ட்ரம்ப் அமெரிக்கர்களின் நலனுக்காக உழைக்கவில்லை – அமெரிக்க உரையில் ஜஸ்டின் ட்ரூடோ பேச்சு
பிரவுன் பல்கலைக்கழகத்தில் அமெரிக்க அதிபர் ட்ரம்பின் நிர்வாகத்தைப் பற்றிய தனது கருத்துக்களை முன்னாள் கனடியப் பிரதமர் பகிர்ந்துகொண்டார்.
ஒட்டாவா — அமெரிக்க அதிபர் டொனால்ட் ட்ரம்பின் நிர்வாகம் இனி அமெரிக்க மக்களின் நலனுக்காக “வேலை செய்யவில்லை” என்பதால், அமெரிக்கா ஒரு “கணிப்பிட முடியாத” கூட்டாளியாக மாறியுள்ளது என்று முன்னாள் பிரதமர் ஜஸ்டின் ட்ரூடோ தெரிவித்துள்ளார்.
செவ்வாயக்கிழமை ரோட் தீவில் உள்ள பிரவுன் பல்கலைக்கழகத்தின் தலைவர் கிறிஸ்டினா பாக்சனுடன் நடைபெற்ற கேள்வி-பதில் அமர்வின் போது, தற்போதைய ட்ரம்ப் நிர்வாகம் குறித்த தனது எண்ணங்களை முன்னாள் பிரதமர் பகிர்ந்து கொண்டார்.
கனடாவிற்கும் அமெரிக்காவிற்கும் இடையே தற்போது நிலவும் “வர்த்தக பதற்றங்கள்” எங்கு போய் முடியும் என்று பாக்சன் கேட்டதற்கு, தற்போதைய நிர்வாகத்திற்கும், ட்ரம்பின் முதலாவது பதவிக் காலத்தில் அவருடன் பேச்சுவார்த்தை நடத்தியதற்கும் இடையே நிறைய வித்தியாசங்கள் இருப்பதாக ட்ரூடோ கூறினார்.
அதில் ஒன்று, ட்ரம்ப் பிற நாடுகளுடன் “இருதரப்பு வெற்றி” (win-win) ஒப்பந்தங்களுக்குப் பதிலாக, அது அமெரிக்கர்களுக்கு எதிர்மறையான தாக்கத்தை ஏற்படுத்தினாலும், “ஒருவருக்கு வெற்றி – மற்றவருக்கு இழப்பு” (win-lose) என்ற வகையிலான ஒப்பந்தங்களைச் செய்ய முற்படுவதால் கணிப்புத்தன்மை மாறுபட்டுள்ளது.
“பல தசாப்தங்களாக அமெரிக்கா தனது சொந்த நலனுக்காகவே செயல்பட்டது, ஆனால் அது கணிக்கக்கூடிய வழியில் இருந்தது” என்று அமெரிக்க கூட்டத்தினரிடம் ட்ரூடோ கூறினார். “‘இல்லை, நாம் எதையாவது செய்வதாக இருந்தால், அது நமது நலனுக்கு உகந்ததாக இருக்க வேண்டும்’ என்று கூற வேண்டியிருந்தது. அது பரவாயில்லை, உங்கள் நலன்களும் எங்கள் நலன்களும் பாதுகாக்கப்படுவதை எவ்வாறு உறுதி செய்வது என்பதை உலகமும் கண்டறிந்தது.”
“ஆனால் திடீரென்று உருவாகியுள்ள கணிப்பிட முடியாத தன்மை என்னவென்றால், அமெரிக்க நிர்வாகம் இனி அமெரிக்க மக்களின் நலனுக்காக உழைக்கவில்லை. இது பிற நாடுகள் சூழலைக் கையாள்வதற்கும், நண்பர்கள் நம்பியிருப்பதற்கும், தொழில்கள் முதலீடு செய்வதற்கும் மிகவும் கடினமானதாகவும், கணிப்பிட முடியாததாகவும் ஆக்குகிறது,” என்று அவர் மேலும் கூறினார்.
தனது கூற்றை நிருபிக்கும் வகையில், கனடிய அலுமினியம் மற்றும் மென்பலகை (softwood lumber) மரங்கள் மீது ட்ரம்ப் விதித்துள்ள சமீபத்திய வரிகளை அமெரிக்க நிர்வாகத்தின் சுய-பாதிப்பு கொள்கைகளாக ட்ரூடோ சுட்டிக்காட்டினார்.
அமெரிக்கா போதுமான அளவு அலுமினியத்தை உற்பத்தி செய்வதில்லை மற்றும் தனது உள்நாட்டுத் தேவையைப் பூர்த்தி செய்ய நீண்ட காலமாக கனடிய தயாரிப்புகளையே நம்பியுள்ளது என்று ட்ரூடோ கூறினார். எனவே, அமெரிக்க வரிகளால் கனடிய அலுமினியத்தின் விலை உயரும் போது, உள்ளூர் உற்பத்தி அதிகரிக்காமல் பீர் டப்பாக்கள் போன்ற ஏராளமான அமெரிக்க தயாரிப்புகள் விலை உயர்ந்ததாக மாறுகின்றன.
“எனவே நீங்கள் சொந்த பீர் மற்றும் இதர பொருட்களின் விலையை உயர்த்தியுள்ளீர்கள், மேலும் கனடாவில் இருந்து அலுமினியம் வாங்குவதற்குப் பதிலாக பஹ்ரைனில் இருந்து அலுமினியத்தை மாற்றாக வாங்குகிறீர்கள்,” என்று அவர் கூறினார்.
“நம்பகமான விநியோகத்தில் இருந்து அலுமினியத்தைப் பெறுவதை அமெரிக்காவில் உள்ள நுகர்வோருக்கும், உற்பத்தியாளர்களுக்கும், தயாரிப்பாளர்களுக்கும் நீங்கள் மிகவும் கடினமாக்குகிறீர்கள்.”
கனடிய மென்பலகை மரங்களுக்கும் இதுவே பொருந்தும் என்று முன்னாள் பிரதமர் கூறினார். பெரிய அளவிலான வீட்டு கட்டுமான எழுச்சிக்கு ஆதரவளிக்கும் வகையில் அமெரிக்காவால் உள்ளூரில் போதுமான மரங்களை உற்பத்தி செய்ய முடியாது என்பதால், அது இன்னமும் கனடிய தயாரிப்புகளையே நாட வேண்டியுள்ளது… அதுவும் ட்ரம்பின் புதிய வரிகளால் இப்போது அதிக விலையைக் கொண்டுள்ளது.
“அதாவது, அமெரிக்காவில் உண்மையில் மரங்களை தயாரித்து அறுவடை செய்யும் ஒருசில நிறுவனங்கள் அதிக விலையை வசூலிக்க முடியும் என்பதற்காகவே, அமெரிக்காவில் உள்ள வீடு கட்டுபவர்கள் மரங்களுக்குத் தேவையை விட அதிக பணம் செலுத்துகிறார்கள்,” என்று அவர் கூறினார்.
“உங்கள் பழமையான மற்றும் சிறந்த கூட்டாளிகளில் ஒருவருடன் சண்டையிடுவதன் மூலம், உங்கள் நுகர்வோருக்கு விலையை உயர்த்தும் மற்றும் அமெரிக்காவிற்கு எதையும் சிறப்பானதாக மாற்றாத ஒரு முறைமை இங்கு மீண்டும் மீண்டும் நடக்கிறது,” என்று ட்ரூடோ கூறினார்.
இந்த கொந்தளிப்பான காலங்களில் எதிர்காலம் என்ற அறியப்படாத ஆழத்தைப் பார்ப்பதில் அவர்கள் தனியாக இல்லை என்று ட்ரூடோ கூட்டத்தினரிடம் கூறினார்.
“கடந்த 10 ஆண்டுகளாக, தலைவர்கள் யோசித்து உடனுக்குடன் முடிவெடுக்க முயன்று வருகிறார்கள்,” என்று ட்ரூடோ கூறினார்.
