• “எலிகள் நிறைந்த 6×4 அடி அளவுள்ள சிறிய அறையின் தரையில் தூங்க வேண்டிய கட்டாயத்திற்கு ஆளானதையடுத்து, இன்று அவருக்கு அதிக இரத்த அழுத்தம் (சர்க்கரை நோய்), கொலஸ்ட்ரால் மற்றும் தோலில் தடிப்புகள் (Skin Rash) ஏற்பட்டுள்ளன.”

• “அவர் சித்திரவதைக்கு உள்ளாக்கப்பட்டுள்ள விவகாரம் சட்ட வைத்திய அதிகாரியின் (JMO) அறிக்கையில் ஏழுக்கும் மேற்பட்ட வெவ்வேறு பிரிவுகளில் சுட்டிக்காட்டப்பட்டுள்ளது. எனினும், அவரது உடல்நிலை குறித்து வழங்கப்பட்ட மருத்துவப் பரிந்துரைகள் எவையும் பின்பற்றப்படவில்லை.”

• “அவர் பயங்கரவாதத் தடைச் சட்டத்தை (PTA) முழுமையாக நீக்குமாறு கோரவில்லை. மாறாக, தடுத்து வைக்கப்படுபவர்கள் தான் அனுபவித்ததைப் போன்ற மனிதாபிமானமற்ற நடத்தைகளுக்கு உள்ளாக்கப்படுவதைத் தடுக்கும் வகையில் அச்சட்டம் திருத்தப்பட வேண்டும் என்றே அவர் கோருகிறார்.”

• “எஃப்.பி.ஐ (FBI), அவுஸ்திரேலிய கூட்டாட்சி பொலிஸ் (AFP) மற்றும் பல ஜனாதிபதி விசாரணை ஆணைக்குழுக்கள் நடத்திய விசாரணைகளில் ஈஸ்டர் ஞாயிறு தாக்குதல்களுடன் சுரேஷின் பெயர் எங்கும் தொடர்புபடுத்தப்படவில்லை.”

• “எந்தவொரு நீதிமன்றமும் அவர் குற்றவாளி என்று தீர்ப்பளிக்காத போதிலும், பல சமூக ஊடகப் பயனர்கள் பொதுமக்களின் கருத்துமன்றத்தில் ஏற்கனவே அவருக்குத் தண்டனை வழங்கிவிட்டனர்.”

– காமந்தி விக்ரமசிங்க

2019ஆம் ஆண்டு நடத்தப்பட்ட ஈஸ்டர் ஞாயிறு பயங்கரவாதத் தாக்குதல்களுடன் நேரடித் தொடர்பு இருப்பதாகக் கூறப்படும் குற்றச்சாட்டுகளின் கீழ், அரச புலனாய்வுச் சேவையின் (SIS) முன்னாள் பணிப்பாளரும், ஓய்வுபெற்ற மேஜர் ஜெனரலுமான சுரேஷ் சலே பயங்கரவாதத் தடைச் சட்டத்தின் (PTA) கீழ் 105 நாட்களுக்கும் மேலாக தடுத்து வைக்கப்பட்டுள்ளார்.

குற்றப் புலனாய்வுத் திணைக்களத்தின் (CID) காவலில் இருந்தபோது, தனது தடுப்புக் காவல் நிலைமைகளுக்கு எதிர்ப்புத் தெரிவித்தும், பயங்கரவாதத் தடைச் சட்டத்தில் திருத்தங்களைக் கோரியும் சலே சாகும்வரையிலான உண்ணாவிரதப் போராட்டத்தை ஆரம்பித்தார்.

பின்னர் அவர் கொழும்பு தேசிய வைத்தியசாலைக்கு மாற்றப்பட்டு, மருத்துவக் கண்காணிப்பில் வைக்கப்பட்டுள்ளார். எவ்வாறாயினும், அவரது உடல்நிலை மோசமடைந்து வருவது குறித்து அவரது குடும்பத்தினர் கவலை வெளியிட்டுள்ளதுடன், அவருக்கு இழைக்கப்படும் மனிதாபிமானமற்ற நடத்தைகளை நிறுத்துவதற்கு அரசாங்கம் தலையிட வேண்டும் என்றும் வலியுறுத்தியுள்ளனர். சுரேஷ் சலேயின் உடல்நிலை, நாட்டிற்கு அவர் ஆற்றிய சேவை, அவர் ஏன் இவ்வாறு நடத்தப்படக் கூடாது மற்றும் அவர் மீதான குற்றச்சாட்டுகள் ஏன் அடிப்படையற்றவை என்பது குறித்து அவரது மனைவி மனோரி சல்லே ‘டெய்லி மிரர்’ (Daily Mirror) நாளிதழுக்கு வழங்கிய நேர்காணல் :

கே: தடுப்புக்காவலில் உள்ளவர்களின் உரிமைகளைப் பாதுகாப்பதற்காக பயங்கரவாதத் தடைச் சட்டத்தில் திருத்தம் செய்யக் கோரி உங்கள் கணவர் சாகும்வரை உண்ணாவிரதப் போராட்டத்தை ஆரம்பித்தார். உடல்நிலை மோசமடைந்ததைத் தொடர்ந்து அவர் கொழும்பு தேசிய வைத்தியசாலைக்கு மாற்றப்பட்டார். இன்றைய நிலையில் அவரது உடல்நிலை எவ்வாறு உள்ளது?

நான் அவரை சனிக்கிழமை (ஜூன் 13) சென்று பார்த்தேன். அவரது உடல்நிலை நாளுக்கு நாள் மோசமடைந்து வருகிறது. அவர் மிகவும் பலவீனமாகக் காணப்படுகிறார். அவர் எதிர்கொள்ளும் ஏனைய சிக்கல்களுக்கு மேலதிகமாக, அவருக்குத் தொற்று (Infection) மற்றும் காய்ச்சல் ஏற்பட்டுள்ளது. இந்தத் தொற்று மேலும் தீவிரமடையும் (Septic) அபாயம் உள்ளது. இதன் காரணமாக, மருத்துவப் பணியாளர்கள் நேற்றுடன் கானுலா (Cannula) மூலமாக மருந்து வழங்குவதை நிறுத்திவிட்டு, இன்று முதல் அவருக்குத் தேவையான ஊட்டச்சத்தை வழங்குவதற்காக மூக்கு வழியிலான குழாயை (Nasogastric tube) பொருத்தியுள்ளனர்.

அவர் தனது உண்ணாவிரதப் போராட்டத்தை ஆரம்பித்து இப்போது ஒன்பது நாட்கள் ஆகின்றன. அவர் உணவு மற்றும் நீர் இரண்டையும் தொடர்ந்து மறுத்து வருகிறார். அவருக்கு லேசான சுவாசக் சிரமம் உள்ளதுடன், பேசுவதற்கும் மிகவும் சிரமப்படுகிறார்.

கே: இந்தத் தருணத்தில் குடும்பத்தினர் எவ்வாறான சூழ்நிலையை எதிர்கொள்கின்றனர்?

இந்த மிகவும் வருத்தமளிக்கும் சூழ்நிலைகளால், எங்கள் குடும்பம் கடுமையான உளவியல் அதிர்ச்சிக்கும் மன உளைச்சலுக்கும் ஆளாகியுள்ளது. உடல் ரீதியாகவும் மன ரீதியாகவும் ஆரோக்கியமாக இருந்த ஒரு மனிதரையே அவர்கள் கைது செய்தனர். ஆனால் இன்று, தரையில் தூங்க வேண்டிய கட்டாயத்தினால் அவருக்கு அதிக இரத்த சர்க்கரை, கொலஸ்ட்ரால் மற்றும் தோலில் தடிப்புகள் ஏற்பட்டுள்ளன.

ஒருவர் நீண்ட நாட்களுக்கு உணவும் நீரும் இன்றி இருக்கும்போது, உடலில் மின்பகுபொருள் சமநிலை (Electrolyte imbalance) சீர்குலையும் கடுமையான ஆபத்து உள்ளது. இது பக்கவாதம் (Stroke) அல்லது மாரடைப்பை ஏற்படுத்தக்கூடும். தற்போது, நாங்கள் அனைவரும் அவரது உயிருக்கு பயந்து கொண்டிருக்கிறோம். அவர் எந்தக் காரணமும் இன்றி துன்புறும் ஒரு நிரபராதி.

கே: சிஐடி காவலில் இருந்தபோது அவர் மன ரீதியான சித்திரவதைக்கு உள்ளாக்கப்பட்டதாகக் கூறப்படும் குற்றச்சாட்டுகள் குறித்து விசாரிக்க மனநல மருத்துவர்கள் குழுவொன்று நியமிக்கப்பட்டுள்ளது. நீங்கள் ஏதேனும் சித்திரவதைக்கான அறிகுறிகளைக் கவனித்தீர்களா?

குற்றப் புலனாய்வுத் திணைக்களத்தின் காவலில் இருந்தபோது எனது கணவர் தொடர்ந்து மனிதாபிமானமற்ற நிலைமைகளுக்கும், தரக்குறைவான உடல் மற்றும் மன ரீதியான நடத்தைகளுக்கும் உள்ளாக்கப்பட்டார்.

அவர் கைது செய்யப்பட்ட நேரத்தில், குடும்பத்தினரால் உணவு வழங்குவதற்கு அனுமதி கோரினோம். ஆனால், பாதுகாப்பு காரணங்களைக் கூறி சிஐடி பணிப்பாளரால் அந்த கோரிக்கை நிராகரிக்கப்பட்டது. அதன் பிறகு, அவருக்கு முறையான உணவு வழங்கப்படவில்லை. வழங்கப்பட்ட உணவும் பெரும்பாலும் சாப்பிட முடியாததாகவே இருந்தது. தரையில் வைக்கப்பட்ட காகிதத்தில் பரிமாறப்பட்ட உணவைச் சாப்பிட வேண்டிய நிலைக்குக் கூட அவர் தள்ளப்பட்டார்.

கைது செய்யப்பட்ட நாளில் வீட்டை விட்டு வெளியேறிய மனிதராக இன்று அவர் இல்லை. அவர் உடல் எடையை பெருமளவில் இழந்துள்ளார், கண்கள் குழி விழுந்துள்ளன, மன ரீதியாகப் பாதிக்கப்பட்டு நம்பிக்கையை இழந்துள்ளார்.

சிஐடியில் இருந்தபோது, எலிகள் நிறைந்த 6×4 அடி அளவுள்ள சிறிய அறையிலேயே அவர் அடைக்கப்பட்டிருந்தார். 24 மணி நேரமும் விளக்குகள் எரியவிடப்பட்டதால் அவருக்கு உறக்கமின்மை ஏற்பட்டது. மேலும் அந்த அறையில் முறையான காற்றோட்ட வசதியும் இல்லை. இரவு 10.00 மணி முதல் காலை 6.00 மணி வரை அவர் கழிவறையைப் பயன்படுத்தக் கடுமையான தடை விதிக்கப்பட்டிருந்தது. இதனால் அவருக்கு மலச்சிக்கல் மற்றும் அது சார்ந்த பிற மருத்துவப் பிரச்சினைகள் ஏற்பட்டன.

வைட்டமின் டி (Vitamin D) குறைபாடு காரணமாக அவர் சூரிய ஒளியில் இருக்க வேண்டும் என்று சட்ட வைத்திய அதிகாரியின் அறிக்கை தெளிவாகப் பரிந்துரைத்திருந்தது. ஆனால் அந்தப் பரிந்துரை ஒருபோதும் நடைமுறைப்படுத்தப்படவில்லை. ஒவ்வொரு நாளும் அறைக்கு வெளியே 30 நிமிடங்கள் உடற்பயிற்சி செய்ய அவருக்கு அனுமதி வழங்குமாறு சிஐடி பணிப்பாளருக்கு அந்த அறிக்கையில் உத்தரவிடப்பட்டிருந்தது. அத்துடன், அவரது நிலையை மேம்படுத்துவதற்காக ஒரு ஊட்டச்சத்து நிபுணரால் (Nutritionist) குறிப்பிட்ட உணவுத் திட்டமும் பரிந்துரைக்கப்பட்டது. இந்த பரிந்துரைகள் எவையும் பின்பற்றப்படவில்லை.

சித்திரவதை குறித்த விவகாரம் சட்ட வைத்திய அதிகாரியின் அறிக்கையில் ஏழுக்கும் மேற்பட்ட வெவ்வேறு பிரிவுகளில் சுட்டிக்காட்டப்பட்டுள்ளது. அவர் தவறு செய்ததற்கான எந்தவொரு நம்பகமான ஆதாரமும் இல்லாத நிலையில், அவர் இத்தகைய நடாத்தைகளுக்கு உள்ளாக்கப்படுவது துரதிர்ஷ்டவசமானது.

வெளிநாட்டில் வசிக்கும், பயணத்தடை விதிக்கப்பட்டுள்ள, கற்பழிப்பு குற்றச்சாட்டு தொடர்பாக திறந்த பிடியாணை (Arrest Warrant) பிறப்பிக்கப்பட்டுள்ள மற்றும் அவரே குற்றவியல் நடவடிக்கைகளை எதிர்கொண்டுள்ள ஒரு புகலிடம் கோருபவர் (Asylum Seeker) சுமத்திய குற்றச்சாட்டுகளின் அடிப்படையிலேயே அவர் கைது செய்யப்பட்டார். சில சிஐடி அதிகாரிகள், எனது கணவரின் புவியியல் இருப்பிடம் மற்றும் காலவரிசைக்கு ஏற்ப அந்த நபரின் முந்தைய வாக்குமூலங்களை மாற்றியமைக்க முயற்சிப்பதாகத் தெரிகிறது. அவ்வாறு செய்வதன் மூலம், அந்த நபரின் நம்பகத்தன்மைக்கு ஈடுசெய்ய முடியாத பாதிப்பு ஏற்பட்டுள்ளது.

கே: அவர் இப்போது பயங்கரவாதத் தடைச் சட்டத்தில் திருத்தம் செய்யக் கோரினாலும், அவரே கடந்த காலங்களில் ஈஸ்டர் ஞாயிறு தாக்குதல்களுடன் தொடர்புடைய சிலரை தடுத்து வைப்பதற்கு இச்சட்டத்தைப் பயன்படுத்தியுள்ளார் அல்லவா? இது குறித்து உங்கள் கருத்து என்ன?

ஈஸ்டர் ஞாயிறு தாக்குதல்கள் நடந்த நேரத்தில் எனது கணவர் இலங்கையில் கூட இல்லை. அவர் இந்தியாவில் இருந்தார். இந்தச் சம்பவங்கள் தொடர்பாக எந்தவொரு தனிநபரையும் தடுத்து வைப்பதற்கு அவர் பயங்கரவாதத் தடைச் சட்டத்தைப் பயன்படுத்தவில்லை.

அவர் பயங்கரவாதத் தடைச் சட்டத்தை முழுமையாக நீக்குமாறு கோரவில்லை. மாறாக, தடுத்து வைக்கப்படுபவர்கள் தான் அனுபவித்ததைப் போன்ற மனிதாபிமானமற்ற நடத்தைகளுக்கு உள்ளாக்கப்படுவதைத் தடுக்கும் வகையில் அச்சட்டம் திருத்தப்பட வேண்டும் என்றே அவர் கோருகிறார்.

மேலும், தற்போதைய விசாரணை மிகவும் ஒருதலைப்பட்சமாக மாறிவிட்டதால், இந்த விசாரணையை தற்போதைய சிஐடி பணிப்பாளரின் பொறுப்பில் இருந்து பொலிஸ் திணைக்களத்தின் கீழ் உள்ள மற்றொரு புலனாய்வுப் பிரிவுக்கு மாற்றுமாறும் எனது கணவர் கோரியுள்ளார். அத்துடன், தம்மைக் சிஐடி காவலில் இருந்து சிறைக்காவலுக்கு மாற்றுமாறும் அவர் கோரிக்கை விடுத்துள்ளார்.

கே: இது ஒரு வகையான அரசியல் பழிவாங்கல் என்று நீங்கள் நினைக்கிறீர்களா?

இது அரசியல் பழிவாங்கலை விட தனிப்பட்ட பழிவாங்கல் என்றே நான் நம்புகிறேன். ஷானிக்கு சுரேஷ் மீது தனிப்பட்ட வஞ்சம் இருப்பதாகத் தெரிகிறது.

சமூக ஊடகங்களில் பரவி வரும் ஒலிப்பதிவுகளும், நீதிமன்றத்தில் அரசாங்கத் தரப்பால் முன்வைக்கப்பட்ட சமர்ப்பணங்களும் அந்த எண்ணத்தையே தோற்றுவிக்கின்றன. “ஷானியால் பத்து மாதங்கள் விளக்கமறியலில் இருக்க முடியும் என்றால், இவரால் ஏன் முடியாது?” என்று அரசாங்கத் தரப்பு சட்டத்தரணி பகிரங்க நீதிமன்றத்தில் கூறியதாகத் தெரிகிறது. எங்கள் பார்வையில், அந்த அறிக்கை எனது கணவர் மீதான தனிப்பட்ட குறையைத் தெளிவாகப் பிரதிபலிக்கிறது.

சிஐடி காவலில் இருந்தபோது சுரேஷிடம் வழக்கமான முறையில் விசாரணைகள் நடத்தப்படவில்லை என்பதும் குறிப்பிடத்தக்கது. மாறாக, முன்கூட்டியே தீர்மானிக்கப்பட்ட ஒரு கதைக்கு இணங்க அவரை ஒப்புதல் வாக்குமூலம் அளிக்க வைக்கும் முயற்சியாக, அவர் தொடர்ந்து துன்புறுத்தல்களுக்கும் மோசமான நடத்தைகளுக்கும் உள்ளாக்கப்பட்டு தடுத்து வைக்கப்பட்டுள்ளார்.

விசாரணைகளுக்கு இடையிலான இடைவெளி பெரும்பாலும் மூன்று வாரங்கள் வரை நீண்டதாக இருந்தது. அவர் இப்போது தோராயமாக 105 நாட்களாகத் தடுத்து வைக்கப்பட்டுள்ளார். இக்காலப்பகுதியில், அவரது உடல்நிலை மோசமடைந்து வருவதைக் கருத்திற் கொண்டு, நீடிக்கப்பட்ட தடுப்புக் காவல் உத்தரவை ரத்து செய்யுமாறு கோரி நான் ஜனாதிபதிக்கு இருமுறை கடிதம் எழுதியுள்ளேன்.

கே: ஈஸ்டர் ஞாயிறு தாக்குதல்களில் உங்கள் கணவருக்குத் தொடர்பு இருப்பதாகக் கூறப்படும் குற்றச்சாட்டுகள் காரணமாக அவர் தடுத்து வைக்கப்பட்டுள்ளார். இந்தக் குற்றச்சாட்டுகள் உங்களுக்கு எத்தகைய உணர்வை ஏற்படுத்துகின்றன?

தாக்குதல்கள் நடந்தபோது எனது கணவர் நாட்டில் கூட இல்லை; அவர் இந்தியாவில் இருந்தார்.

ஈஸ்டர் தாக்குதல்களுக்குப் பொறுப்பானவர்களைக் கண்டறிந்து தண்டிப்பதாகக் கூறிக்கொண்டே ஜனாதிபதி திஸாநாயக்க ஆட்சிக்கு வந்தார். தாக்குதல்கள் நடந்த நேரத்தில், ஷானி அபேசேகர மற்றும் ரவி செனவிரத்ன ஆகியோர் முறையே சிஐடியின் பணிப்பாளராகவும் சிரேஷ்ட பிரதிப் பொலிஸ் மா அதிபராகவும் (SDIG) பதவி வகித்தனர்.

அமெரிக்காவின் எஃப்.பி.ஐ (FBI), அவுஸ்திரேலிய கூட்டாட்சி பொலிஸ் மற்றும் பல ஜனாதிபதி விசாரணை ஆணைக்குழுக்கள் நடத்திய விசாரணைகளில் சுரேஷின் பெயர் எங்கும் குறிப்பிடப்படவில்லை.

இருப்பினும், அரசாங்கத்தால் நியமிக்கப்பட்ட விசாரணைக்குழு ஒன்று, தாக்குதல்களைத் தடுப்பதற்கான நடவடிக்கை எடுக்கத் தவறியமைக்காக ஷானி அபேசேகர மற்றும் ரவி செனவிரத்ன ஆகியோர் மீது குற்றம் சுமத்தியதுடன், அவர்களுக்கு எதிராக சட்ட நடவடிக்கை எடுப்பதைக் பரிசீலிக்குமாறும் பரிந்துரைத்திருந்தது.

எனவே, அந்தச் சம்பவங்களைக் கையாண்ட விதம் குறித்து விமர்சிக்கப்பட்ட நபர்களிடமே தற்போது விசாரணையை நடத்தும் பொறுப்பு ஒப்படைக்கப்பட்டுள்ளது. எங்கள் பார்வையில், இது முன்னோடியில்லாத ஒன்றாகும்.

கற்பழிப்பு குற்றச்சாட்டை எதிர்கொண்டுள்ள மற்றும் திறந்த பிடியாணை பிறப்பிக்கப்பட்டுள்ள ஒரு புகலிடம் கோருபவரிடம் வாக்குமூலம் பெறுவதற்காக சிஐடி பணிப்பாளர் ஏன் வெளிநாடு செல்ல வேண்டும்? இதுதான் இந்த சூழ்நிலையின் முரண்பாடாகும்.

சட்டப்பூர்வமான எந்தவொரு விசாரணைக்கும் நாங்கள் எதிரானவர்கள் அல்ல. சுரேஷ் மனிதாபிமானத்துடன் நடத்தப்பட வேண்டும் மற்றும் சட்டத்தால் உத்தரவாதம் அளிக்கப்பட்ட பாதுகாப்புகள் அவருக்கு வழங்கப்பட வேண்டும் என்பதே எங்களது நிலைப்பாடு.

கே: ஆனால் ஈஸ்டர் தாக்குதல் குறித்து சுயாதீன விசாரணை நடத்தப்படும் என்று ஜனாதிபதி திஸாநாயக்க கூறியிருந்தாரே…

எங்கள் பார்வையில், இது ஒரு சுயாதீனமான விசாரணையாகத் தெரியவில்லை. மாறாக, இது அரசியல் ரீதியாகத் தூண்டப்பட்டதாகவே தோன்றுகிறது.

விசாரணைக்கு தலைமை தாங்கும் சிஐடி பணிப்பாளர், அரசியல் செல்வாக்கிற்கு உட்பட்டவர் என்றே பலரால் கருதப்படுகிறார். மேலும், இந்த வழக்குக்கு நியமிக்கப்பட்டுள்ள விசாரணை அதிகாரி, சிஐடி பணிப்பாளரின் முன்னாள் அறைத் தோழர் (Cellmate) என்றும் கூறப்படுகிறது.

ஈஸ்டர் ஞாயிறு விசாரணைகள் குறித்து ஜனாதிபதி சில வாக்குறுதிகளை அளித்துள்ளார், மேலும் வெளிப்புற செல்வாக்குகள் மற்றும் எதிர்பார்ப்புகள் குறித்துப் பரவலான வதந்திகள் உள்ளன. இதன் விளைவாக, உண்மைகளைக் கண்டறிவதில் மட்டும் கவனம் செலுத்துவதற்குப் பதிலாக, தாக்குதல்களுக்கு யாரையாவது பொறுப்பாக்க வேண்டும் என்ற அழுத்தம் இருப்பதாகத் தெரிகிறது.

கே: அப்படியென்றால், ஈஸ்டர் தாக்குதலில் பாதிக்கப்பட்டவர்கள் மற்றும் உயிர் பிழைத்தவர்களின் குடும்பங்களை அவர் ஏமாற்றுகிறார் என்று அர்த்தமா?

நிச்சயமாக அது அப்படித்தான் எங்களுக்குத் தோன்றுகிறது. இது குறித்து பல வதந்திகளும் பொது விவாதங்களும் எழுந்துள்ளன.

எங்கள் கருத்துப்படி, பாதிக்கப்பட்டவர்களின் குடும்பங்களும் உயிர் பிழைத்தவர்களும் தவறாக வழிநடத்தப்படுகிறார்கள். தாக்குதல்களுக்குப் பிறகு நாட்டிற்குள் வந்த உதவிகள் மற்றும் நிதிகள் குறித்தும், அவை எவ்வாறு பயன்படுத்தப்பட்டன என்பது குறித்தும் கேள்விகள் எழுப்பப்பட்டுள்ளன. இது தொடர்பாக முன்மொழியப்பட்ட சில விசாரணைகள் ஒருபோதும் நடக்கவே இல்லை.

இதன் விளைவாக, ஈஸ்டர் ஞாயிறு பேரழிவு என்பது உண்மையை நிலைநாட்டுவதற்காக மட்டுமே விசாரிக்கப்படுவதற்குப் பதிலாக, ஒரு அரசியல் கருவியாகப் பயன்படுத்தப்படுகிறது என்றே தோன்றுகிறது.

கே: முன்னாள் ஜனாதிபதி கோட்டாபய ராஜபக்ஷவிடம் அவர் நெருக்கமாக இருந்ததாகவும், அவரது அறிவுறுத்தலின் பேரிலேயே செயற்பாடுகளை முன்னெடுத்ததாகவும் கூறப்படும் குற்றச்சாட்டுகள் குறித்து உங்கள் பதில் என்ன?

சுரேஷ் ஐந்து வெவ்வேறு ஜனாதிபதிகளின் கீழ் பணியாற்றியுள்ளார். அவர் நாட்டிற்குச் சேவை செய்வதற்காகத் தனது வாழ்க்கையை அர்ப்பணித்த ஒரு நம்பகமான மற்றும் அர்ப்பணிப்புள்ள அதிகாரி ஆவார். இலங்கையின் புலனாய்வுக் கட்டமைப்பிற்குள் மிகவும் அனுபவம் வாய்ந்த அதிகாரிகளில் ஒருவராக அவர் பரவலாகக் கருதப்பட்டார்.

அவர் தனது பணி, தொழில்முறை மற்றும் பகுப்பாய்வுத் திறன்கள் மூலம் அங்கீகாரத்தைப் பெற்றார். 2006 மற்றும் 2009 ஆம் ஆண்டுகளுக்கு இடையில் நாங்கள் பிரான்சில் வாழ்ந்தோம். அக்காலப்பகுதியில், பல முன்னாள் எல்.டி.டி.ஈ (LTTE) உறுப்பினர்களை நீதிமன்றத்தின் முன் நிறுத்துவதில் அவர் முக்கிய பங்கு வகித்தார், இது ஒரு ஐரோப்பிய அதிகார வரம்பில் (Jurisdiction) மைல்கல் சாதனையாகக் கருதப்படுகிறது.

அவர் எப்போதும் தனது தொழில்முறை சாதனைகளுக்காகவே அங்கீகரிக்கப்பட்டார், மேலும் அவர் ஒருபோதும் யாருடைய கைக்கூலியாகவும் (Henchman) இருக்கவில்லை. அவர் விசாரணைகளுக்குப் பயந்தவர் அல்ல. எங்களைக் கவலையடையச் செய்வது என்னவென்றால், அவர் நடத்தப்படும் மனிதாபிமானமற்ற விதமும், இந்த விசாரணை ஒருதலைப்பட்சமாக நடத்தப்படும் முறையுமே ஆகும்.

கே: சுரேஷ் சலேயை விடுதலை செய்யக் கோரியும், விசாரணை அதிகாரியாக இருக்கும் ஷானி அபேசேகரவை நீக்கக் கோரியும் பல முக்கிய எதிர்க்கட்சி அரசியல்வாதிகள் சத்யாகிரகப் போராட்டத்தை நடத்தினர். அவரது தடுப்புக்காவலை அவர்கள் அரசியல் லாபத்திற்காகப் பயன்படுத்துகிறார்கள் என்று நீங்கள் நினைக்கவில்லையா?

விவகாரத்தை நடுநிலையாகப் பார்த்தால், அந்த அரசியல்வாதிகள் பல்வேறு அரசியல் கட்சிகளையும் கொள்கைகளையும் பிரதிநிதித்துவப்படுத்துகிறார்கள். சுரேஷ் இந்த நாட்டிற்குப் பல தசாப்தங்களாக ஆற்றிய சேவையை அவர்களில் பலர் அறிவார்கள்.

அவர் அங்கீகாரத்தையோ வெகுமதியையோ எதிர்பார்க்காமல் தேசிய நலனுக்காக அயராது உழைத்தார். தனது இராணுவ வாழ்க்கையின் நெடுகிலும் அவர் களங்கமற்ற சேவைப் பதிவைப் பேணி வந்தார்.

இருப்பினும், இன்று அவருக்கு எதிராக முற்றிலும் அடிப்படையற்றவை என்று நாங்கள் நம்பும் குற்றச்சாட்டுகளை உருவாக்கி பரப்புவதற்கே முயற்சிகள் மேற்கொள்ளப்பட்டு வருகின்றன.

கே: அவரைத் தொடர்ந்து பார்வையிடுவதற்கு அனுமதிக்குமாறு குடும்பத்தினர் கோரிக்கை விடுத்திருந்தனர். அரசாங்கம் பதிலளித்துள்ளதா?

எங்களுக்கு எழுத்துப்பூர்வமான பதில் எதுவும் கிடைக்கவில்லை. எவ்வாறாயினும், குடும்பத்தினர் ஒவ்வொரு நாளும் பதினைந்து நிமிடங்கள் அவரைப் பார்வையிட அனுமதிக்கப்படுவார்கள் என்று வாய்மொழியாகத் தெரிவிக்கப்பட்டது.

ஆனால், அவரது சட்டத்தரணிக்கு புதன்கிழமைகளில் மட்டுமே அனுமதி வழங்கப்படுகிறது. இது அநீதியானது என்று நாங்கள் நம்புகிறோம், ஏனெனில் அவர் தனது பாதுகாப்பைத் தயாரிப்பதற்கும் தனது உரிமைகளைப் பாதுகாப்பதற்கும் வழக்கமான சட்ட ஆலோசனைகளையும் ஆதரவையும் பெற வேண்டியது அவசியமாகும்.

கே: அரசாங்கத்திற்கும் பொதுமக்களுக்கும் நீங்கள் கூறும் செய்தி என்ன?

ஈஸ்டர் ஞாயிறு தாக்குதல்களின் பின்னணியில் இருக்கும் சூத்திரதாரி சுரேஷ் தான் என்ற பொதுப் பிம்பத்தை உருவாக்குவதற்காக திட்டமிட்ட பிரச்சாரமொன்று முன்னெடுக்கப்பட்டு வருகிறது.

இந்தப் பிரச்சாரத்தை முன்னெடுப்பதில் ஈடுபட்டுள்ள பலரது சுயவிவரங்கள் (Profiles) மற்றும் தொடர்புகளை ஆராயும்போது, அவர்களில் கணிசமான எண்ணிக்கையிலானவர்கள் தற்போதைய அரசியல் கட்டமைப்போடு இணைந்திருப்பது தெளிவாகிறது. இது எங்களுக்குப் பெரும் கவலையளிக்கிறது.

எந்தவொரு நீதிமன்றமும் அவரை குற்றவாளி என்று தீர்ப்பளிக்காத போதிலும், பல சமூக ஊடகப் பயனர்கள் பொதுமக்களின் கருத்துமன்றத்தில் ஏற்கனவே அவரை குற்றவாளியாக்கிவிட்டனர்.

அரசாங்கம் உண்மையாகவே உண்மையைக் கண்டறிய விரும்பினால், அது எஃப்.பி.ஐ இன் மேலதிக உதவியைக் கோரலாம் அல்லது ஜனாதிபதி விசாரணை ஆணைக்குழு அறிக்கைகளின் கண்டுபிடிப்புகளை மறுபரிசீலனை செய்யலாம்.

ஒரு நிரபராதி என்று நாங்கள் நம்பும் ஒருவரை மனிதாபிமானமற்ற முறையில் நடத்துவதை நிறுத்துமாறும், இந்த விசாரணையை வேறு ஒரு புலனாய்வுப் பிரிவுக்கு மாற்றுமாறும் நாங்கள் அதிகாரிகளைக் கேட்டுக்கொள்கிறோம். சுரேஷ் இன்னும் குற்றச்சாட்டுகள் சுமத்தப்பட்ட ஒரு கைதி மட்டுமே; அவர் எந்தக் குற்றத்திற்காகவும் தண்டிக்கப்படவில்லை.

முடிவுகளுக்கு வருவதற்கு முன் அரசாங்கம் உண்மையை நிலைநாட்ட வேண்டும். உலகின் பெரும்பாலான பகுதிகளில், ஒருவர் குற்றவாளி என்று நிரூபிக்கப்படும் வரை அவர் நிரபராதியாகவே கருதப்படுவார். துரதிர்ஷ்டவசமாக, இன்றைய இலங்கையில், ஒருவரது குற்றமும் நிரபராதமும் ஆட்சியில் உள்ளவர்கள் பொதுமக்கள் எதை நம்ப வேண்டும் என்று விரும்புகிறார்களோ, அதைப்பொறுத்தே அமைகிறது.