சென்னை
நாடு முழுவதும் 80-வது சுதந்திர தினம் நாளை கோலாகலமாகக் கொண்டாடப்பட உள்ள நிலையில், சென்னை ஆளுநர் மாளிகையில் ஆண்டுதோறும் வழக்கமாக நடைபெறும் சுதந்திர தின தேநீர் விருந்து இந்த ஆண்டு நடைபெறாது என அதிகாரப்பூர்வமாக அறிவிக்கப்பட்டுள்ளது.
முதன்முறையாகக் கொடியேற்றும் முதல்வர் விஜய்:
தமிழ்நாட்டில் 80-வது சுதந்திர தின விழா நாளை உற்சாகமாகக் கொண்டாடப்படவுள்ளது. சென்னை புனித ஜார்ஜ் கோட்டையில் முதலமைச்சர் ச. ஜோசப் விஜய் முதன்முறையாகத் தேசியக் கொடியை ஏற்றி வைத்து மரியாதை செலுத்த உள்ளார்.
சென்னையில் ஆளுநர் பங்கேற்காதது ஏன்?:
தமிழ்நாட்டின் பொறுப்பு ஆளுநராக இருக்கும் ராஜேந்திர விஸ்வநாத் அர்லேகர், கேரள மாநிலத்திற்கு முழுநேர ஆளுநராகப் பதவி வகித்து வருகிறார். இதன் காரணமாக, அவர் நாளை கேரளாவில் நடைபெறும் சுதந்திர தின விழாக் கொண்டாட்டங்களில் கலந்துகொள்ள உள்ளதால், சென்னையில் நடைபெறும் சுதந்திர தின விழாவில் அவர் பங்கேற்கவில்லை என்று ஆளுநர் மாளிகை வட்டாரங்கள் தெரிவித்துள்ளன.
துணைத் தலைவரை வரவேற்க இரவு சென்னை வருகை:
இதற்கிடையே, இந்தியக் குடியரசுத் துணைத் தலைவர் சி.பி. ராதாகிருஷ்ணன் நாளை அரசு முறைப் பயணமாகத் தமிழ்நாடு வருகிறார். அவரை நேரில் வரவேற்பதற்காகப் பொறுப்பு ஆளுநர் ராஜேந்திர விஸ்வநாத் அர்லேகர் நாளை இரவு சென்னை வந்தடைவார் என ஆளுநர் மாளிகை அதிகாரிகள் தகவல் தெரிவித்துள்ளனர்.
தேநீர் விருந்து மற்றும் பரிசளிப்பு விழா ஒத்திவைப்பு:
சுதந்திர தினத்தை முன்னிட்டு ஆண்டுதோறும் ஆளுநர் மாளிகையில் முதலமைச்சர், உயர் நீதிமன்றத் தலைமை நீதிபதி, நீதிபதிகள், அமைச்சர்கள், எம்.எல்.ஏ.க்கள் மற்றும் பல்வேறு அரசியல் கட்சித் தலைவர்கள் பங்கேற்கும் பிரம்மாண்ட தேநீர் விருந்து நடைபெறுவது வழக்கம். மேலும், ‘வந்தே மாதரம்’ பாடல் இயற்றப்பட்டு 150-வது ஆண்டை ஒட்டி நடத்தப்பட்ட கட்டுரைப் போட்டிகளில் வெற்றி பெற்ற மாணவர்களுக்கான பரிசளிப்பு விழாவும் நாளை நடைபெறுவதாக இருந்தது. தற்போது ஆளுநர் கேரளாவில் இருப்பதால், தேநீர் விருந்து ரத்து செய்யப்படுவதாகவும், மாணவர்களுக்கான பரிசளிப்பு விழா வேறு ஒரு நாளில் நடைபெறும் என்றும் தெரிவிக்கப்பட்டுள்ளது.
அரசியல் சலசலப்புகளுக்கு மத்தியில் ரத்து:
தமிழ்நாட்டில் ஆளுநர் தேநீர் விருந்து அளிக்கும் போதெல்லாம் ஆளுங்கட்சி அல்லது எதிர்க்கட்சிகளில் யாராவது ஒரு தரப்பினர் அதில் கலந்துகொள்ளாமல் புறக்கணிப்பது அரசியல் ரீதியாகத் தொடர்கதையாகி வந்தது. இந்தச் சூழலில், இந்த ஆண்டு தேநீர் விருந்தே ரத்து செய்யப்பட்டுள்ளது அரசியல் வட்டாரத்தில் பேசுபொருளாகியுள்ளது.
#IndependenceDay #RajBhavanChennai #GovernorArlekar #ChiefMinisterVijay #JosephVijay #FortStGeorge #IndependenceDay2026 #CPRadhakrishnan #TamilNaduNews #Chennai #TNPolitics #ViralNewsTN #TrendingTN #LatestNewsTN #TNNewsUpdates
