சென்னை:

தவெக ஆட்சியைக் கலைத்தால் அடுத்த நாளே தமிழ்நாட்டில் மாபெரும் பெண்கள் புரட்சி வெடிக்கும் எனப் பொதுப்பணி மற்றும் விளையாட்டு மேம்பாட்டுத் துறை அமைச்சர் ஆதவ் அர்ஜுன் மிகக் கடுமையான எச்சரிக்கை விடுத்துள்ளார்.

மகளிர் திட்டம்:

சென்னை கலைவாணர் அரங்கத்தில் இன்று 1,276 மகளிர் சுய உதவிக் குழுக்களுக்கு 117 கோடி ரூபாய் மதிப்பிலான வங்கி நிதி இணைப்பு வழங்கும் மாபெரும் விழா நடைபெற்றது. இந்த நிகழ்ச்சியில் அமைச்சர் ஆதவ் அர்ஜுன், பள்ளிக்கல்வித்துறை அமைச்சர் ராஜ்மோகன் உள்ளிட்ட பலர் கலந்து கொண்டனர். நிகழ்ச்சியில் பேசிய அமைச்சர் ஆதவ் அர்ஜுன், “தற்போதைய கட்டமைப்புகள் அனைத்தும் ஆண்களை மையப்படுத்தியே இருக்கின்றன. சமையல் என்பது ஆண், பெண் இருவருக்குமான பொதுவாக இருக்க வேண்டும். பெண்களின் உடலைப் பார்த்து விமர்சனம் செய்பவர்களுக்குக் கடுமையான தண்டனை வழங்கப்பட வேண்டும். மதுவை முற்றிலுமாக ஒழிப்பதே அரசின் மாபெரும் நோக்கம்,” என்று அவர் கூறினார்.

பெண்கள் புரட்சி:

தொடர்ந்து அவர், “அமைச்சர்களாக இருக்கும் எங்களுக்கு மதுபான ஆலைகள் இல்லை. மக்களின் வாழ்க்கையை மாற்றுவதற்காகத் தாங்கள் போராடிக் கொண்டிருக்கும் நிலையில், எதிர்க்கட்சிகள் தொடர்ந்து ஊழல் குற்றச்சாட்டுகளை முன்வைத்து வருகிறார்கள். இடைத்தேர்தலில் பணம் கொடுக்காமல் இரண்டு தொகுதிகளிலும் தவெக வெற்றி பெற்றுள்ளது. ஆட்சியைக் கலைத்துப் பாருங்கள், அடுத்த நாளே தமிழ்நாட்டில் மாபெரும் பெண்கள் புரட்சி வெடிக்கும். பெண்கள் சாலைக்கு வந்து நிற்பார்கள். இது விஜய்யின் ஆட்சி அல்ல, பெண்களின் ஆட்சி. ஆட்சியைக் கலைத்துவிடுவார்கள் என்ற பயம் எங்களுக்குச் சிறிதும் இல்லை,” என்று அவர் ஆவேசமாகத் தெரிவித்தார்.

ஊழல் விசாரணை:

தொடர்ந்து செய்தியாளர்களிடம் பேசிய அமைச்சர் ராஜ்மோகன், “பெரியார் நூலகத்தில் சம்பந்தமே இல்லாத புத்தகங்கள், சரியான விதிமுறைகளைப் பின்பற்றாமல் அதிக விலை கொடுத்து வாங்கியிருப்பதாக எழுத்தாளர் பெருமாள் முருகன் சுட்டிக்காட்டி இருந்தார். உடனே இது குறித்துத் துரிதமாக விசாரிக்கப்பட்டதில் கடந்த திமுக ஆட்சியில் இந்த மாபெரும் ஊழல் நடந்திருப்பது அப்பட்டமாகத் தெரிய வந்திருக்கிறது. இந்த ஊழல் குறித்து முறைப்படி முழுமையான விசாரணை நடத்த உத்தரவிடப் போகிறோம். பெரியார் பெயரில் இப்படி ஒரு ஊழல் செய்திருப்பது மிகவும் கண்டிக்கத்தக்கது. தமிழ்நாட்டில் நிறைய நூலகங்களைக் கட்டினது நாங்கள் தான் என்பது போன்று தமிழ்நாட்டில் நிறைய ஊழல் செய்ததும் நாங்கள் தான் என்பதையே திமுக நிரூபித்துள்ளது,” என்று அவர் கடுமையாகச் சாடினார்.

#AadhavArjuna #TVK #WomensRevolution #CMVijay #BmNews #TamilNews #BreakingNews #LatestNews #TamilNewsLive