வெள்ளத்தில் மிதந்த காரிலிருந்து பெண்ணை மீட்டது முதல் சேறு படிந்த இடங்களைச் சுத்தம் செய்வது வரை, மொன்றியலில் (Montreal) ஏற்பட்ட திடீர் வெள்ளப் பெருக்கின் போது அண்டை வீட்டாரும் பொதுமக்களும் ஒருவருக்கொருவர் உதவிக்கரம் நீட்டியுள்ளனர்.

மொன்றியல் நகரைச் சேர்ந்த ஏட்ரியன் சின்த்ரிஸ் (Adrian Chindris) என்பவர், தனது வீட்டின் ஜன்னல் வழியாக வெளியே தேங்கியிருந்த வெள்ள நீரை உற்று கவனித்துக் கொண்டிருந்த போதுதான், மிதந்து கொண்டிருந்த கார் ஒன்றையும், அதற்குள் சிக்கியிருந்த ஒரு கர்ப்பிணிப் பெண்ணையும் மீட்கும் முயற்சியில் ஈடுபட நேர்ந்தது.

சனிக்கிழமையன்று (ஜூன் 20, 2026), நகரின் மேற்குத் தீவுப் பகுதியில் (West Island) குறுகிய நேரத்தில் பெய்த சுமார் 150 மில்லிமீட்டர் மழையினால் வீதிகள் அனைத்தும் மிக வேகமாக வெள்ளத்தில் மூழ்கின. வெள்ள நீர் சின்த்ரிஸின் வீட்டுப் பாதையையும் நெருங்கத் தொடங்கியது.

“வீதியின் நடுவே ஒரு கார் வந்து திடீரென நிற்பதை நான் பார்த்தேன். அந்தப் பெண் சுமார் பத்து நிமிடங்கள் காரினுள்ளேயே இருந்தார், அவர் என்ன செய்கிறார் என்பதை நான் கவனித்துக் கொண்டிருந்தேன்,” என்று சின்த்ரிஸ் கூறினார்.

அதிகரித்து வந்த ஆழமான வெள்ள நீரில் அந்த வோக்ஸ்வாகன் அட்லாஸ் (Volkswagen Atlas) கார் சிக்கிக் கொண்டது. காரிலிருந்த பெண் உதவி கேட்டு சத்தமிடத் தொடங்கினார். சின்த்ரிஸ் காரை நெருங்கிய போது, அந்த ஓட்டுநர் தான் ஒரு கர்ப்பிணிப் பெண் என்றும், அங்கிருந்து எவ்வாறு தப்பிப்பது என்று தெரியவில்லை என்றும் அவரிடம் கூறியுள்ளார்.

“நான் அவரிடம், ‘நான் உங்களைப் பிடித்துக் கொள்கிறேன், நாம் காரின் கதவைத் திறக்கும் போது தண்ணீர் வேகமாக உள்ளே பாயத் தொடங்கும், அதற்குத் தயாராக இருங்கள்’ என்று கூறினேன்,” என சின்த்ரிஸ் விவரித்தார்.

அதன்படி, அந்தப் பெண்ணைக் காரிலிருந்து வெளியே கொண்டு வந்த அவர், தனது இடுப்பு வரை உயர்ந்த வெள்ள நீரில் இறங்கி, அந்தப் பெண்ணைத் தூக்கிக் கொண்டு அருகிலுள்ள ஒரு வீட்டின் முன்றலில் தண்ணீர் குறைவாக இருந்த பகுதிக்குச் சென்றார்.

“அவர் குளிரில் நடுங்கிக் கொண்டிருந்தார். ஒருவேளை அவருக்கு ‘ஹைபோதெர்மியா’ (உடல் வெப்பநிலை மிகக் குறைவடைதல்) ஏற்பட்டிருக்கலாம் என்று பயந்தேன். நான் அருகிலிருந்த வீட்டின் கதவைத் தட்டினேன், ஆனால் உள்ளே யாரும் இல்லை. அதனால் அங்கு நாற்காலிகளில் இருந்த சில தலையணைகளை எடுத்து அவரது உடல் சூட்டைத் தக்கவைக்க அதன் மேல் வைத்தேன்,” என்றார்.

பின்னர், மற்றொரு அண்டை வீட்டார் அந்தப் பெண்ணைப் போர்த்துவதற்குக் போர்வை ஒன்றை வழங்கியுள்ளார். அதற்குள் அந்தப் பெண்ணின் தந்தையும் அந்த இடத்திற்கு வந்து மகளை அரவணைத்துக் கொண்டார்.

அருகிலுள்ள வீதியிலேயே வசிக்கும் அந்தப் பெண், இந்த அதிர்ச்சியான சம்பவத்தால் தான் மிகவும் உணர்ச்சிவசப்பட்டிருப்பதாகவும், தகுந்த நேரத்தில் வந்து உதவிய அண்டை வீட்டாருக்கு தனது மனமார்ந்த நன்றியைத் தெரிவித்துக் கொள்வதாகவும் CTV செய்திச் சேவைக்குத் தெரிவித்தார்.

வெள்ளத்தால் பாதிக்கப்பட்ட வீதிகளில் மக்கள் எவ்வாறு ஒன்றிணைந்து செயல்பட்டார்கள் என்பதற்கு இந்தச் சம்பவம் ஒரு சிறந்த உதாரணமாகும். கடந்த இரண்டு ஆண்டுகளில் இந்த விபாக்கியப் பகுதியைத் தாக்கிய இரண்டாவது பேரழிவு வெள்ளம் இதுவாகும். இதிலிருந்து மீள்வதற்காக மக்கள் ஒருவருக்கொருவர் கனமான தளபாடங்களை நகர்த்துவதற்கும், ஆலோசனைகள் மற்றும் ஆதரவை வழங்குவதற்கும் பரஸ்பரம் உதவிக் கொண்டனர்.

நென்சி மற்றும் கிரெக் வார்னர் (Nancy and Greg Warner) தம்பதியினர், இதற்கு முந்தைய புயலால் ஏற்பட்ட சேதங்களைச் சரிசெய்து முடித்திருந்த நிலையிலேயே இந்த புதிய புயல் மீண்டும் தாக்கியுள்ளது. அவர்களது நண்பர்கள் வீட்டிற்கு வந்து பொருட்களை உலர வைக்கவும், காப்பாற்றக்கூடிய பொருட்களை மீட்கவும் உதவினர்.

“என்னை விட 12 வயது மூத்த சகோதரி ஒருவர் எனக்கு இருந்தார். அவர் இப்போது எங்களுடன் இல்லை, ஆனால் அவர் எப்போதும் என்னிடம் கூறுவார்: ‘கிரெக், பணத்தால் சரிசெய்யக்கூடிய எதைப் பற்றியும் நீ கவலைப்படாதே’,” என்று கிரெக் வார்னர் நினைவு கூர்ந்தார்.

ஆனால், பணத்தால் விலைக்கு வாங்க முடியாதது என்னவென்றால், இந்த வெள்ளப் பெருக்கின் போது அண்டை வீட்டாரிடம் வெளிப்பட்ட ஒற்றுமையும் மனிதநேயமும்தான்.