நிதித் தூய்தாக்கல் மற்றும் பயங்கரவாதத்துக்கு நிதியளிப்பதைத் தடுக்கும் (AML/CFT) சர்வதேச தரநிலைகள் தொடர்பான இலங்கையின் மூன்றாவது பரஸ்பர மதிப்பீட்டுக்கான தயார்நிலை குறித்த விசேட கலந்துரையாடல், ஜனாதிபதி அநுரகுமார திசாநாயக்க தலைமையில் ஜனாதிபதி செயலகத்தில் இன்று முற்பகல் நடைபெற்றது.
எதிர்வரும் 26 ஆம் திகதி முதல் நவம்பர் 06 ஆம் திகதி வரை நடைபெறவுள்ள இந்த மூன்றாவது பரஸ்பர மதிப்பீட்டிற்காக, அமைச்சுக்கள் மற்றும் நிறுவன மட்டங்களில் பரிந்துரைகள் மற்றும் செயல்திட்டங்களை நடைமுறைப்படுத்துவதில் எட்டப்பட்டுள்ள முன்னேற்றங்கள் குறித்து இதன்போது விரிவாக மீளாய்வு செய்யப்பட்டது.
இங்கு உரையாற்றிய ஜனாதிபதி, நாடு எதிர்கொண்டுள்ள அபாயங்களைக் குறைப்பதற்குத் தேவையான சட்ட ஏற்பாடுகள் மற்றும் நிறுவன ரீதியான மறுசீரமைப்புகளை மேற்கொள்வது வெளித்தரப்பினரின் அழுத்தங்களுக்காக அல்லாமல், நமது நாட்டின் சொந்த நிறுவனக் கட்டமைப்பின் நன்மைக்காகவே செய்யப்பட வேண்டும் என வலியுறுத்தினார்.
இச்செயற்பாடுகளை நிறைவேற்றுவதில் ஏதேனும் குறைபாடுகள் அல்லது தாமதங்கள் இருப்பின் அவற்றை உடனடியாகத் திருத்தி, எதிர்வரும் 3 வாரங்களுக்குள் அரசாங்கமும் நிறுவன கட்டமைப்பும் முழுமையான அர்ப்பணிப்புடன் செயற்பட வேண்டும் என்றும் அவர் உத்தரவிட்டார்.
இலங்கை மத்திய வங்கியின் நிதி உளசவறிதல் பிரிவினால் ஒருங்கிணைக்கப்படும் இந்தச் செயன்முறையில், தொழில்நுட்ப இணக்கப்பாடு மற்றும் செயல்திறன் குறித்த விபரங்கள் ஜனாதிபதியிடம் தெளிவுபடுத்தப்பட்டன.
குறிப்பாக, குற்றச் செயல்கள் மூலம் ஈட்டப்பட்ட சொத்துக்கள் தொடர்பான சட்டத்தைச் செயற்பாட்டு நிலைக்குக் கொண்டுவருதல், கம்பனிச் சட்டம் மற்றும் அதன் செயற்பாடுகள், நம்பிக்கைப் பொறுப்பு கட்டளைச் சட்டத்தைத் திருத்துதல் போன்ற முக்கிய நடவடிக்கைகள் தொடர்பாகவும் இதன்போது ஆழமாக ஆராயப்பட்டது.
சர்வதேச நிதிக்கட்டமைப்பில் இலங்கையின் நம்பகத்தன்மையை உறுதிப்படுத்தும் இந்த மதிப்பீட்டுச் செயன்முறையை வெற்றிகரமாக்குவதற்கு அனைத்து அரச மற்றும் தனியார் துறை நிறுவனங்களின் தீவிரப் பங்களிப்பு அவசியம் எனச் சுட்டிக்காட்டிய ஜனாதிபதி, இதுவரை இப்பணிகளில் அர்ப்பணிப்புடன் செயற்பட்ட இலங்கை மத்திய வங்கி உள்ளிட்ட அனைத்துத் தரப்பினருக்கும் தனது நன்றியைத் தெரிவித்தார்.
இந்தக் கலந்துரையாடலில் டிஜிட்டல் பொருளாதார பிரதி அமைச்சர் பொறியியலாளர் எரங்க வீரரத்ன, மத்திய வங்கி ஆளுநர் கலாநிதி நந்தலால் வீரசிங்க, நிதி அமைச்சின் செயலாளர் கலாநிதி ஹர்ஷண சூரியப்பெரும, பாதுகாப்பு அமைச்சின் செயலாளர், நீதி அமைச்சின் செயலாளர், சட்டமா அதிபர் மற்றும் பொலிஸ்மா அதிபர் உள்ளிட்ட சிரேஷ்ட அதிகாரிகள் பலரும் கலந்துகொண்டனர்.
