அமெரிக்காவிற்கும் ஈரானுக்கும் இடையே புதிதாக அறிவிக்கப்பட்டுள்ள போர்நிறுத்த ஒப்பந்தத்தை கனடா வரவேற்பதாக அந்நாட்டுப் பிரதமர் கார்னி தெரிவித்துள்ளார். அத்துடன், ஹார்முஸ் நீரிணை (Strait of Hormuz) வழியேயான பாதுகாப்பான கப்பல் போக்குவரத்தை மீண்டும் நிலைநிறுத்துவதற்கான முயற்சிகளுக்கு ஆதரவளிக்க கனடா தயாராக உள்ளது என்றும் அவர் குறிப்பிட்டுள்ளார்.
பிரான்சில் நடைபெறவுள்ள ஜி7 (G7) உச்சிமாநாட்டிற்கு முன்னதாகப் பேசிய கார்னி, இந்த ஒப்பந்தமானது மத்திய கிழக்கில் பதற்றங்களைக் குறைப்பதற்கும் ஸ்திரத்தன்மையை மேம்படுத்துவதற்கும் எடுக்கப்பட்ட ஒரு முக்கியமான படியாகும் என வர்ணித்தார்.
“இந்த முன்னேற்றத்தை கனடா பெரிதும் வரவேற்கிறது” என்று கார்னி கூறினார்.
பிரான்ஸ், ஜெர்மனி, இத்தாலி மற்றும் ஐக்கிய இராச்சியம் (UK) ஆகிய நாடுகளின் தலைவர்களுடன் இணைந்து வெளியிடப்பட்ட கூட்டு அறிக்கையில், ஜி7 பங்காளிகள் இந்த ஒப்பந்தத்தை “பிராந்திய ஸ்திரத்தன்மையை மீட்டெடுப்பதற்கும் உலகளாவிய பொருளாதாரத்தை நிலைப்படுத்துவதற்கும் கிடைத்த ஒரு நல்ல வாய்ப்பு” என்று விவரித்துள்ளனர்.
மேலும், ஈரான் ஒருபோதும் அணு ஆயுதத்தைப் பெறக்கூடாது என்பதை வலியுறுத்திய ஜி7 தலைவர்கள், இது தொடர்பான விரிவான பேச்சுவார்த்தைகளை விரைவாக முடித்து, அவற்றை உடனடியாக நடைமுறைப்படுத்துமாறு கேட்டுக்கொண்டுள்ளனர்.
தொடர்ந்து கருத்து தெரிவித்த கார்னி, அனைத்து தரப்பினரும் பேச்சுவார்த்தையைத் தொடர வேண்டும் என்றும், மேலும் பதற்றங்கள் அதிகரிப்பதைத் தவிர்க்க வேண்டும் என்றும் வலியுறுத்தியதுடன், ராஜதந்திர முயற்சிகளுக்கு கனடா தொடர்ந்து ஆதரவளிக்கும் என்றும் கூறினார். உலகளாவிய வர்த்தகம் மற்றும் எரிசக்தி பாதுகாப்புக்கு (Energy security) ஹார்முஸ் நீரிணை வழியேயான பாதுகாப்பான போக்குவரத்தை உறுதி செய்வது தொடர்ந்து ஒரு முக்கிய முன்னுரிமையாக இருக்கும் என்றும் அவர் மேலும் கூறினார்.
இந்த வாரம் நடைபெறவுள்ள ஜி7 உச்சிமாநாட்டில், தற்போதைய போர்நிறுத்தம் மற்றும் மத்திய கிழக்கின் ஒட்டுமொத்த சூழ்நிலைகள் குறித்து முக்கியமாக விவாதிக்கப்படும் என எதிர்பார்க்கப்படுகிறது
