ஒன்டாரியோவில் குறைந்தது 30 குற்றவியல் விசாரணைகளுடன் தொடர்புடைய போலி வாகன இலக்கத் தகடுகளை (Licence Plates) தயாரித்து விற்பனை செய்ததாகக் கூறப்படும் இருவர் கைது செய்யப்பட்டுள்ளதாக பீல் (Peel) பிராந்திய காவல்துறை தெரிவித்துள்ளது.
காவல்துறையின் செய்திக்குறிப்பின்படி, சாலை பாதுகாப்பு சேவைப் பிரிவின் விசாரணையாளர்கள், வாகனங்களில் பயன்படுத்துவதற்காக போலி இலக்கத் தகடுகளைத் தயாரித்து விற்பனை செய்து வந்த ஒரு பதிவு செய்யப்பட்ட ஆன்லைன் வணிகத்தைக் கண்டறிந்தனர்.
“நீண்ட கால விசாரணைக்கு” பிறகு, ஏப்ரல் 7 அன்று ஹாமில்டன் பகுதியில் உள்ள இரண்டு முகவரிகளில் சோதனை நடத்தப்பட்டது. அந்த நேரத்தில் இரண்டு சந்தேக நபர்களும் எவ்வித மோதலுமின்றி கைது செய்யப்பட்டதாக காவல்துறை உறுதிப்படுத்தியுள்ளது.
“போலி இலக்கத் தகடுகளைத் தயாரிக்கவும் விநியோகிக்கவும் பயன்படுத்தப்பட்ட உபகரணங்கள், பணம், தகடுகளை அச்சிடும் இயந்திரங்கள், பல்வேறு மாகாணங்களின் போலி வெற்றுத் தகடுகள், விளம்பரப் பொருட்கள் மற்றும் வாகனங்கள் ஆகியவற்றை அதிகாரிகள் பறிமுதல் செய்துள்ளனர்,” என்று புதன்கிழமை வெளியான செய்திக்குறிப்பில் தெரிவிக்கப்பட்டுள்ளது.
இந்த போலி இலக்கத் தகடுகள் மோசடி, திட்டமிடப்பட்ட வாகனத் திருட்டு, வன்முறை மற்றும் துப்பாக்கிச் சூடு தொடர்பான குற்றங்களில் பயன்படுத்தப்பட்டுள்ளதாகக் குற்றம் சாட்டப்பட்டுள்ளது. மேலும், இந்தத் தகடுகள் கனடாவின் ஏனைய பகுதிகளில் நடந்த குற்றச் செயல்களுடனும் தொடர்புபடுத்தப்பட்டுள்ளன.
குறிப்பாக, ஜூன் 12, 2025 அன்று காலை 8 மணியளவில் நடந்த ஒரு சம்பவத்தில், போலி இலக்கத் தகடு பொருத்தப்பட்ட திருடப்பட்ட வாகனத்தை ஓட்டி வந்த போதை ஓட்டுநர் ஒருவர், காவல்துறையினரிடம் இருந்து தப்பிச் செல்ல முயன்று டிக்ஸி சாலையில் (Dixie Road) விபத்துக்குள்ளானார். அந்தச் சந்தேக நபர் மற்றொரு வாகனத்தைக் கைப்பற்ற முயன்றபோது கைது செய்யப்பட்டார்.
“போலி வாகன இலக்கத் தகடுகள் பொதுப் பாதுகாப்பிற்குப் பாரிய அச்சுறுத்தலை ஏற்படுத்துகின்றன,” என்று பீல் பிராந்திய காவல்துறையின் துணைத் தலைமை அதிகாரி மார்க் ஆண்ட்ரூஸ் தெரிவித்துள்ளார்.
ஹாமில்டனைச் சேர்ந்த அவேரி மேக்லியோட்-நோல்க் (28) மற்றும் டைலர் மேத்யூ மேக்லியோட் (27) ஆகிய இருவர் மீது போலி அடையாளங்களை உருவாக்குதல், விற்பனை செய்தல், போலி அடையாளங்களை வைத்திருத்தல் மற்றும் குற்றச் செயல்கள் மூலம் பெறப்பட்ட சொத்துக்களை வைத்திருத்தல் உள்ளிட்ட பல குற்றச்சாட்டுகள் சுமத்தப்பட்டுள்ளன.
