இராணுவம், கடற்படை மற்றும் விமானப்படை ஆகிய முப்படைகளைச் சேர்ந்த சிரேஷ்ட அதிகாரிகளின் தனித்துவமான சேவையைப் பாராட்டும் வகையிலான “விசிஷ்ட சேவா விபூஷண” (Vishishta Seva Vibhushana) பதக்கங்கள் வழங்கும் நிகழ்வு, ஜனாதிபதி அநுரகுமார திசாநாயக்க தலைமையில் நேற்று (30) பிற்பகல் ஜனாதிபதி செயலகத்தில் நடைபெற்றது.
குறைந்தது 25 ஆண்டுகள் தொடர்ச்சியான சேவைக்காலமும், நன்மதிப்பும் கொண்ட முப்படைகளில் சேவையாற்றும் மற்றும் ஓய்வுபெற்ற 57 சிரேஷ்ட அதிகாரிகள் ஜனாதிபதியிடமிருந்து இந்தப் பதக்கங்களைப் பெற்றுக்கொண்டனர்.
இந்த நிகழ்வில் உரையாற்றிய ஜனாதிபதி அநுரகுமார திசாநாயக்க, இன்றைய தினம் கௌரவிக்கப்பட்ட முப்படையின் சிரேஷ்ட அதிகாரிகள், இரவென்றும் பகலென்றும் பாராது, காலநிலை மாற்றங்களைப் பொருட்படுத்தாது, உயிராபத்தைப் பற்றிக் கவலைப்படாது நாட்டிற்காகவும் மக்களுக்காகவும் அர்ப்பணிப்புடன் சேவையாற்றியவர்கள் எனக் குறிப்பிட்டார்.
சிக்கலான யுத்த காலங்களிலும் இயற்கைப் பேரிடர்களின்போதும் சாதாரண அரச ஊழியரை விட அதிக அர்ப்பணிப்புடன் செயற்பட்ட இந்த அதிகாரிகளின் வெற்றிக்குப் பின்னால் இருந்து பலமாக இருந்த அவர்களின் மனைவிகளுக்கும் குடும்ப உறுப்பினர்களுக்கும் தமது விசேட நன்றிகளைத் தெரிவிப்பதாக ஜனாதிபதி கூறினார்.
ஒரு அரசாங்கமாக இன்று நாம் எதிர்கொள்ளும் முக்கிய சவால் பலமான அரச சேவை இல்லாமையும், அது குறிப்பிடத்தக்க அளவில் வீழ்ச்சியடைந்துள்ளமையுமே ஆகும் எனச் சுட்டிக்காட்டிய ஜனாதிபதி, நாடு என்ற ரீதியில் முன்னோக்கிச் செல்ல சவால்களை வெற்றிபெறக்கூடிய பலமான அரச சேவை அத்தியாவசியமானது என்றும் வலியுறுத்தினார்.
பல நாடுகள் அபிவிருத்தியடைந்துள்ளமை சட்ட திட்டங்களினால் மட்டுமல்ல, சுய ஒழுக்கத்தினாலுமே ஆகும் எனக் குறிப்பிட்ட அவர், இந்த விருது வெறும் தனிப்பட்ட கௌரவம் மட்டுமல்லாது, சமூகப் பொறுப்பாகக் கருதி பிள்ளைகளுக்கும் அரச சேவைக்கும் முன்மாதிரியாகச் செயற்பட வேண்டும் எனத் தெரிவித்தார்.
இந்த நிகழ்வில் பாதுகாப்புப் பிரதிமைச்சர் மேஜர் ஜெனரல் (ஓய்வுநிலை) அருண ஜயசேகர, ஜனாதிபதியின் செயலாளர் கலாநிதி நந்திக சனத் குமாநாயக்க, பாதுகாப்பு அமைச்சின் செயலாளர் எயார் வைஸ் மார்ஷல் (ஓய்வுநிலை) சம்பத் துய்யகொந்தா மற்றும் முப்படைத் தளபதிகள் உள்ளிட்ட சிரேஷ்ட அதிகாரிகள் பலரும் கலந்துகொண்டனர்.
