சென்னை:

அதிமுக அளித்த குதிரை பேரப் புகார் குறித்த கேள்விக்கு அமைச்சர் செங்கோட்டையன் விளக்கம் அளித்துள்ளார். 15 எம்.எல்.ஏ.க்கள் தவெகவுக்கு வருவார்கள் என்று யாரையும் குறிப்பிட்டுக் கூறவில்லை என்று அவர் தெரிவித்துள்ளார்.

பின்னணி என்ன?:

தமிழக சட்டமன்றத் தேர்தலுக்குப் பிறகு, அதிமுகவைச் சேர்ந்த முன்னாள் அமைச்சர்கள் உட்பட 6 சட்டமன்ற உறுப்பினர்கள் தங்கள் பதவிகளை ராஜினாமா செய்துவிட்டு, முதலமைச்சர் விஜய் தலைமையிலான தவெகவில் இணைந்தனர். சமீபத்தில் நடந்த இடைத்தேர்தலில் மரகதம் குமரவேல், சத்தியபாமா ஆகிய இருவரும் தவெக சார்பில் போட்டியிட்டு வெற்றி பெற்றனர். இந்நிலையில், மேலும் 15 பேர் தவெகவில் இணையத் தயாராக உள்ளனர் என்று அமைச்சர் செங்கோட்டையன் கூறியது அதிமுகவினரிடையே சலசலப்பை ஏற்படுத்தியது. செங்கோட்டையன் குதிரை பேரத்தை ஊக்குவிப்பதாகக் குற்றம் சாட்டி, அதிமுக சார்பில் தமிழ்நாடு ஆளுநர் அர்லேகரிடம் புகார் அளிக்கப்பட்டது. இந்தப் புகார் தமிழக அரசியலில் பெரும் விவாதத்தைக் கிளப்பியது.

யாரையும் குறிப்பிடவில்லை:

இந்நிலையில், அதிமுக அளித்த புகார் குறித்து செய்தியாளர்கள் கேள்வி எழுப்பினர். அதற்குப் பதிலளித்த அமைச்சர் செங்கோட்டையன், அதிமுகவிலிருந்து சட்டமன்ற உறுப்பினர்கள் தவெகவுக்கு வருவார்கள் என்ற கருத்தைத் தான் கூறவில்லை என்றார். 15 பேர் வருவார்கள் என்று மட்டுமே கூறினேன், யாரையும் குறிப்பிட்டுச் சொல்லவில்லை. எனவே, கூறப்பட்ட கருத்துகளைத் தெளிவாகத் தெரிந்துகொண்ட பிறகே புகார் மனு அளிக்க வேண்டும் என்று அவர் அதிமுகவுக்கு அறிவுறுத்தினார்.

குதிரை பேரத்திற்கு வழியில்லை:

இது குதிரை பேரம் என்றால், இன்று மதிமுகவிலிருந்து இரண்டு பேர் திமுகவில் இணைந்துள்ளனர், அதற்கு என்ன பெயர் என்று அவர் கேள்வி எழுப்பினார். எடப்பாடி பழனிசாமி அதிமுக பொதுச் செயலாளராக இருக்கும்போதும், முன்னாள் முதலமைச்சர் ஜெயலலிதா ஆட்சிக் காலத்திலும், பல தலைவர்கள் பிற இயக்கங்களிலிருந்து அதிமுகவுக்கும், அதிமுகவிலிருந்து பிற இயக்கங்களுக்கும் சென்று தேர்தலைச் சந்தித்தது வழக்கமான நடைமுறைதான். இதில் குதிரை பேரத்திற்கு வழியே இல்லை என்று அவர் வாதிட்டார். உலகை யார் வேண்டுமானாலும் வெல்லலாம், ஆனால் காலத்தை யாராலும் வெல்ல முடியாது. காலம் என்ற புள்ளியில் யாராலும் கோலம் போட முடியாது என்று அவர் திட்டவட்டமாகத் தெரிவித்தார். கட்சி மாறுவது அரசியலில் வழக்கமான ஒன்றுதான் என்றும், அதற்குக் குதிரை பேரம் என்று பெயர் சூட்டுவது சரியல்ல என்றும் அவர் தனது பதிலில் வலியுறுத்தினார். அமைச்சரின் இந்தப் பதில் அரசியல் வட்டாரத்தில் பெரும் கவனம் பெற்றுள்ளது.

#Sengottaiyan #TVK #AIADMK #HorseTrading #TNPolitics #BmNews #TamilNews #BreakingNews #LatestNews #TamilNewsLive