மதுரை
மதுரை ஒத்தக்கடையில் நடைபெற்ற தென்மண்டல திமுக வழக்கறிஞர்கள் கலந்துரையாடல் கூட்டத்தில், “திமுகவின் கவனக்குறைவால்தான் தமிழக வெற்றிக் கழகம் ஆட்சிக்கு வந்தது” என முன்னாள் அமைச்சர் மூர்த்தி வெளிப்படையாகப் பேசியுள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது. இக்கூட்டத்தில் முன்னாள் அமைச்சர்கள் தங்கம் தென்னரசு, மூர்த்தி, தேனி எம்.பி. தங்க தமிழ்செல்வன், திமுக சட்டத்துறை செயலாளர் என்.ஆர்.இளங்கோ உள்ளிட்ட பல முக்கிய நிர்வாகிகள் கலந்துகொண்டனர்.
திமுகவின் இறுமாப்பே காரணம்:
கூட்டத்தில் உரையாற்றிய முன்னாள் அமைச்சர் மூர்த்தி, “நடந்து முடிந்த சட்டமன்றத் தேர்தல் முடிவுகள் நாம் யாரும் சற்றும் எதிர்பாராத வகையில் அமைந்துவிட்டன. களத்தில் நாம் அதிமுகவை எதிர்த்துதான் தீவிரமாகக் களமாடினோம். ஆனால், எதிர்பாராதவிதமாகத் தமிழக வெற்றிக் கழகம் ஆட்சிக்கு வந்துவிட்டது. இதற்கு நமது கட்சியின் கவனக்குறைவும், இறுமாப்பும்தான் முக்கியக் காரணமாகும்.
உதயநிதி கைதால் மாபெரும் எழுச்சி:
திமுகவில் எப்போதுமே உணர்வோடும் துடிப்போடும் செயல்படும் ஒரு படையாக வழக்கறிஞர் அணி இருந்து வருகிறது. திமுக ஆட்சியை இழந்து, தொண்டர்கள் சோர்வடைந்திருந்த இந்தச் சூழலில், நமது தலைவர் உதயநிதி ஸ்டாலினை போலீசார் விசாரணைக்கு அழைத்துச் சென்றதை எதிர்த்து நடைபெற்ற தீவிரப் போராட்டங்கள், கட்சியினரிடையே மீண்டும் ஒரு மிகப்பெரிய அரசியல் எழுச்சியை ஏற்படுத்தி உள்ளது,” என்று தெரிவித்தார்.
‘ரீல்ஸ்’ மூலம் ஆட்சிக்கு வந்த தவெக:
நிகழ்ச்சியில் தேனி நாடாளுமன்ற உறுப்பினர் தங்கத் தமிழ்செல்வன் பேசுகையில், “சமூக வலைதளங்களில் பரப்பப்பட்ட ‘ரீல்ஸ்’ உள்ளிட்ட கவர்ச்சிப் பிரச்சாரங்கள் மூலமாகவே தமிழக வெற்றிக் கழகம் இன்று ஆட்சிக்கு வந்துள்ளது. தேர்தலின்போது தவெக அளித்த பல்வேறு வாக்குறுதிகளை இதுவரை நிறைவேற்றவில்லை. தமிழக வெற்றிக் கழக ஆட்சியில், இதுநாள் வரை குறிப்பிடத்தக்க எந்தவொரு புதிய திட்டங்களும் கொண்டுவரப்படவில்லை. மக்கள் தற்போது அமைதியாக மௌனமாக உள்ளனர். அந்த மௌனம் விரைவில் நமக்குச் சாதகமாக அமையும். திமுக மீண்டும் வலுப்பெற்று நிச்சயம் ஆட்சியில் அமரும்,” எனத் தெரிவித்தார்.
2001-ஆம் ஆண்டின் உணர்வு:
முன்னாள் அமைச்சர் தங்கம் தென்னரசு தனது பேட்டியில், “உதயநிதி ஸ்டாலினை போலீசார் விசாரணைக்கு அழைத்துச் சென்ற சம்பவத்தைத் தொடர்ந்து, கடந்த ஒரு வாரத்தில் திமுகவினரிடையே மிகப்பெரிய அளவிலான எழுச்சி ஏற்பட்டுள்ளது. சிறு சோர்வில் இருந்த தொண்டர்கள் வீறுகொண்டு மீண்டும் வீதிக்கு வந்துள்ளனர். 2001-ஆம் ஆண்டு நள்ளிரவில் தலைவர் கலைஞர் கைது செய்யப்பட்டபோது ஏற்பட்ட அதே கொந்தளிப்பான உணர்வு மீண்டும் தற்போது தட்டி எழுப்பப்பட்டுள்ளது.
2ஜி வழக்கில் ஆ.ராசா தனக்குத்தானே வாதாடி வெற்றி பெற்ற மாபெரும் வரலாறு தமிழகத்தில் உள்ளது. அந்த வகையில், உதயநிதி ஸ்டாலின் தொடர்பான வழக்கு மற்றும் கொளத்தூர் தொகுதி மின்னணு வாக்குப்பதிவு இயந்திரம் தொடர்பான வழக்கு ஆகிய இரண்டையும் திமுக வழக்கறிஞர் அணி மிகச் சிறப்பாகக் கையாண்டது,” என்று அவர் பாராட்டினார்.
கொளத்தூர் வாக்குப்பதிவு இயந்திரங்களில் கோளாறு:
திமுக சட்டத்துறை செயலாளர் என்.ஆர்.இளங்கோ பேசுகையில், “சென்னை கொளத்தூர் தொகுதியில் ஒவ்வொரு வாக்குச்சாவடியிலும் தலா 5 வாக்குப்பதிவு இயந்திரங்கள் செயல்படவில்லை. ஒட்டுமொத்தமாக 30 சதவீதத்துக்கும் அதிகமான இயந்திரங்களில் கோளாறு இருந்தது.
திமுக வழக்கறிஞர்களுக்கு வெறும் அரசியல் உணர்வு மட்டுமின்றி, சட்டம் குறித்த ஆழமான அறிவும் மிகவும் அவசியம். சட்டத்திற்குப் புறம்பான கைது நடவடிக்கைகள் இனி நடைபெற்றால், அவற்றை எதிர்த்துச் சட்டரீதியாகவும் ஜனநாயக ரீதியாகவும் போராட வேண்டிய முழுப் பொறுப்பு திமுக வழக்கறிஞர்களுக்கு உள்ளது,” எனத் திட்டவட்டமாகத் தெரிவித்தார்.
#DMK #FormerMinisterMoorthy #ThangamThennarasu #ThangaTamilselvan #NRElango #UdhayanidhiStalin #TVKGovernment #ThalapathyVijay #Madurai #TNPolitics #TamilNaduNews #Chennai #ViralNewsTN #TrendingTN #LatestNewsTN #EVM #Kolathur
