சென்னை:
தேர்தல் ஆணையம் பாஜகவின் கிளை அமைப்பா என்றும், பாசிசத்தின் காலடியில் மக்கள் ஜனநாயகம் நசுக்கப்படுகிறதா என்றும் தமிழக வாழ்வுரிமைக் கட்சித் தலைவர் வேல்முருகன் சரமாரியாகக் கேள்வி எழுப்பியுள்ளார்.
சிறப்புத் தீவிர திருத்தம் (SIR) என்ற பெயரில் மேற்கொள்ளப்பட்ட வாக்காளர் பட்டியல் திருத்த நடவடிக்கையில், தமிழ்நாட்டில் மட்டும் 74 லட்சத்துக்கும் மேற்பட்ட வாக்காளர்களின் பெயர்கள் குறைக்கப்பட்டிருப்பதாக வெளியான தகவல் அதிர்ச்சியை ஏற்படுத்தியுள்ளது. இது தொடர்பாக வேல்முருகன் தனது எக்ஸ் தளத்தில் வெளியிட்டுள்ள அறிக்கையில் கூறியிருப்பதாவது:
உயிருடன் இருப்பவர்கள் நீக்கம்:
“தமிழ்நாட்டின் பல பகுதிகளில் உயிருடன் இருக்கும் வாக்காளர்கள் ‘இறந்தவர்கள்’ என்றும், சொந்த வசிப்பிடத்திலேயே இருந்தவர்கள் ‘இடம்பெயர்ந்தவர்கள்’ என்றும் குறிப்பிடப்பட்டு பெயர்கள் நீக்கப்பட்ட சம்பவங்கள் செய்தி ஆய்வுகளில் வெளிச்சத்துக்கு வந்துள்ளன. இத்தகைய தவறுகள் எவ்வாறு ஏற்பட்டன? யார் பொறுப்பு? பாதிக்கப்பட்டவர்களின் பெயர்கள் எவ்வாறு மீண்டும் சேர்க்கப்பட்டன? இந்த நீக்கங்கள் தேர்தல் முடிவுகளில் தாக்கத்தை ஏற்படுத்தியதா? என்பதற்குத் தேர்தல் ஆணையம் முழுமையான பதில் அளிக்க வேண்டும்.
பாஜகவை திருப்திப்படுத்தச் செயல்பட்டதா?
தேர்தல் ஆணையத்தின் இரு ஆணையர்களான சுக்பீர் சிங் மற்றும் விவேக் ஜோஷி ஆகியோர் பல்வேறு ஆட்சேபணைகளைப் பதிவு செய்திருப்பதாக வெளியாகியுள்ள தகவல்கள் மேலும் கேள்விகளை எழுப்புகின்றன. சிவசேனா தலைவர் உத்தவ் தாக்கரே மற்றும் மேற்கு வங்க முன்னாள் முதலமைச்சர் மம்தா பானர்ஜி ஆகியோர், தேர்தல் ஆணையர் ஞானேஷ்குமார் பாஜகவை திருப்திப்படுத்தவே வேலை செய்தார் என்று குற்றம் சாட்டியுள்ளனர்.
வாக்குச்சீட்டில் மறுதேர்தல்:
வாக்காளர் பட்டியல் திருத்தத்தில் ஏற்பட்ட குளறுபடிகள் தேர்தல் முடிவுகளை மாற்றியமைத்திருந்தால், அந்த முடிவை எவ்வாறு ஏற்றுக்கொள்ள முடியும்? எனவே, எஸ்.ஐ.ஆர் நடவடிக்கைகளுக்குப் பிறகு நடைபெற்ற தேர்தல்களில் வாக்காளர் பட்டியல் மாற்றங்கள் வெற்றி தோல்வியைத் தீர்மானிக்கும் அளவுக்குத் தாக்கத்தை ஏற்படுத்தியுள்ளனவா என்பதைச் சுயாதீனமாக விசாரிக்க வேண்டும். அது நிரூபிக்கப்பட்டால் சம்பந்தப்பட்ட தேர்தல்களை ரத்து செய்துவிட்டு, மக்களின் நம்பிக்கையை உறுதிப்படுத்தும் வகையில் வாக்குச்சீட்டு முறையில் மறுதேர்தல் நடத்த வேண்டும்\” என்று வேல்முருகன் வலியுறுத்தியுள்ளார்.
#Velmurugan #TVKParty #ElectionCommission #VoterList #BJP #GyaneshKumar #BallotPaper #TNPolitics #BmNews #TamilNews #BreakingNewsTN #TamilNaduNews #LatestNews #TamilNewsLive
