பிராம்ப்டன் பகுதியில் அமைந்துள்ள வாகன பழுதுபார்க்கும் நிலையமொன்றில் (Auto shop), இழுவை வாகனத்தின் கீழ் நசுங்கி இழுவை வாகன ஓட்டுநர் ஒருவர் உயிரிழந்த துயரச்சம்பவம் தொடர்பில் பீல் (Peel) பிராந்திய பொலிஸார் விசாரணைகளை மேற்கொண்டு வருகின்றனர்.

கடந்த வெள்ளிக்கிழமை மாலை பிராம்ப்டனில் உள்ள வாகன பழுதுபார்க்கும் நிலையமொன்றில், வாகனத்தின் கீழ் சிக்கி நசுங்கியதில் இழுவை வாகன ஓட்டுநர் ஒருவர் சம்பவ இடத்திலேயே உயிரிழந்துள்ளார்.

‘ஸ்டீல்ஸ் அவென்யூ ஈஸ்ட்’ (Steeles Avenue East) மற்றும் ‘டாம்கென் வீதிக்கு’ (Tomken Road) அருகில் அமைந்துள்ள ‘277 அட்வான்ஸ் புலிவார்ட்’ (277 Advance Boulevard) என்ற முகவரியில் இந்த விபத்து நேர்ந்துள்ளதுடன், மாலை 6:30 மணிக்குப் பின்னரே இதுகுறித்த அவசர அழைப்புத் தமக்குக் கிடைத்ததாகப் பீல் பொலிஸார் தெரிவித்துள்ளனர்.

சம்பவ இடத்தில் ஊடகவியலாளர்களிடம் கருத்து வெளியிட்ட பீல் பிராந்திய பொலிஸ் அதிகாரி டெய்லர் ஹாஃபியார்ட் (Sgt. Taylor Halfyard), இழுவை வாகன ஓட்டுநர் தான் கொண்டுவந்த வாகனத்தை தனது இழுவை வாகனத்திலிருந்து விடுவித்துக் கொண்டிருந்த போதே இந்த விபத்து நேரிட்டுள்ளதாகக் குறிப்பிட்டுள்ளார்.

“வாகனத்தை விடுவிக்கும் அந்த நடைமுறையின் போது, பாதிக்கப்பட்ட நபர் எதிர்பாராதவிதமாக வாகனத்தின் அடியில் சிக்கியுள்ளார். அதன் பின்னர் அந்த வாகனம் அவர் மீது ஏறிச் சென்றுள்ளது. எனினும், இது எவ்வாறு நிகழ்ந்தது என்பது குறித்து முழுமையாகப் புரிந்துகொள்வதற்கான விசாரணைகளை நாம் இன்னும் முன்னெடுத்து வருகிறோம்” என அதிகாரி ஹாஃபியார்ட் தெரிவித்துள்ளார்.

விபத்து நேரிட்ட இடத்திற்கு விரைந்த அவசரக்கால மீட்புப் படையினர் பாதிக்கப்பட்ட நபரைக் காப்பாற்ற தீவிர முயற்சிகளை மேற்கொண்ட போதிலும், அவர் சம்பவ இடத்திலேயே உயிரிழந்துவிட்டதாக அறிவிக்கப்பட்டது. உயிரிழந்த நபரின் விபரங்கள் இதுவரை உத்தியோகபூர்வமாக வெளியிடப்படவில்லை.

இவ்விடயம் தொடர்பில் கனடியத் தொழிலாளர் அமைச்சு (Ministry of Labour) முதற்கட்ட விசாரணைகளை ஆரம்பித்துள்ளதாக அவர் மேலும் தெரிவித்தார்.

“பொதுவாக, இவ்வாறான சம்பவங்களின் போது பீல் பிராந்திய பொலிஸார் இதற்கு இணையாக மற்றுமொரு விசாரணையை முன்னெடுப்பார்கள். இந்த விபத்தின் பின்னணியில் ஏதேனும் குற்றவியல் பின்னணிகள் (Criminality) உள்ளதா என்பதைக் கண்டறிவதே இதன் நோக்கமாகும். ஆனால், இதுவரை நாம் சேகரித்த தகவல்களின்படி, இதில் எவ்வித குற்றவியல் கூறுகளும் இருப்பதாகத் தெரியவில்லை” என ஹாஃபியார்ட் விளக்கமளித்துள்ளார்.

எனவே, இந்த விபத்துத் தொழிலகப் பாதுகாப்புடன் (Workplace aspect) தொடர்புடையது என்பதால், தொழிலாளர் அமைச்சின் மூலமாகவே இதற்கான பிரதான விசாரணைகள் முன்னெடுக்கப்படும் எனத் தெரிகிறது