன் மக்களிடம் அளித்துள்ளார். விரைவில் நமது ஆட்சி உதயமாகப் போகிறது, அதற்காகத் தயாராக இருக்க வேண்டும் என்று அவர் பேசியுள்ளார். 2026 தேர்தலில் மக்கள் வாக்களித்து முதலமைச்சர் விஜய்யைத் தேர்ந்தெடுத்துள்ளனர். பல்வேறு கட்சிகளின் ஆதரவோடு தமிழகம் இதுவரை கண்டிராத கூட்டணிக் கட்சியாக வெற்றிகரமாக ஆட்சி நடந்து வருகிறது,” என்று அவர் சுட்டிக்காட்டினார்.
ஆட்சியைக் கவிழ்க்க முயற்சி:
தொடர்ந்து அவர், “சமீபத்தில் நடந்த தாராபுரம், மதுராந்தகம் இடைத்தேர்தல்களிலும் மக்கள் நமது சட்டமன்ற உறுப்பினர்களின் எண்ணிக்கையை உயர்த்தியுள்ளனர். ஆனாலும், கடந்த மே மாதத்தில் இருந்தே இந்த ஆட்சி நீடிக்காது என்று மு.க.ஸ்டாலின் சோழி உருட்டிக் கொண்டிருக்கிறார். அதிகாரம் பறிபோன பதற்றத்திலும் பரிதவிப்பிலும் அவர் இந்த ஆட்சியைக் கவிழ்க்கப் பல்வேறு முயற்சிகளைச் செய்து பார்த்தார். அது தொடர்பான குதிரை பேர வழக்கு கூட இப்போது நீதிமன்றத்தில் நடந்து வருகிறது. நம் மீது குதிரை பேரம் என்ற பொய்ப் புகாரைச் சொல்லிக்கொண்டிருக்கும் ஸ்டாலின், உண்மையிலேயே தனது ஓய்வுக்காலத்தைக் குதிரை பேர முயற்சியில்தான் தீவிரமாகச் செய்துகொண்டிருக்கிறார் என்பதை அவரது இந்தப் பேச்சு காட்டுகிறது,” என்று அவர் கடுமையாகச் சாடினார்.
விரைவில் எப்படி உதயமாகும்?:
மேலும் அவர் கூறுகையில், “2026-ல் மக்களால் தேர்ந்தெடுக்கப்பட்ட அரசு 2031 வரை பதவியில் இருக்க வேண்டும் என்பதுதான் சட்டம். ஆனால் ஆறு மாத முடிவிலேயே விரைவில் திமுக ஆட்சி உதயமாகும் என்று ஸ்டாலின் பேசுகிறார் என்றால், அவர் நடத்தும் குதிரை பேர முயற்சிகள் ஒவ்வொரு கட்டமாக முன்னேறிக்கொண்டிருக்கிறது என்று திமுகவினருக்குச் சொல்கிறாரா? பள்ளிக் கல்வி, நகராட்சி, பொதுப்பணித்துறை என எல்லாத் துறையிலும் உலக மகா ஊழல் செய்துவிட்டு, அவர் இவ்வாறு பேசுவது குதிரை பேரத்தை உறுதிப்படுத்துகிறது. இது குறித்து அவர் உரிய விளக்கம் அளிக்க வேண்டும்,” என்று அமைச்சர் அருண்ராஜ் ஆணித்தரமாகக் கேள்வியெழுப்பியுள்ளார்.
#MinisterArunraj #MKStalin #HorseTrading #TVKGovernment #BmNews #TamilNews #BreakingNews #LatestNews #TamilNewsLive