சென்னை
சென்னை உயர் நீதிமன்றத்திற்குப் புதிதாக 15 நீதிபதிகளை நியமித்துக் குடியரசுத் தலைவர் திரௌபதி முர்மு அதிரடியாக உத்தரவு பிறப்பித்துள்ளார்! இதன் மூலம் உயர் நீதிமன்ற நீதிபதிகளின் மொத்த எண்ணிக்கை 66 ஆக உயர்ந்துள்ளது.
சென்னை உயர் நீதிமன்றத்தில் நீண்ட நாட்களாகக் காலியாக உள்ள நீதிபதிகள் பணியிடங்களை நிரப்பும் வகையில், மூத்த நீதிபதிகள் அடங்கிய கொலீஜியம் 19 பேரின் பெயர்களைப் பரிந்துரை செய்திருந்தது. இதனை ஆய்வு செய்த உச்ச நீதிமன்ற கொலீஜியம், மத்திய சட்டத்துறைக்குப் பரிந்துரை செய்தது. இதை ஏற்றுக்கொண்ட மத்திய அரசு, இறுதி ஒப்புதலுக்காகக் குடியரசுத் தலைவருக்குப் பட்டியலை அனுப்பிய நிலையில், தற்போது அதில் 15 பேரை சென்னை உயர் நீதிமன்ற நீதிபதிகளாக நியமிக்கக் குடியரசுத் தலைவர் திரௌபதி முர்மு அதிகாரப்பூர்வமாக ஒப்புதல் வழங்கி உத்தரவிட்டுள்ளார்.
புதிய நீதிபதிகள் யார் யார்?
பதவியேற்க உள்ள 15 பேரில், 8 பேர் வழக்கறிஞர்களாகவும், 7 பேர் மாவட்ட நீதிபதிகளாகவும் பணியாற்றியவர்கள் ஆவர்.
-
வழக்கறிஞர்கள் (8 பேர்): என். ரமேஷ், ஜி.கே. முத்துக்குமார், ஆர்.ஆர். விவேகானந்தன், எஸ். ரவிக்குமார், என். திலீப்குமார், ஏ. மனோகரன், கே. கோவிந்தராஜன் மற்றும் ரஜ்னீஷ் பாத்தியில்.
-
மாவட்ட நீதிபதிகள் (7 பேர்): பி. முருகன், எம்.டி. சுமதி, எஸ். அல்லி, சி. திருமகள் சந்திரசேகர், எஸ். கார்த்திகேயன், பி. முருகேசன் மற்றும் என். குணசேகரன்.
ஓய்வு பெற்ற நீதிபதிக்கு ஜாக்பாட் வாய்ப்பு:
இந்த நியமனப் பட்டியலில் இடம்பெற்றுள்ள மாவட்ட நீதிபதி எஸ். அல்லி, கடந்த மாதம்தான் ஓய்வு பெற்றார் என்பது குறிப்பிடத்தக்கது. ஆனால், அவர் ஓய்வு பெறுவதற்கு முன்பாகவே அவரது பெயர் உயர் நீதிமன்ற நீதிபதிகள் பரிந்துரைப் பட்டியலில் இடம்பெற்றுவிட்டதால், உயர் நீதிமன்ற நீதிபதிகளுக்கான வயது வரம்பின் அடிப்படையில் அவர் இன்னும் 2 ஆண்டுகள், அதாவது 2028-ஆம் ஆண்டு வரை நீதிபதியாகத் தொடர்வார் எனத் தெரிவிக்கப்பட்டுள்ளது.
தற்போதைய 15 நீதிபதிகள் நியமனத்தின் மூலம் சென்னை உயர் நீதிமன்றத்தில் காலியிடங்களின் எண்ணிக்கை 9 ஆகக் குறைந்துள்ளது. இந்த 9 காலிப் பணியிடங்களும் உச்ச நீதிமன்ற கொலீஜியத்தின் அடுத்தகட்டப் பரிந்துரைப்படி விரைவில் நிரப்பப்படும் என எதிர்பார்க்கப்படுகிறது.
#MadrasHighCourt #NewJudgesAppointed #PresidentMurmu #SupremeCourtCollegium #Chennai #TamilNaduNews #LegalNewsIndia #TNNewsUpdates #LatestNewsTN #TrendingTN #ViralNews
