மதுரை:
மதுரையில் ‘ஜனநாயகம் காப்போம் 2026’ என்ற பெயரில் நடைபெற்ற மாணவர்கள் நாடாளுமன்றம் நிகழ்ச்சியில் விடுதலைச் சிறுத்தைகள் கட்சியின் தலைவர் திருமாவளவன் கலந்து கொண்டு சிறப்புரையாற்றினார். அப்போது அவர் பேசுகையில், தற்போதைய புதிய இளைய தலைமுறையினரான ‘ஜென்-ஸி’ (Gen-Z) தலைமுறையினர் எதை விரும்புகிறார்கள், என்ன மாற்றத்தை விரும்புகிறார்கள் என்பதை முன்கூட்டியே கணிக்கவோ, யூகிக்கவோ முடியவில்லை என்று வியந்து கூறினார்.
தலைவர் ஒருவர் அழைப்பு விடுக்காமலேயே, அமைப்பு ஒன்று உருவாகாமலேயே லட்சக்கணக்கில் திரளும் ஆற்றல் இந்த இளைய சமுதாயத்திற்கு உள்ளதாக அவர் பாராட்டியுள்ளார். இதற்கு உதாரணமாக மெரினாவில் நடந்த ஜல்லிக்கட்டுப் புரட்சியை சுட்டிக்காட்டிய அவர், எந்த ஒரு தலைவரும் அல்லது அமைப்பும் இந்தப் போராட்டத்தை ஒருங்கிணைத்ததாக உரிமை கோர முடியாது என்றும், லட்சக்கணக்கான இளைஞர்கள் அரசைப் பணிய வைத்து ஜல்லிக்கட்டுக்கான உரிமையை வென்றெடுத்தனர் என்றும் பெருமிதத்துடன் கூறினார்.
மேலும், சமீபத்தில் டெல்லியில் நடைபெற்ற மாணவர்களின் நீட் எதிர்ப்புப் போராட்டம் குறித்தும் அவர் பேசினார். உச்சநீதிமன்ற நீதிபதி ஒருவர் வாய் தவறி மாணவர்களைக் ‘கரப்பான்பூச்சிகள்’ என்று விமர்சித்ததைத் தொடர்ந்து, டெல்லியை நோக்கிச் சாரை சாரையாகப் படையெடுத்துத் தலைநகரையே இளைஞர்கள் திணற வைத்தனர். இதன் விளைவாகவே இந்திய அரசு பணிந்து மத்திய கல்வி அமைச்சர் தர்மேந்திர பிரதான் பதவி விலகினார். இது இந்தத் தலைமுறையினர் நிகழ்த்திக் காட்டியிருக்கும் மாபெரும் புரட்சி என்று திருமாவளவன் புகழாரம் சூட்டியுள்ளார்.
#Thirumavalavan #GenZ #StudentsProtest #VCK #Madurai #BmNews #TamilNews #BreakingNewsTN #TamilNaduPolitics #YouthPower #PoliticalUpdate #TamilNewsLive
