தற்போதைய கல்விச் சீர்திருத்தங்கள் மக்களின் அல்லது மாணவர்களின் நலனுக்காக முன்னெடுக்கப்படவில்லை என்றும், ஆசிய அபிவிருத்தி வங்கியிடம் பெறப்பட்ட கடன் நிபந்தனைகளை நிறைவேற்றுவதற்காகவே அரசாங்கம் இவற்றை அவசர அவசரமாக நடைமுறைப்படுத்த முயல்கிறது என்று ஆசிரியர் சங்கத்தின் பொதுச்செயலாளர் ஜோசப் ஸ்டாலின் தெரிவித்தார்.

செவ்வாய்க்கிழமை (29) நடைபெற்ற அமைச்சரவை ஊடகச் சந்திப்பில் கல்வி சீர்திருத்தங்கள் தொடர்பாக கருத்து தெரிவித்த கல்வி அமைச்சரின் உரையைத் தொடர்ந்து, அதற்கு பதிலளிக்கும் வகையில் நேற்று ஊடகங்களுக்கு கருத்து தெரிவிக்கும்போதே அவர் மேற்கண்டவாறு குறிப்பிட்டார்.

அங்கு அவர் மேலும் தெரிவிக்கையில்,

தற்போதைய அரசாங்கம் நடைமுறைப்படுத்த தீர்மானிக்கப்பட்டிருக்கும் கல்வி சீர்திருத்தங்கள் யாவும் 2019 மற்றும் 2023 ஆம் ஆண்டுகளில் கடந்த அரசாங்கத்தால் திட்டமிடப்பட்டவையே தவிர, தற்போதைய ஆட்சியாளர்களின் சொந்தக் தொலைநோக்குத் திட்டங்கள் அல்ல, ஆரம்பத்தில் இத்திட்டங்களுக்குக் கடும் எதிர்ப்புத் தெரிவித்த தற்போதைய அரசாங்கம், இப்போது ஆசிய அபிவிருத்தி வங்கியின் கடன் நிபந்தனைகளுக்காகவே இவற்றை அவசர அவசரமாக அமல்படுத்த முயல்கிறது.

மேலும், 1, 6 மற்றும் 10 ஆம் வகுப்புகளுக்கு இச்சீர்திருத்தங்களை நடைமுறைப்படுத்தத் திட்டமிட்டும், போதிய முன்பயிற்சிகளோ திட்டமிடல்களோ இல்லாத காரணத்தினால் 6 மற்றும் 10 ஆம் வகுப்புகளுக்கான நடவடிக்கைகள் நிறுத்தப்பட்டு, 1 ஆம் வகுப்புக்கு மட்டும் தொடங்கப்பட்டுள்ளதுடன், அவ்வகுப்பிற்கான ஆசிரியர் வழிகாட்டிப் புத்தகங்கள் கூட இன்னும் அச்சிட்டு வழங்கப்படவில்லை. இத்தகைய முறையற்ற நிர்வாகத்தினாலும், அச்சிடப்பட்ட புத்தகங்களை இரத்து செய்ததனாலும் கடந்த ஆண்டில் மட்டும் 278 மில்லியன் ரூபா மக்களுடைய வரிப்பணம் வீணடிக்கப்பட்டுள்ளதாகத் தேசிய தணிக்கை அலுவலக அறிக்கை சுட்டிக்காட்டியுள்ளதை அவர் சுட்டிக்காட்டினார்.

அத்துடன்,அரசாங்கம் தற்போது முன்னெடுத்து வரும் சிறிய பாடசாலைகளை மூடும் முயற்சி மாணவர்களின் அடிப்படை உரிமையாகக் கருதாமல், ஒரு வணிக முதலீடாக அரசாங்கம் பார்ப்பதே இத்தகைய முடிவுகளுக்குக் காரணம். கடந்த காலத்தில் சிறிய பாடசாலைகளை மூடுவதற்கு எதிராகப் போராட்டம் நடத்திய அதே நபர்கள் மற்றும் அமைப்புகள், இன்று அதிகாரத்திற்கு வந்ததும் சர்வதேச நாணய நிதியத்தின் தேவைகளுக்காகப் பாடசாலைகளை மூடுவதற்கு ஆதரவாக இரட்டை நிலைப் பாட்டை வகிக்கிறது.

கிராமப்புறச் சிறிய பாடசாலைகளில் அர்ப்பணிப்புடன் பணியாற்றும் ஆசிரியர்களால் தரம் 5 புலமைப்பரிசில் பரீட்சைகளில் பெருமளவிலான மாணவர்கள் சாதனைகளைச் செய்து வரும் வேளையில், அந்தப் பாடசாலைகளை மூடி மாணவர்களைப் பேருந்துகளில் வேறு இடங்களுக்கு அனுப்புவது எளிய தீர்வாகாது, மாறாக அப்பாடசாலைகளைக் கட்டமைப்பு ரீதியாக மேம்படுத்துவதே அரசாங்கத்தின் கடமையாகும். தற்போதைய சீர்திருத்தங்கள் டியூஷன் மாஃபியா, பல்கலைக்கழக சேர்க்கைக்கான தீவிர போட்டி, பாடசாலை சேர்க்கை சிக்கல்கள் அல்லது ஆங்கில வழி கல்விக்கான தேவை போன்ற உண்மையான கல்வித்துறைப் பிரச்சினைகள் எதற்கும் தீர்வை வழங்கவில்லை என்பதால், இத்திட்டங்களால் மக்களுக்கு எந்தப் பலனும் கிடைக்கப்போவதில்லை என்றார்.