விமான எரிபொருளின் (Jet fuel) விலை கணிசமாக அதிகரித்துள்ளதைக் கருத்தில் கொண்டு, இந்த கோடைகாலத்தில் நான்கு பருவகால (Seasonal) விமான சேவைகளைத் திட்டமிட்டதை விட முன்னதாகவே நிறுத்தவுள்ளதாக ஏர் கனடா (Air Canada) உறுதிப்படுத்தியுள்ளது.

இதன்படி, பின்வரும் வழித்தடங்களுக்கான விமான சேவைகள் பாதிக்கப்படும் என அந்த நிறுவனத்தின் ஊடகப் பேச்சாளர் தெரிவித்துள்ளார்:

• டொராண்டோ முதல் சேக்ரமெண்டோ வரை (Toronto to Sacramento): கடைசி விமானம் ஆகஸ்ட் 1 அன்று பயணிக்கும்.

• வான்கூவர் முதல் ராலி வரை (Vancouver to Raleigh): கடைசி விமானம் ஜூலை 29 அன்று பயணிக்கும்.

• டொராண்டோ முதல் சார்லஸ்டன் வரை (Toronto to Charleston): கடைசி விமானம் செப்டம்பர் 6 அன்று பயணிக்கும்.

• மொன்றியல் முதல் ஆஸ்டின் வரை (Montreal to Austin): கடைசி விமானம் செப்டம்பர் 7 அன்று பயணிக்கும்.

இந்த வழித்தடங்களுக்கான முழுமையான சேவைகள் மீண்டும் 2027-ஆம் ஆண்டு கோடைகாலத்தில் ஆரம்பிக்கப்படும் என எதிர்பார்க்கப்படுகிறது.

ஈரான் போர் தொடங்கியதில் இருந்து விமான எரிபொருளின் விலை இரண்டு மடங்குக்கும் மேலாக அதிகரித்துள்ளது. இதன் காரணமாகவே இந்தத் தீர்மானம் எடுக்கப்பட்டுள்ளதாக நிறுவனம் தெரிவித்துள்ளது. பாதிக்கப்பட்ட வாடிக்கையாளர்களுக்கு மாற்றுப் பயண ஏற்பாடுகள் அல்லது முழுமையான பணத்தைத் திரும்பப் பெறுதல் (Full refund) போன்ற விருப்பங்கள் வழங்கப்படும் எனத் தெரிவிக்கப்பட்டுள்ளது.

ஏற்கனவே கடந்த மாதம், ஜூன் 1 முதல் அக்டோபர் 25 வரை நியூயார்க்கின் ஜே.எஃப்.கே (JFK) விமான நிலையத்திற்கான சேவைகளை ஏர் கனடா இடைநிறுத்தியிருந்தது. இதேபோல், வெஸ்ட்ஜெட் (WestJet) நிறுவனமும் எரிபொருள் செலவினங்களைச் சமாளிக்க மே மற்றும் ஜூன் மாதங்களில் தனது விமான சேவைகளைக் குறைப்பதாக அறிவித்துள்ளமை குறிப்பிடத்தக்கது.