சென்னை:
நடந்து முடிந்த 2026 தமிழக சட்டமன்றத் தேர்தலில், கொளத்தூர் தொகுதியில் முறையாகத் தேர்தல் நடைபெறவில்லை என்பதற்கான ஆதாரங்கள் உள்ளதாகத் திமுக பகிரங்கமாகக் குற்றம் சாட்டியுள்ளது. இத்தேர்தலில் கொளத்தூர் தொகுதியில் போட்டியிட்ட முன்னாள் முதலமைச்சரும், திமுக தலைவருமான மு.க.ஸ்டாலினை எதிர்த்து, தவெக சார்பில் வி.எஸ்.பாபு களமிறங்கினார். தேர்தல் முடிவுகளில் மு.க.ஸ்டாலினை விட வி.எஸ்.பாபு 8,795 வாக்குகள் அதிகம் பெற்று வெற்றி பெற்றார். தேர்தல் முடிவுகள் வெளியாகி 2 மாதங்களுக்கும் மேலாகியுள்ள நிலையில், கொளத்தூர் தொகுதிக்கு உட்பட்ட 14 வாக்குச்சாவடிகளில் பதிவான மின்னணு வாக்குப்பதிவு இயந்திரங்களை (EVM) மறுஆய்வு செய்ய வேண்டும் எனத் திமுக தரப்பில் தேர்தல் ஆணையத்திடம் கோரிக்கை வைக்கப்பட்டது.
இதையடுத்து, சீல் வைக்கப்பட்டுப் பாதுகாப்பாக வைக்கப்பட்டிருந்த கொளத்தூர் தொகுதிக்குப் பயன்படுத்தப்பட்ட மின்னணு வாக்குப்பதிவு இயந்திரங்களை ஆய்வு செய்யும் பணி கடந்த 29-ஆம் தேதி முதல் நடைபெற்று வருகிறது. மாநகராட்சி ஆணையர் சமீரன் முன்னிலையில் இவிஎம் இயந்திரங்கள் திறக்கப்பட்டு ஆய்வு செய்யப்பட்டன. திமுக சார்பில் மூத்த வழக்கறிஞர் என்.ஆர்.இளங்கோ உள்ளிட்டோரும், தவெக சார்பில் வி.எஸ்.பாபுவின் பிரதிநிதிகள் மற்றும் வழக்கறிஞர்களும் பங்கேற்றனர். ஒரு நாளைக்கு 2 வாக்குச்சாவடிகள் வீதம் மொத்தம் 14 வாக்குச்சாவடிகளுக்கு 7 நாட்களாக இந்த வாக்கு இயந்திரங்கள் சரிபார்க்கும் பணி நடைபெற்று வருகிறது. இன்று 4-வது நாளாக வாக்கு இயந்திரங்கள் சரிபார்க்கும் பணி நடந்தது.
இந்நிலையில், ஆய்வுக்குப் பின் செய்தியாளர்களிடம் பேசிய திமுக மூத்த வழக்கறிஞர் என்.ஆர்.இளங்கோ, \”கொளத்தூர் தொகுதியில் தேர்தல் முறையாக நடைபெறவில்லை என்பதற்கான ஆதாரங்கள் கிடைத்துள்ளன. இதுவரை ஆய்வு செய்யப்பட்ட 8 இயந்திரங்களில் 3 இயந்திரங்கள் சரியாக இல்லை. எனவே, இந்த முறைகேடு தொடர்பாக திமுக தலைவர் மு.க.ஸ்டாலினின் அறிவுறுத்தலின்படி விரைவில் நீதிமன்றத்தை நாடுவோம்\” என்று அதிரடியாகத் தெரிவித்துள்ளார். முன்னாள் முதலமைச்சர் போட்டியிட்ட தொகுதியிலேயே தேர்தல் முறைகேடு நடந்திருப்பதாகத் திமுக குற்றம் சாட்டியிருப்பது தமிழக அரசியல் வட்டாரத்தில் மாபெரும் அதிர்வலையை ஏற்படுத்தியுள்ளது.
#KolathurConstituency #MKStalin #EVM #DMK #BmNews #TamilNews #BreakingNewsTN #TamilNaduPolitics #TVK #VSBabu #PoliticalUpdate #ElectionCommission #TamilNewsLive
