கரூர்:

திமுக முன்னாள் அமைச்சரும், முக்கிய அரசியல் பிரமுகருமான செந்தில் பாலாஜியின் வீடு மற்றும் அவருக்குத் தொடர்புடைய இடங்களில் இன்று காலை முதல் லஞ்ச ஒழிப்புத்துறை போலீசார் அதிரடி சோதனையில் ஈடுபட்டு வருவது அரசியல் வட்டாரத்தில் பெரும் பரபரப்பை ஏற்படுத்தியுள்ளது. அரசு வேலை வாங்கித் தருவதாகக் கூறி மோசடி செய்த வழக்கு, டாஸ்மாக்கில் சுமார் ரூ.1000 கோடி முறைகேடு செய்த புகார் மற்றும் மின்சார வாரியத்திற்கு டிரான்ஸ்பார்மர்கள் வாங்கியதில் ரூ.397 கோடி ஊழல் என அவர் மீது பல வழக்குகள் நிலுவையில் உள்ளன. இதற்கிடையே, தற்போதைய தவெக அரசை கவிழ்க்க சதித்திட்டம் தீட்டியதாகத் தொடரப்பட்ட வழக்கில் செந்தில் பாலாஜி மற்றும் அவரது சகோதரர் அசோக்குமார் ஆகியோர் திருவல்லிக்கேணி காவல் நிலையத்தில் தினமும் ஆஜராகி கையெழுத்திட்டு வருகின்றனர். இவர்களிடம் துணை ஆணையர் ஜெயச்சந்திரன் தலைமையிலான உயர்மட்ட போலீசார் தீவிர விசாரணை மேற்கொண்டு வருகின்றனர்.

இந்த பரபரப்பான சூழலில், இன்று காலை 7 மணி முதல் கரூரில் ராமேஸ்வரபட்டியில் உள்ள செந்தில் பாலாஜியின் வீட்டில் லஞ்ச ஒழிப்புத்துறை போலீசார் திடீர் சோதனையைத் தொடங்கினர். பத்துக்கும் மேற்பட்ட அதிகாரிகள் பலத்த போலீஸ் பாதுகாப்புடன் இந்த சோதனையில் தீவிரமாக ஈடுபட்டுள்ளனர். செந்தில் பாலாஜியின் வீடு மட்டுமின்றி, மண்மங்கலம் அருகே உள்ள அவரது பூர்வீக வீடு, அவரது உதவியாளர் சுப்பிரமணியின் வீடு, திமுக நிர்வாகி பாஸ்கரன் வீடு மற்றும் கோதைநகர் பகுதியில் உள்ள கார்த்தி, ரமேஷ் ஆகியோரின் வீடுகள் என மொத்தம் 5-க்கும் மேற்பட்ட இடங்களில் லஞ்ச ஒழிப்பு போலீசார் ஒரே நேரத்தில் சல்லடை போட்டுத் தேடி வருகின்றனர்.

மேலும், கரூர் தொழிற்பேட்டையில் அமைந்துள்ள டாஸ்மாக் மேலாளர் அலுவலகம் மற்றும் தொடர்புடைய முக்கிய இடங்களிலும் லஞ்ச ஒழிப்பு சோதனை தீவிரமாக நடைபெற்று வருகிறது. இந்தச் சோதனையின் ஒரு பகுதியாகச் செந்தில் பாலாஜியின் பெற்றோரிடமும் அதிகாரிகள் தீவிர விசாரணை நடத்தி வருவதாகத் தகவல்கள் வெளியாகியுள்ளன. தவெக அரசை கவிழ்க்க முயன்ற வழக்கின் தொடர்ச்சியாக இந்த சோதனை நடைபெறுகிறதா அல்லது டாஸ்மாக் மற்றும் மின்துறை ஊழல் புகார்களின் அடிப்படையில் நடைபெறுகிறதா என்பது குறித்த அதிகாரப்பூர்வ தகவல் இன்னும் வெளியாகவில்லை. அனைத்து இடங்களிலும் சோதனைகள் முழுமையாக நிறைவடைந்த பின்னரே இந்த ரெய்டு குறித்த முழு விவரமும் தெரியவரும் என லஞ்ச ஒழிப்புத்துறை வட்டாரங்கள் தெரிவிக்கின்றன. அரசியல் களத்தில் செந்தில் பாலாஜிக்கு நாளுக்கு நாள் நெருக்கடி முற்றி வரும் நிலையில், இந்த அடுத்தகட்ட அதிரடி ரெய்டு திமுக வட்டாரத்தில் பெரும் அதிர்ச்சியையும் கலக்கத்தையும் ஏற்படுத்தியுள்ளது.

#SenthilBalaji #DVACRaid #KarurNews #TamilNaduPolitics #BmNews #TasmacScam #TamilNews #PoliticalUpdate #BreakingNewsTN #DmkLeader #CorruptionCase #TvkGovernment #TamilNewsLive