இணையவழி கடன்வழங்கும் நிறுவனங்கள் குறித்து இலங்கை குற்றப்புலனாய்வு திணைக்களத்தினர் விசாரணைகளை ஆரம்பித்துள்ளனர்.
அதிக வட்டி,கடனை திருப்பி செலுத்தும் நிபந்தனைகள் குறித்து பொதுமக்கள் வழங்கிய முறைப்பாடுகளை தொடர்ந்து இணையவழி கடன்வழங்கும் நிறுவனங்கள் குறித்து இலங்கை குற்றப்புலனாய்வு திணைக்களத்தினர் விசாரணைகளை ஆரம்பித்துள்ளனர்.
பல உடனடி கடன் சேவைகள் தற்போது சமூக வலைத்தளங்கள் மூலம் விளம்பரப்படுத்தப்படுகின்றன, மேலும் கையடக்க தொலைபேசி செயலிகள் மூலமும் தனிநபர்கள் இணையவழி கடன்களை பெற வழிவகைகள் செய்யப்பட்டுள்ளன.
இவ்வாறான கடன்களை வழங்கும் சில நிறுவனங்கள் கடன்களை பெற்றவர்கள் கடன்களை திருப்பி செலுத்தும்போது அதிக வட்டிவிகிதத்தினை வசூலிக்கின்றன,கடனை திருப்பி செலுத்துவது தாமதமானால் பல்வேறு மனிதாபிமானமற்ற வழிமுறைகளை கையாள்கின்றன என கிடைத்த முறைப்பாடுகளை தொடர்ந்தே குற்றப்புலனாய்வு திணைக்களத்தினர் விசாரணைகளை ஆரம்பித்துள்ளனர்.
இணையவழி கடன்வழங்கும் நிறுவனங்களால் விதிக்கப்படும் நிபந்தனைகள் விதிமுறைகளை புரிந்துகொள்ளாமல் பலர் கடன்களை பெற்றுக்கொண்டுள்ளமை ஆரம்ப கட்ட விசாரணைகளின் போது தெரியவந்துள்ளதாக பொலிஸார் தெரிவித்துள்ளனர்.
