புதிதாக உருவாக்கப்பட்டுள்ள இலங்கை கிரிக்கெட் (SLC) மாற்றக் குழுவின் (Transformation Committee) தலைவராக, ஐக்கிய மக்கள் சக்தியின் (SJB) முன்னாள் நாடாளுமன்ற உறுப்பினர் எரான் விக்கிரமரத்ன நியமிக்கப்பட்டுள்ளார்.
இந்த ஒன்பது பேர் கொண்ட குழுவில் எஞ்சிய உறுப்பினர்களாக ரோஷன் மகாநாம, குமார் சங்கக்கார, துஷிர ராதெல்ல, சிதத் வெட்டிமுனி, அவந்தி கொலம்பகே, பிரகாஷ் ஷாஃப்டர், உபுல் குமாரப்பெரும மற்றும் தினால் பிலிப்ஸ் ஆகியோர் நியமிக்கப்பட்டுள்ளனர்.
இலங்கை கிரிக்கெட் நிறுவனத்தின் தலைவர் ஷம்மி சில்வா மற்றும் அதன் செயற்குழு உறுப்பினர்கள் இன்று விளையாட்டுத்துறை அமைச்சரிடம் தமது ராஜினாமா கடிதங்களை சமர்ப்பித்ததைத் தொடர்ந்து இந்த நியமனம் வழங்கப்பட்டுள்ளது.
விளையாட்டுத்துறை அமைச்சர் சுனில் குமார கமகே அவர்களின் ராஜினாமாவை ஏற்றுக்கொண்டதாக விளையாட்டுத்துறை அமைச்சகம் அதிகாரப்பூர்வ அறிக்கையில் தெரிவித்துள்ளது.
மேலும், 1973ஆம் ஆண்டின் 25ஆம் இலக்க விளையாட்டுச் சட்டத்தின் 31 மற்றும் 34வது பிரிவுகளின் கீழ் அமைச்சருக்கு வழங்கப்பட்டுள்ள அதிகாரங்களின்படி, இலங்கை கிரிக்கெட் நிர்வாகம் உடனடியாக நடைமுறைக்கு வரும் வகையில் இளைஞர் விவகார மற்றும் விளையாட்டுத்துறை அமைச்சின் கீழ் தற்காலிகமாகக் கொண்டுவரப்பட்டுள்ளதாக அமைச்சகம் தெரிவித்துள்ளது.
கிரிக்கெட் நிர்வாகத்தில் தற்போதுள்ள பிரச்சினைகளுக்குத் தீர்வுகளைக் காண்பதற்கும், அதன் ஆட்சிமன்றக் கட்டமைப்பில் சீர்திருத்தங்களை நடைமுறைப்படுத்துவதற்கும் விரைவில் ஒரு குழு நியமிக்கப்படும் என்றும் அந்த அறிக்கையில் மேலும் தெரிவிக்கப்பட்டுள்ளது.
