செல்வச்சந்நிதியானின் வருடாந்த மஹோற்சவம் எதிர்வரும் 12ம் திகதி கொடியேற்றத்துடன் ஆரம்பமாகவுள்ளமை குறிப்பிடத்தக்கது.
தொண்டைமானாறு செல்வச்சந்நிதி ஆலய வருடாந்த மகோற்சவ காலத்தில் ஆலய சூழலில் உணவு கையாளும் நிலையங்களில் லஞ்ச் சீற் பாவனை, புகையிலை சார்ந்த பொருட்கள் விற்பனை மற்றும் பச்சை குத்தும் செயற்பாட்டிற்கும் முற்றாக தடை செய்யப்பட்டுள்ளதாகவும் அதனை மீறி செயற்படுபவர்கள் மீது கடும் சட்ட நடவடிக்கை மேற்கொள்ளப்படும் என வல்வெட்டித்துறை பொதுச்சுகாதார பரிசோதகர் ப.தினேஸ் எச்சரித்துள்ளார்.
இது தொடர்பில் அவரால் விடுக்கப்பட்டுள்ள பொதுச்சுகாதாரம் சார்ந்த பொது அறிவுறுத்தல்கள் வருமாறு,
1. உணவு கையாளும் நிலையங்கள் (உணவகங்கள், இனிப்பு கடைகள், மிக்சர் கடைகள், ஐஸ்கிறீம் கடைகள், காரம்சுண்டல், தும்புமிட்டாய், ஏனையவை) தத்தமது உள்ளூராட்சி மன்றங்களின் நடப்பாண்டிற்கான அனுமதியை பெற்றிருத்தல் வேண்டும்.
2. உணவு கையாளும் நிலையங்களில் கடமைபுரிபவர்கள், அன்னதான மடங்களில் கடமை புரிபவர்கள் மற்றும் தாகசாந்தி நிலையங்களில் கடமை புரியும் அனைவரும் நடப்பாண்டிற்கான மருத்துவ சான்றிதழ் வைத்திருப்பதுடன் தனிநபர் சுகாதாரம் பேணுவதனை உறுதிப்படுத்துதல் வேண்டும் என்பதுடன் தற்காலிக கடமையில் ஈடுபடுபவர்கள் தற்காலிக மருத்துவ சான்றிதழ் பெற வல்வெட்டித்துறை நகராட்சி மன்றத்தின் பொதுச் சுகாதார பரிசோதகரினை தொடர்பு கொள்ளவும்.
3. தண்ணீர்ப்பந்தல்கள், சர்பத் கடைகள் மற்றும் ஐஸ்கிறீம் கடைகள் நடாத்துபவர்கள் அனுமதி பெறப்பட்ட கடைகளில் நீர்ப்பரிசோதனை அறிக்கை வைத்திருப்பவர்களிடம் இருந்து ஐஸ்கட்டிகளை கொள்வனவு செய்வதுடன் அதற்கான பற்றுச்சீட்டினையும் தம்வசம் வைத்திருத்தல் வேண்டும்.
4. ஆலயத்தினது சுற்றாடலில் புகையிலை சார்ந்த பொருட்களை விற்பனை செய்வதும் பயன்படுத்துவதும் முற்றாக தடை செய்யப்பட்டுள்ளது.
5. வர்த்தக நிலையங்கள், அன்னதான மடங்கள், தண்ணீர் பந்தல்களில் பயன்படுத்தப்படும் நீரானது குடிக்கத்தகுந்தது (நீர்ப்பரிசோதனை அறிக்கை) என்பதனை உறுதிப்படுத்தப்படல் வேண்டும் என்பதுடன் தவறும் பட்சத்தில் நகராட்சி மன்றத்தினால் வழங்கப்படும் குடிநீரினை மாத்திரமே பயன்படுத்த வேண்டும்.
6. பொதுச்சுகாதாரம் சார்ந்த விடயங்கள் தொடர்பான ஆலோசனைகள் மற்றும் அறிவுரைகளை உற்சவ கால சுகாதார வைத்திய அதிகாரி பணிமனை நிலையத்தில் பெற்றுக்கொள்ள முடியும்.
7. வர்த்தக நிலையங்கள் மற்றும் மடங்களிலும் தண்ணீர் பந்தல்களிலும் இருந்து வெளியேறும் திண்மக்கழிவுகளை குப்பைத்தொட்டி கொண்டு தரம்பிரித்து ஓரிடத்தில் சேகரிப்பதுடன் அதனை உரியமுறையில் அகற்றுவதனை உறுதிப்படுத்தப்படலும் வேண்டும்.
8. ஆலயச் சூழலில் லஞ்சீற் மற்றும் பிளாஸ்திக் பாவனை முற்றாக தடை செய்யப்பட்டுள்ளதுடன் மீறுபவர்கள் மீது சட்டநடவடிக்கை எடுக்கப்படும்.
9. பச்சை குத்துதல் செயற்பாடுகள் முற்றாக தடை செய்யப்பட்டுள்ளது.
10. காவடி குத்துபவர்கள் நகராட்சி மன்றத்தின் நடப்பாண்டிற்கான வியாபார அனுமதிப்பத்திரம் பெற்றிருத்தல் வேண்டும் என்பதுடன் தொற்றுநீக்கும் வசதியும் ஏற்பாடு செய்திருத்தல் வேண்டும்.(உபகரணங்கள் கொதிநீரிலிட்டு தொற்றுநீக்கும் வசதிகள்)
11. குத்தகைக்கு வழங்கப்படும் நிலங்கள் திருவிழா முடிவடைந்ததும் சுத்தமாக பேணப்படுவது ஆதன உரிமையாளரின் பொறுப்பாகும்.
12. பொதுச்சுகாதாரம் தொடர்பான சட்ட ஏற்பாடுகளை மீறுபவர்கள் மீது சட்ட நடவடிக்கை எடுக்கப்படும்.
