சென்னை:
“முன்னாள் அமைச்சர் சி.வி.சண்முகம் வெறும் அமைச்சர் பதவி என்ற சுகத்தைப் பெறுவதற்காக, ஜெயலலிதா வளர்த்த அதிமுக இயக்கத்தையே திட்டமிட்டு அழித்துக் கொண்டிருக்கிறார்” என்று எடப்பாடி பழனிசாமி ஆதரவாளரான முன்னாள் அமைச்சர் அக்ரி கிருஷ்ணமூர்த்தி மிகக் காட்டமாக விமரிசித்துள்ளார்.
சட்டமன்றத் தேர்தல் தோல்விக்குப் பிறகு அதிமுகவில் ஏற்பட்டுள்ள உட்கட்சி மோதலால் கட்சி தற்போது இரண்டு பிரிவுகளாக உடைந்துள்ளது. அதிமுக சார்பில் மொத்தம் 47 எம்.எல்.ஏ-க்கள் வெற்றி பெற்றுள்ள நிலையில், எஸ்பி வேலுமணி – சிவி சண்முகம் தலைமையில் 25 எம்.எல்.ஏ-க்களும், பொதுச்செயலாளர் எடப்பாடி பழனிசாமி தரப்புக்கு ஆதரவாக 22 எம்.எல்.ஏ-க்களும் பிரிந்து நிற்கின்றனர். இதில் வேலுமணி – சிவி சண்முகம் தலைமையிலான 25 எம்.எல்.ஏ-க்கள் தவெக அரசுக்கு வெளியில் இருந்து ஆதரவு அளித்து வருவதோடு, புதிய தவெக அமைச்சரவையில் இடம்பிடிக்கவும் தீவிரமாகக் காய்நகர்த்தி வருகின்றனர்.
சி.வி.சண்முகத்தின் இந்த அதிரடித் தவெக ஆதரவு நிலைப்பாட்டிற்குப் பதிலடி கொடுக்கும் வகையில் எடப்பாடி பழனிசாமி அணியைச் சேர்ந்த அக்ரி கிருஷ்ணமூர்த்தி இன்று செய்தியாளர்களைச் சந்தித்துப் பரபரப்புக் குற்றச்சாட்டுகளை முன்வைத்தார். அவர் பேசியதாவது: “ஜெயலலிதாவால் அடையாளம் காட்டப்பட்டு, பின்னர் மாவட்டச் செயலாளர் பொறுப்பில் இருந்து நீக்கப்பட்டவர் தான் இந்த சி.வி.சண்முகம். அதன் பிறகு இபிஎஸ் பொதுச்செயலாளராகப் பொறுப்பேற்றவுடன் தான், சண்முகத்திற்கு மீண்டும் இழந்த மாவட்டச் செயலாளர் பதவியைத் தேடிப் போய்க் கொடுத்தார். கடந்த 2021 சட்டமன்றத் தேர்தலில் தோற்றுப் போன சண்முகம், வற்புறுத்திக் கேட்டார் என்பதற்காகவே அவருக்கு இபிஎஸ் ராஜ்யசபா எம்பி (மேலவை) பதவியையும் தந்தார்.
3 ஆண்டுகள் எம்பி பதவி சுகத்தை அனுபவித்த சண்முகம், மீண்டும் 2026-ல் எப்படியாவது அமைச்சராகிவிட வேண்டும் எனத் திட்டமிட்டு விழுப்புரம் மாவட்ட வேட்பாளர்களைத் தனது விருப்பப்படி தேர்வு செய்தார். ஆனால், அவரது பரிந்துரையில் நின்ற அனைவரும் தோற்க, மயிலம் தொகுதியில் சண்முகம் மட்டுமே நூலிழையில் வெற்றி பெற்றார். எனவே, விழுப்புரம் மாவட்டத்தில் அதிமுக தோற்றதற்குச் சி.வி.சண்முகத்தின் சுயநலமே காரணம். கட்சியின் வளர்ச்சிக்காக எந்தப் பணியும் செய்யாமல், இன்று அமைச்சர் பதவி என்ற சுகத்திற்காக நாம் யாரை எதிர்த்துப் போட்டியிட்டோமோ, அந்தத் தவெக-வுடன் இணைந்து சொந்த இயக்கத்தையே அழித்துக் கொண்டிருக்கிறார்.
அதேபோல், கோயம்புத்தூர், திருப்பூர், நீலகிரி உள்ளிட்ட 21 தொகுதிகளுக்குப் பொறுப்பாளராக நியமிக்கப்பட்ட எஸ்பி வேலுமணியின் தம்பட்டத்தால், அங்கு அதிமுக வெறும் 3 இடங்களில் மட்டுமே வென்றது. கோவையில் வேலுமணி மட்டுமே ஜெயித்தார். தங்களது இந்தத் தோல்வித் தவறுகளை மறைப்பதற்காகவே இன்று எடப்பாடி பழனிசாமி மீது இருவரும் வீண்பழி சுமத்துகிறார்கள். திமுக தலைவர் ஸ்டாலின், நாநாம் தமிழர் சீமான் உள்ளிட்ட தலைவர்களே தங்களது தொகுதிகளில் தோற்றுப் போயுள்ள நிலையில், எடப்பாடி பழனிசாமி மட்டுமே 96 ஆயிரம் வாக்குகள் வித்தியாசத்தில் பிரம்மாண்ட வெற்றி பெற்றுத் தனது அசைக்க முடியாத செல்வாக்கை நிரூபித்துள்ளார்.
நேற்று நடைபெற்ற ராயப்பேட்டை கூட்டத்தில் மொத்தமுள்ள மாவட்டச் செயலாளர்களில் 95 சதவீதத்திற்கும் அதிகமானோர் இபிஎஸ்-க்கு எழுத்துப்பூர்வமாகத் தங்களது விசுவாச ஆதரவைக் கையெழுத்திட்டுக் கொடுத்துள்ளனர். அதிமுக இபிஎஸ் தலைமையில் ஒரு சிறந்த எதிர்க்கட்சியாகச் செயல்படும். சி.வி.சண்முகம் தற்போது தனது எம்பி பதவியை அவசர அவசரமாக ராஜினாமா செய்துள்ளார். இதனால் மாநிலங்களவையில் அதிமுகவுக்கு இருந்த நாடாளுமன்ற அங்கீகாரமே தற்போது பறிபோயுள்ளது” என்று அக்ரி கிருஷ்ணமூர்த்தி ஆவேசமாகப் பேசினார். அக்ரி கிருஷ்ணமூர்த்தியின் இந்த அடுக்கடுக்கான புகார்கள் உள்கட்சிப் பூசலால் தவிக்கும் அதிமுக தொண்டர்களிடையே மேலும் கொந்தளிப்பை ஏற்படுத்தியுள்ளது.
#AgriKrishnamurthySpeech #CVShanmugamSlammed #ADMK_Crisis #VelumaniVsEPS #BreakingNews #May20 #EpsSupports #ADMK_VsTVK #ThalapathyVijay #TVK_Government #NewGovernmentTN #VillupuramADMK #CoimbatoreDefeat #RajyaSabhaResignation #DravidianPolitics #AIADMK_Split #TamilNews #VijayMakkalIyakkam #CM_Vijay_Official_“`
