கியூபெக் மாகாணத்திலுள்ள டெரெபோன் தொகுதியில் வரவிருக்கும் திங்கட்கிழமை இடைத்தேர்தலை முன்னிட்டு, கூட்டாட்சி லிபரல் கட்சி தனது முழு பலத்தையும் பிரயோகித்து வருகிறது.
கடந்த சில வாரங்களில் மட்டும் 25-க்கும் மேற்பட்ட நாடாளுமன்ற உறுப்பினர்களையும், அமைச்சரவை உறுப்பினர்களையும் பிரச்சாரத்திற்காக அந்தத் தொகுதிக்கு அனுப்பி வைத்துள்ளது. ஒரு அமைச்சர் இதனை மிக “முக்கியத்துவம் வாய்ந்த” போட்டியாக வர்ணித்துள்ளார்.
“ஒரு அரசாங்கம் தெளிவான இலக்கோடும், பெரும்பான்மை பலத்தோடும் இருக்கும்போது எங்களால் பல திட்டங்களை நிறைவேற்ற முடியும்,” என்று வீடமைப்புத் துறை அமைச்சர் கிரிகோர் ராபர்ட்சன் தெரிவித்தார். இவர் கடந்த வாரம் மாண்ட்ரியல் புறநகர்ப் பகுதியான டெரெபோனில் லிபரல் வேட்பாளர் டாட்டியானா அகஸ்டுடன் இணைந்து வீடு வீடாகச் சென்று ஆதரவு திரட்டினார்.
எதிர்க்கட்சிகள் பெரும்பான்மையாக உள்ள நாடாளுமன்றக் குழுக்களில் அரசாங்கத்தின் மசோதாக்கள் முடக்கப்படுவதை ராபர்ட்சன் சுட்டிக்காட்டினார். “அமெரிக்காவில் காங்கிரஸ் சபையில் பட்ஜெட் மசோதாக்களை நிறைவேற்ற முடியாமல் அனைத்தும் மாதக்கணக்கில் முடங்கிப் போவதையும், அதனால் ஏற்படும் சிக்கல்களையும் நாம் பார்க்கிறோம். கனடாவில் பொதுவாக அந்தப் பிரச்சினை இருந்ததில்லை; ஆனால் சமீபத்திய சிறுபான்மை அரசாங்கங்களின் காலத்தில் நாம் இதனை எதிர்கொள்கிறோம். ஒரு செயல்படக்கூடிய நாடாளுமன்றம் இருந்தால், ஒரு நாடாக எங்களால் இன்னும் அதிகமானவற்றைச் செய்ய முடியும். ஒரு வாக்கு முடிவைத் தீர்மானிக்கும் என்பதால், இங்கு ஒவ்வொரு வாக்கும் முக்கியம்,” என்றார் அவர்.
கடந்த ஆண்டு நடைபெற்ற தேர்தலில், வரலாற்று ரீதியாக ‘பிளாக் கியூபெக்வா’ (Bloc Québécois) கட்சியின் கோட்டையாக இருந்த டெரெபோன் தொகுதியை லிபரல் கட்சி வெறும் ஒரே ஒரு வாக்கு வித்தியாசத்தில் கைப்பற்றியது. இருப்பினும், தேர்தல் ஆணையத்தின் (Elections Canada) தவறால் ஒரு பிளாக் கியூபெக்வா ஆதரவாளரின் தபால் வாக்கு எண்ணப்படவில்லை என்பது தெரியவந்ததையடுத்து, முன்னாள் நாடாளுமன்ற உறுப்பினர் நத்தலி சின்க்ளெயர்-டெஸ்காக்னே தொடர்ந்த சட்டப் போராட்டத்தினால் அந்தத் தேர்தல் முடிவை உச்ச நீதிமன்றம் ரத்து செய்தது.
ஓராண்டுக்குப் பிறகு, தற்போது நடைபெறவுள்ள இத்தேர்தலில் வாக்காளர்கள் தங்களின் பிரதிநிதியைத் தேர்ந்தெடுப்பது மட்டுமல்லாமல், நாடாளுமன்றத்தில் லிபரல் கட்சிக்குக் கூடுதல் அதிகாரத்தை வழங்குவதா அல்லது மறுப்பதா என்பதையும் தீர்மானிக்க உள்ளனர்.
ஷெர்ப்ரூக் பல்கலைக்கழகத்தின் அரசியல் அறிவியல் பேராசிரியர் ஜான்-பிரான்சுவா டாஸ்ட் கூறுகையில், “டெரெபோனில் வெற்றி பெறாமலேயே லிபரல் கட்சி பெரும்பான்மை அரசை அனுபவிக்கலாம். ஆனால், நடைமுறையில் எதிர்க்கட்சிகளின் எதிர்ப்பு குறித்து கவலைப்படாமல் தங்கள் திட்டங்களை எளிதாக நிறைவேற்ற லிபரல் அரசாங்கத்திற்கு இந்த ஒரு கூடுதல் வாக்கு அவசியமாக உள்ளது,” என்றார்.
திங்கட்கிழமை நடைபெறவுள்ள தேர்தலில், முன்னாள் அமைச்சர்களான பில் பிளேயர் மற்றும் கிறிஸ்டியா ஃப்ரீலான்ட் ஆகியோரின் டொராண்டோ தொகுதிகளுடன் சேர்த்து டெரெபோனையும் லிபரல் கட்சி வென்றால், நாடாளுமன்றத்தில் அவர்களின் பலம் 173 ஆக உயரும். இதன் மூலம் சட்டங்களை நிறைவேற்றவும், நாடாளுமன்றக் குழுக்களில் தங்கள் பெரும்பான்மையைப் பிரதிபலிக்கும் வகையில் மாற்றங்களைச் செய்யவும் அவர்களுக்கு ஒரு கூடுதல் வாக்குக் கிடைக்கும்.
“எனவே இந்தத் தேர்தல் லிபரல் அரசாங்கத்திற்கு மிக முக்கியமானது,” என்று கூறிய டாஸ்ட், “அதே சமயம் அரசியல் ரீதியாக இது பிளாக் கியூபெக்வா கட்சிக்கும் ஒரு பெரிய சவாலாகும்,” என்றார். 90 சதவீதத்திற்கும் அதிகமான பிரெஞ்சு மொழி பேசுபவர்களைக் கொண்ட, தாங்கள் ஏற்கனவே வெற்றி பெற்ற ஒரு தொகுதியை பிளாக் கியூபெக்வாவால் மீண்டும் வெல்ல முடியாவிட்டால், அது அந்தக் கட்சிக்குச் சிக்கலை ஏற்படுத்தும். அதே சமயம் பிரதமர் மார்க் கார்னி மற்றும் லிபரல் கட்சியின் புகழ் அதிகரித்து வருவதை இது உறுதிப்படுத்தும்.
தங்கள் வாக்கு லிபரல் கட்சியின் தலைவிதியைத் தீர்மானிக்குமா என்பது குறித்து டெரெபோன் வாக்காளர்கள் மத்தியில் கலவையான கருத்துக்கள் நிலவுகின்றன.
“நான் எனது கொள்கைகளின் அடிப்படையில் வாக்களிக்கிறேன். கார்னிக்கு பெரும்பான்மை கிடைக்கிறதா அல்லது சிறுபான்மை பலம் கிடைக்கிறதா என்பது பற்றி எனக்குக் கவலையில்லை,” என்றார் டெரெபோன் குடியிருப்பாளர் டொமினிக் லெபெவ்ரே.
மறுபுறம், கார்னிக்கு வலுவான பெரும்பான்மை கிடைக்க வேண்டும் என்பதே முக்கியக் காரணி எனச் சில வாக்காளர்கள் கருதுகின்றனர். “ஆமாம், அவருக்கு அது தேவை. கடந்த முறை ஒரு வாக்கு வித்தியாசத்தில் முடிந்தது மிகவும் வருத்தமானது. எனவே அனைவரும் சென்று வாக்களிப்பது மிகவும் முக்கியம்,” என்று லிபரல் ஆதரவாளர் கெடேன் பெல்டியர் தெரிவித்தார்.
டெரெபோன் தொகுதியில் பதிவு செய்யப்பட்ட வாக்காளர்களில் சுமார் ஐந்தில் ஒரு பகுதியினர் (18,200 பேர்) கடந்த வார இறுதி முன்கூட்டியே வாக்களிக்கும் முறையில் (Advance polls) தங்கள் வாக்குகளைப் பதிவு செய்துள்ளதாக தேர்தல் ஆணையம் தெரிவித்துள்ளது.
