சென்னை
கிருஷ்ணகிரி மாவட்டம் ஊத்தங்கரை தொகுதி த.வெ.க. எம்.எல்.ஏ. இளையராஜாவிடம் ரூ.35 கோடி குதிரைப் பேரம் பேசியதாக எழுந்த புகாரில், தமக்கு எந்தச் சம்பந்தமும் இல்லை என ஐ.பி.டி.எஸ். நிறுவனத் தலைவர் திருநாவுக்கரசு தெரிவித்துள்ளார்.
ரூ.35 கோடி பேரப் புகாரும் கைது நடவடிக்கையும்:
த.வெ.க. எம்.எல்.ஏ இளையராஜாவிடம் ஐ.பி.டி.எஸ் தேர்தல் கருத்துக்கணிப்பு நிறுவனத் தலைவர் திருநாவுக்கரசு தொலைபேசியில் ரூ.35 கோடி பேரம் பேசியதாக சென்னை மாநகர காவல் ஆணையரகத்தில் புகார் அளிக்கப்பட்டது. இதன் பேரில் திருவல்லிக்கேணி காவல்துறையினர் வழக்குப்பதிவு செய்து 14 பேரைக் கைது செய்து சிறையில் அடைத்தனர். இந்த வழக்கில் தொடர்புடையதாகக் கூறப்பட்ட முன்னாள் அமைச்சர் செந்தில் பாலாஜி மற்றும் அவரது சகோதரர் அசோக் குமார் முன்ஜாமீன் பெற்றனர்.
காவல் நிலையத்தில் ஆஜர்:
தற்போது ஜாமீனில் வெளியே வந்துள்ள 14 பேரில், ஐ.பி.டி.எஸ் நிறுவனத் தலைவர் திருநாவுக்கரசு நீதிமன்ற நிபந்தனை ஜாமீன் அடிப்படையில் இன்று (ஆகஸ்ட் 13) சென்னை திருவல்லிக்கேணி காவல் நிலையத்தில் நேரில் ஆஜராகிக் கையெழுத்திட்டார்.
“2 மாதங்களில் ஆதாரங்களை வெளியிடுவேன்”:
பின்னர் செய்தியாளர்களிடம் பேசிய திருநாவுக்கரசு, “ஐ.பி.டி.எஸ் நிறுவனம் பல ஆண்டுகளாக நேர்மையாகச் செயல்பட்டு வருகிறது. குதிரைப் பேரத்திற்கும் எனக்கும் எந்தச் சம்பந்தமும் இல்லை. என் மீது போடப்பட்டது முற்றிலும் பொய் வழக்கு; இதனைச் சட்டரீதியாக எதிர்கொண்டு உண்மைய நிரூபிப்பேன். யூடியூப் மற்றும் சமூக வலைதளங்களில் அவதூறு பரப்புவோர் மீது கடுமையான வழக்கு தொடரப்படும். இன்னும் இரண்டு மாதங்களில் மீண்டும் செய்தியாளர்களைச் சந்தித்து, எனக்கும் முன்னாள் அமைச்சர் செந்தில் பாலாஜிக்கும் என்ன தொடர்பு என்பது உள்ளிட்ட அனைத்து ஆதாரங்களையும் வெளியிடுவேன். தர்மம் ஒருநாள் வெல்லும்,” என்று உணர்ச்சிவசப்பட்டுத் தெரிவித்தார்.
#IPTS #Thirunavukkarasu #HorseTrading #TVKMLA #SenthilBalaji #ChennaiPolice #Triplicane #TNPolitics #TamilNaduNews #Chennai #ViralNewsTN #TrendingTN #LatestNewsTN #TNNewsUpdates
