மயிலாடுதுறை:
செய்தியாளர் சந்திப்பு
மயிலாடுதுறையில் உள்ள மார்க்சிஸ்ட் கம்யூனிஸ்ட் கட்சியின் மாவட்ட அலுவலகத்தில், அக்கட்சியின் மாநிலச் செயலாளர் பெ.சண்முகம் நேற்று (ஆகஸ்ட் 25) செய்தியாளர்களைச் சந்தித்துப் பேசினார்.
3 கோப்புகள் விவகாரம் குறித்த கருத்து
அப்போது, தனது மேசையில் மூன்று ஃபைல்கள் இருப்பதாக முதலமைச்சர் விஜய் தெரிவித்த கருத்திற்குப் பதிலளித்துப் பேசிய அவர், “தவறு செய்திருந்தால் உரிய நடவடிக்கை எடுக்க வேண்டியதுதான். அதற்காக, கோப்புகள் இருப்பதாகக் கூறி மிரட்டும் வகையில் பேசக்கூடாது,” என்று திட்டவட்டமாகக் கூறினார்.
மதச்சார்பின்மை பிரச்சார இயக்கம்
முன்னதாகப் பேசிய அவர், “ஆகஸ்ட் 26 முதல் 31 வரை மாநிலம் முழுவதும் பா.ஜ.க. மற்றும் ஆர்.எஸ்.எஸ். அமைப்புகளின் வெறுப்பு அரசியல் மற்றும் சிறுபான்மையினருக்கு எதிரான வன்முறைகளைக் கண்டித்தும், மக்களை நேரடியாகச் சந்தித்து மதச்சார்பின்மையின் முக்கியத்துவத்தை அவர்கள் மத்தியில் பிரச்சாரம் செய்யவும் தீர்மானிக்கப்பட்டுள்ளது.”
100 நாள் வேலைத்திட்டம் மற்றும் விவசாயத் தொழிலாளர்கள் நலன்
“மகாத்மா காந்தி தேசிய ஊரக வேலை உறுதி திட்டத்தில் செய்யப்பட்ட மாற்றங்களால் கிராமப்புற மக்கள் வேலைவாய்ப்பை இழந்து புலம்பெயரும் நிலை உருவாகியுள்ளது. எனவே 125 நாட்கள் வேலை, அதற்கான உரிய கூலி மற்றும் போதுமான நிதி ஒதுக்கீட்டை மத்திய அரசு உறுதி செய்ய வேண்டும். இதற்கான நிதியைத் தருமாறு மத்திய அரசிடம் மாநில அரசுகள் வலியுறுத்த வேண்டும். வேலையில்லாமல் பாதிக்கப்பட்டுள்ள விவசாயத் தொழிலாளர்களுக்கு உரிய நிவாரணம் வழங்க முன்வர வேண்டும்.”
தமிழக அரசின் திட்டங்களுக்கு வரவேற்பும் வாக்குறுதிகளும்
“மகளிருக்கு பேருந்துகளில் கட்டணமில்லாமல் பயணம் செய்யும் திட்டம், கட்டணமில்லா மூன்று சிலிண்டர் வழங்கும் திட்டம், பரந்தூர் விமான நிலையத்தைக் கைவிடும் திட்டம் ஆகிய தமிழ்நாடு அரசின் அறிவிப்புகள் வரவேற்கத்தக்கவை. அதே நேரத்தில், தமிழக வெற்றிக் கழகம் தேர்தல் வாக்குறுதிகளில் அறிவித்த அனைத்தையும் முழுமையாக நிறைவேற்றிட வேண்டும்.”
விவசாயிகளுக்கான நிவாரணக் கோரிக்கை
“குறுவை சாகுபடி பாதிக்கப்பட்டுள்ள நிலையில், விவசாயிகளுக்கு ஏக்கருக்கு 15 ஆயிரம் ரூபாய் நிவாரணம் வழங்க வேண்டும். சாகுபடி செய்யப்பட்டு, தற்போது மழையினால் பாதிக்கப்பட்ட பயிர்களுக்கு ஏக்கருக்கு ரூ.30 ஆயிரம் நிவாரணம் வழங்க வேண்டும்.”
காவிரி விவகாரம் மற்றும் அனைத்துக் கட்சிக் கூட்டம்
“காவிரி பிரச்சினையில், நமக்கு உபரி நீர் மட்டுமே திறந்து விடப்படுகிறது; உரிய நீரைத் தருவதில்லை. இதனை நீதிமன்றத்தில் நாம் அழுத்தமாகப் பதிவு செய்ய வேண்டும். தமிழர்கள் அனைவரும் இந்தப் பிரச்சினையில் ஒற்றுமையாக இருக்கிறார்கள் என்று வெளிப்படுத்துவதற்கு அனைத்துக் கட்சிக் கூட்டத்தை முதலமைச்சர் கூட்ட வேண்டும். மேலும், சம்பா சாகுபடிக்குத் தண்ணீர் திறக்கும் தேதி குறித்து தமிழ்நாடு அரசு அதிகாரப்பூர்வ அறிவிப்பை வெளியிட வேண்டும்,” என்று அவர் தெரிவித்தார்.
#CPIM #Shanmugam #ChiefMinisterVijay #TVKGovernment #TamilNaduPolitics #Mayiladuthurai #CauveryIssue #FarmersRelief #ParandurAirport #FreeBusScheme #MGNREGA #Secularism #TNPolitics #DMK #BJP #TamilNews #LatestNewsTN #TrendingTN #TNNewsUpdates #PoliticalUpdates
