சென்னை:

ஸ்மார்ட் மீட்டர் திட்டம் என்பது மின் வாரியத்தை முழுக்க முழுக்க தனியார் வசம் ஒப்படைக்கின்ற திட்டத்தின் ஒரு பகுதியே ஆகும். எனவே இத்திட்டத்தை உடனடியாகக் கைவிட வேண்டும் என மார்க்சிஸ்ட் கம்யூனிஸ்ட் கட்சியின் மாநிலச் செயலாளர் சண்முகம் வலியுறுத்தியுள்ளார்.

டெண்டர் அறிவிப்பு:

தமிழ்நாட்டில் மின் விநியோகக் கட்டமைப்பை நவீனமாக்கும் நோக்கில், சென்னை உள்ளிட்ட பல்வேறு முக்கிய நகரங்கள் மற்றும் பல மாவட்டங்களில் உள்ள வீடுகள் மற்றும் வணிக நிறுவனங்களுக்குப் புதிய ஸ்மார்ட் மின் மீட்டர்களைப் பொருத்துவதற்கான டெண்டரைத் தமிழ்நாடு மின் பகிர்மான கழகம் வெளியிட்டுள்ளது. இதில் ‘முன்பணம் செலுத்தும் முறை’யைப் பயன்படுத்தத் தனியார் சேவை நிறுவனங்கள் நியமிக்கப்பட உள்ளன.

சிபிஎம் கண்டனம்:

இது தொடர்பாகச் சண்முகம் வெளியிட்டுள்ள அறிக்கையில், \”நாடாளுமன்றத்தில் மின்சார சட்டத் திருத்த மசோதா நிறைவேறாதபோதும், ஒன்றிய பாஜக அரசு ஸ்மார்ட் மீட்டர் பொருத்தும் நிர்ப்பந்தங்களை அனைத்து மாநில அரசுகள் மீதும் திணித்து வருகிறது. கடந்த 2023-ஆம் ஆண்டு திமுக அரசு இதற்கான டெண்டரைக் கோரியபோது மார்க்சிஸ்ட் கட்சி கடுமையாக எதிர்த்ததால் அத்திட்டம் திரும்பப் பெறப்பட்டது. தற்போது தவெக அரசும் அதே பாதையில் பயணிக்கிறது,\” என அவர் வன்மையாகக் கண்டித்துள்ளார்.

சலுகைகள் பறிபோகும்:

இத்திட்டம் நடைமுறைக்கு வந்தால், தற்போதுள்ள 200 யூனிட் இலவச மின்சாரம், விவசாயத்திற்கான இலவச மின்சாரம், சிறுகுறு தொழில்கள் மற்றும் கைத்தறி நெசவுக்கான மானியங்கள் உள்ளிட்ட அனைத்து சமூக நல நடவடிக்கைகளும் கேள்விக் குறியாக்கப்படும். மேலும், வணிக நிறுவனங்களுக்கு விதிக்கப்படும் உச்ச நேரக் கட்டணம் இனி வீடுகளுக்கும் திணிக்கப்படும் எனவும் அவர் எச்சரித்துள்ளார்.

#SmartMeter #CPIM #PShanmugam #TNEB #TVKGovernment #BmNews #TamilNews #BreakingNewsTN #TamilNaduNews #LatestNews #TamilNewsLive