தேனி
தமிழ்நாட்டில் அரிசி தட்டுப்பாடு என்ற பேச்சுக்கே இடமில்லை எனத் தமிழ்நாடு அரிசி ஆலை உரிமையாளர்கள் மற்றும் நெல் அரிசி வணிகர்கள் சங்கங்களின் தலைவர் துளசிங்கம் திட்டவட்டமாகத் தெரிவித்துள்ளார்.
5% ஜி.எஸ்.டி. வரியை ரத்து செய்ய வலியுறுத்தல்:
தேனியில் நடைபெற்ற சங்கத்தின் மாநிலப் பொதுக்குழு கூட்டத்திற்குப் பின் செய்தியாளர்களைச் சந்தித்த அவர், “முதலமைச்சர் விஜய் வேளாண் சார்ந்த தொழில்களுக்குப் பல சிறப்பான திட்டங்களைச் செயல்படுத்தி வருகிறார். தற்போது 26 கிலோவிற்கு கீழ் உள்ள அரிசி விற்பனைக்கு விதிக்கப்பட்டுள்ள 5 சதவீத ஜி.எஸ்.டி. வரியை முழுமையாக ரத்து செய்ய வேண்டும். இதன் மூலம் அரிசி விலை கிலோவிற்கு ரூ.2 முதல் ரூ.3 வரை குறைய வாய்ப்புள்ளது. மேலும், ஒழுங்குமுறை விற்பனைக்கூடங்களுக்கு விவசாயிகள் கொண்டு செல்லும் நெல்லுக்கு 1 சதவீதம் மட்டுமே ஜி.எஸ்.டி. விதிக்கப்பட வேண்டும்,” என்று முக்கியக் கோரிக்கையை முன்வைத்தார்.
“அரிசி தட்டுப்பாடு என்ற பேச்சுக்கே இடமில்லை”:
தொடர்ந்து பேசிய அவர், “தமிழ்நாட்டில் அரிசி தட்டுப்பாடு என்ற பேச்சிற்கே துளியும் இடமில்லை. கர்நாடகா, கேரளா மற்றும் தமிழ்நாட்டின் பல பகுதிகளில் நல்ல மழைப்பொழிவு இருப்பதால், வருங்காலத் தேவைகளுக்கும் சேர்த்து அரிசி அதிகளவில் இருப்பு வைக்கப்பட்டுள்ளது. மற்ற அத்தியாவசியப் பொருட்களின் விலையை விடத் தமிழ்நாட்டில் அரிசியின் விலை குறைவாகவே உள்ளது,” என மக்களுக்கு உறுதியளித்தார்.
சூரிய ஒளி மின்சாரத்திற்கு 50% மானியம்:
மேலும், “தமிழ்நாட்டில் வீடுகளுக்குச் சூரிய ஒளி மின்சாரத்திற்கு அரசு மானியம் வழங்குவது போல, அரிசி ஆலைகளுக்கும் 50 சதவீத மானியத்துடன் சூரிய ஒளி மின்சாரம் வழங்கத் தவெக அரசு உரிய நடவடிக்கை எடுத்தால், அது ஆலை உரிமையாளர்களுக்குப் பேருதவியாக இருக்கும்,” என்றும் துளசிங்கம் தமிழக அரசுக்குக் கோரிக்கை விடுத்துள்ளார்.
#TamilNaduRice #NoRiceShortage #RicePriceTN #TheniNews #GSTOnRice #Thulasingam #TVKGovernment #ChiefMinisterVijay #JosephVijay #ThalapathyVijay #TamilNaduNews #TNPolitics #ViralNewsTN #TrendingTN #LatestNewsTN #TNNewsUpdates
