புத்தளம் – கொழும்பு பிரதான வீதியில் இரவு இடம்பெற்ற மிக மோசமான விபத்தொன்றில் பொலிஸ் சார்ஜன்ட் ஒருவர் பரிதாபமாக உயிரிழந்துள்ளார். மதுரங்குளிய நகருக்கு அண்மித்த பகுதியில் இரவு 8.00 மணியளவில் இவ் விபத்து இடம்பெற்றுள்ளது.
ஜா-எல பொலிஸ் நிலையத்தில் கடமையாற்றி வந்த புத்தளம், சாலியவெவ பகுதியைச் சேர்ந்த பொலிஸ் சார்ஜன்ட் பண்டார (இ.கெ. இல: 73287) என்பவரே இவ்வாறு உயிரிழந்தவராவார். கொழும்பில் இருந்து புத்தளம் நோக்கித் தனது மோட்டார் சைக்கிளில் பயணித்துக் கொண்டிருந்தபோதே இந்த எதிர்பாராத விபரீதம் நிகழ்ந்துள்ளது.
திடீரென மோட்டார் சைக்கிள் கட்டுப்பாட்டை இழந்த நிலையில், முன்னால் பயணித்துக் கொண்டிருந்த லொறியின் வலது பக்கப் பகுதியில் பலமாக மோதி விபத்துக்குள்ளாகியுள்ளது. இதனால் மோட்டார் சைக்கிளில் பயணம் செய்த பொலிஸ் சார்ஜன்ட் மிகக் கடுமையான காயங்களுக்கு உள்ளாகியுள்ளார்.
உடனடியாகப் புத்தளம் ஆதார வைத்தியசாலையில் அனுமதிக்கப்பட்ட நிலையில், அவரது நிலைமை கவலைக்கிடமாக இருந்ததால் மேலதிக தீவிர சிகிச்சைக்காகக் கொழும்பு தேசிய வைத்தியசாலைக்கு மாற்ற நடவடிக்கை எடுக்கப்பட்டுள்ளது. துரதிர்ஷ்டவசமாக, அவசர ஊர்தியில் (அம்புலன்ஸ்) கொழும்பு நோக்கிச் சென்று கொண்டிருந்தபோது, மாரவில பகுதியை அண்மித்த வேளையில் அவர் உயிரிழந்துள்ளார். அவரது சடலம் தற்போது மாரவில ஆதார வைத்தியசாலையில் வைக்கப்பட்டுள்ளது.
இவ் விபத்துத் தொடர்பில் மேலதிக விசாரணைகளை மதுரங்குளி பொலிஸ் போக்குவரத்துப் பிரிவு அதிகாரிகள் முன்னெடுத்து வருவதுடன், விபத்துடன் தொடர்புடைய லொறியைக் கைப்பற்றியுள்ளதுடன் அதன் சாரதியையும் கைது செய்துள்ளனர்.
