ட்ரம்ப் நிர்வாகத்திற்கும் ஈரானுக்கும் இடையிலான போர்நிறுத்த ஒப்பந்தத்தில் லெபனானையும் ஒரு அங்கமாகச் சேர்க்க வேண்டும் என்றும், அந்த உள்ளடக்கத்தை இஸ்ரேல் மதிக்க வேண்டும் என்றும் ஒட்டாவா அழுத்தம் கொடுத்து வருவதாக லிபரல் கட்சியின் மூத்த அதிகாரி ஒருவர் CBC செய்திகளுக்குத் தெரிவித்தார்.
தன்னைப் பற்றிய விபரங்களை பகிரங்கப்படுத்த அனுமதி இல்லாததால், பெயர் குறிப்பிடாமல் பேசிய அந்த அதிகாரி, “லெபனானைச் சேர்க்க முயற்சிக்கும் பல நாடுகளில் கனடாவும் ஒன்று” என்றார். “இது அனைத்தும் அமெரிக்க அதிபர் ட்ரம்ப் இஸ்ரேலுக்கு அனுமதி அளிப்பாரா என்பதைப் பொறுத்தே அமையும்” என்றும் அவர் கூறினார்.
ஈரானுடனான இந்த நிலையற்ற போர்நிறுத்தம் லெபனானை உள்ளடக்கியதா என்பது இன்னும் தெளிவாகத் தெரியவில்லை. லெபனானில் ஈரானின் ஆதரவு பெற்ற ஹிஸ்புல்லா அமைப்பினர், பிப்ரவரி 28 அன்று அமெரிக்காவும் இஸ்ரேலும் ஈரான் மீது தாக்குதல் நடத்தியதில் இருந்து இஸ்ரேலுடன் போரிட்டு வருகின்றனர். லெபனான் இதில் ஒரு அங்கமல்ல என்று இஸ்ரேலும் வெள்ளை மாளிகையும் கூறுகின்றன. ஆனால், இந்த ஒப்பந்தத்தை முன்னின்று நடத்திய பாகிஸ்தான், லெபனான் இதில் குறிப்பாகச் சேர்க்கப்பட்டுள்ளதாகக் கூறுகிறது.
இதற்கிடையில், லெபனானுக்குள் இஸ்ரேல் தாக்குதல்களைத் தொடரும் வரை போர்நிறுத்தம் ஏற்படாது என்று தெஹ்ரான் (ஈரான்) தெரிவித்துள்ளது. “இஸ்ரேல் லெபனானில் உருவாக்கப் போவது ஒரு உள்நாட்டுப் போரைத் தான். அவர்கள் எப்போதும் போரிலேயே இருப்பார்கள், ஒருபோதும் அமைதியைப் பெறமாட்டார்கள்” என்று அந்த அதிகாரி கூறினார்.
இஸ்ரேலின் தாக்குதல்கள் தொடரும் நிலையில், “போர்நிறுத்தத்தில் லெபனான் சேர்க்கப்பட வேண்டும், அதுவும் இப்போதே சேர்க்கப்பட வேண்டும்” என்று கனடா பிரதமர் மார்க் கார்னி (Mark Carney) கூறியுள்ளார்.
குபெக் (Quebec) மாகாணத்தின் கொன்ட்ரிகூர் (Contrecoeur) நகரில் வியாழக்கிழமை நடைபெற்ற செய்தியாளர் சந்திப்பில் கார்னி பேசுகையில், “லெபனான் போர்நிறுத்தத்தில் உள்ளடக்கப்பட வேண்டும் என்பதே புரிதல், அது களத்தில் உண்மையான நிலவரமாக இருக்க வேண்டும்” என்றார். லெபனானில் புதன்கிழமை இஸ்ரேல் நடத்திய மிகக் கடுமையான தாக்குதல்களில் 200-க்கும் மேற்பட்டோர் கொல்லப்பட்டதாக லெபனான் சுகாதார அமைச்சகம் தெரிவித்துள்ளது.
பிரெஞ்சு அதிபர் இம்மானுவேல் மக்ரோனும் இக்கோரிக்கையை பகிரங்கமாக வைத்துள்ளார் என்பதை கனடா தரப்பு அதிகாரி ஒப்புக்கொண்டார். இருப்பினும், மக்ரோனுக்கும் ட்ரம்ப்புக்கும் இடையிலான உறவு பலவீனமாக இருப்பதால், மற்ற நாடுகளின் தலையீடும் அவசியம் என அவர் மேலும் தெரிவித்தார்.
கனடா தனது செல்வாக்கைப் பயன்படுத்தி இந்த முயற்சிகளுக்கு ஆதரவளிக்கும் என்றும், அதே சமயம் இஸ்ரேல் மீது பொருளாதாரத் தடைகளை விதிக்கும் திட்டம் எதுவும் இப்போதைக்கு இல்லை என்றும் பிரதமர் கார்னி சுட்டிக்காட்டினார்.
ஆஸ்திரேலியப் பிரதமர் அந்தோனி அல்பானீஸும் லெபனானைச் சேர்க்கக் கோரிக்கை விடுத்துள்ளார். “லெபனானில் நடக்கும் நிகழ்வுகள் குறித்துப் பல ஆஸ்திரேலியர்கள் கவலையடைந்துள்ளனர். இது அங்குள்ள பாதிப்பு மட்டுமல்ல, உலகம் முழுவதிலும் தாக்கத்தை ஏற்படுத்துகிறது” என்று அவர் கூறினார்.
ஐக்கிய அரபு அமீரகத்தின் வேண்டுகோளுக்கு இணங்க, போரின் ஆரம்பத்தில் ஆஸ்திரேலியா சுமார் 85 இராணுவ வீரர்களைக் கண்காணிப்பு மற்றும் ட்ரோன் எதிர்ப்புப் பணிகளுக்காக அங்கு அனுப்பியிருந்தது குறிப்பிடத்தக்கது.
பெய்ரூட்டில் வசிக்கும் கனடா-லெபனான் இரட்டை குடியுரிமை கொண்ட ஷே அயூப் (Shay Ayoub) CBC செய்திகளிடம் பேசுகையில், இஸ்ரேலின் தாக்குதல்கள் எந்தவித முன்னறிவிப்புமின்றி வருவதாகத் தெரிவித்தார். “நாள் முழுவதும் வான்வழித் தாக்குதல்களின் சத்தத்தையே கேட்டுக்கொண்டிருக்கிறோம். இது மிகவும் அச்சமூட்டும் அனுபவம்” என்றார் அவர்.
கடந்த வாரம், ஈரானுடனான ஒப்பந்தத்திற்கு முன்னதாக, தெற்கு லெபனானில் இஸ்ரேலின் நடவடிக்கைகளை “சட்டவிரோத ஆக்கிரமிப்பு” என்று கார்னி அழைத்திருந்தார்.
ஹிஸ்புல்லாவை நிராயுதபாணியாக்கும் கடமையை லெபனான் இராணுவம் செய்யத் தவறிவிட்டது என்று குற்றம் சாட்டியுள்ள இஸ்ரேல், தெற்கு லெபனானின் ஒரு பகுதியை ஆக்கிரமித்துள்ளதை நியாயப்படுத்தியுள்ளது. போர் முடிந்த பின்னரும் கூட, இஸ்ரேலிய எல்லையில் இருந்து 30 கிலோமீட்டர் தொலைவு வரை உள்ள பகுதியில் தனது பாதுகாப்பு கட்டுப்பாட்டைத் தக்க வைத்துக் கொள்வோம் என்று இஸ்ரேல் பாதுகாப்பு அமைச்சர் இஸ்ரேல் காட்ஸ் கூறியுள்ளார்.
