யாழ்ப்பாண மாவட்டத்தின் தற்போதைய போக்குவரத்து நிலைமையை ஆய்வு செய்து, எதிர்காலத் தேவைகளுக்கு ஏற்ப போக்குவரத்து மற்றும் நகர அபிவிருத்தியை திட்டமிடுவது தொடர்பான முக்கிய கலந்துரையாடல் இன்று நடைபெற்றது.
2019ஆம் ஆண்டு மேற்கொள்ளப்பட்ட போக்குவரத்து ஆய்வை தற்போதைய நிலைமை, மக்கள் தொகை, நகர வளர்ச்சி மற்றும் அதிகரித்து வரும் போக்குவரத்து தேவைகளுக்கு ஏற்ப மீளாய்வு செய்து புதுப்பிப்பது தொடர்பாக கவனம் செலுத்தப்பட்டது.
கலந்துரையாடப்பட்ட முக்கிய அம்சங்கள்:
ஒருங்கிணைந்த பல்முகப் போக்குவரத்து அமைப்பு (Multimodal Transport System) உருவாக்குதல். புதிய பேருந்து நிலையம் மற்றும் பொதுப் போக்குவரத்து சேவைகளை மேம்படுத்துதல். யாழ்ப்பாண நகர மையத்தில் போக்குவரத்து நெரிசலைக் குறைத்து, சிறந்த போக்குவரத்து மேலாண்மை முறையை உருவாக்குதல். மருத்துவமனைகளுக்கான நோயாளர் வாகன நிறுத்துமிடங்கள் மற்றும் போக்குவரத்து மேலாண்மையை மேம்படுத்துதல். பாடசாலைகளுக்கு அருகிலுள்ள வீதிகளில் மாணவர்களின் பாதுகாப்பை உறுதி செய்யும் நடவடிக்கைகள் மேற்கொள்ளுதல். நடைபாதைகள் மற்றும் சைக்கிள் பாதைகளை மேம்படுத்தி, பாதுகாப்பான பயண வசதிகளை ஏற்படுத்துதல். முச்சக்கர வண்டிகளுக்கான ஒழுங்குபடுத்தப்பட்ட வாகன நிறுத்துமிடங்களை ஏற்படுத்துதல். காங்கேசன்துறையை (KKS) முக்கிய போக்குவரத்து மையமாக மேம்படுத்துதல். தீவுப் பகுதிகளுக்கான கடல் மற்றும் தரைவழிப் போக்குவரத்து இணைப்புகளை வலுப்படுத்துதல். விமான நிலையம், புகையிரத நிலையம், பேருந்து நிலையம் மற்றும் துறைமுகம் உள்ளிட்ட முக்கிய போக்குவரத்து மையங்களுக்கு இடையிலான இணைப்பை மேம்படுத்துதல். தற்போதைய போக்குவரத்து நிலைமை மற்றும் பயணத் தேவைகள் தொடர்பான தரவுகளைச் சேகரித்து, எதிர்காலத் திட்டமிடலில் பயன்படுத்துதல். நகர அபிவிருத்தியும் போக்குவரத்து அபிவிருத்தியும் தனித்தனியாக அல்லாமல் ஒருங்கிணைந்த திட்டமிடலின் கீழ் முன்னெடுத்தல்.யாழ்ப்பாண நகரம் மற்றும் மாவட்டத்தின் வளர்ச்சிக்கு ஏற்ப, மக்கள் பாதுகாப்பாகவும் வசதியாகவும் குறைந்த நேரத்தில் பயணிக்கக்கூடிய நவீன, பாதுகாப்பான மற்றும் மக்கள் மையப்படுத்தப்பட்ட போக்குவரத்து கட்டமைப்பை உருவாக்குவது இத்திட்டமிடலின் முக்கிய நோக்கமாகும்.
மக்களின் அன்றாட தேவைகளை அடிப்படையாகக் கொண்டு, எதிர்கால யாழ்ப்பாணத்தை திட்டமிடுவோம்.
