கனடாவின் பிரிட்டிஷ் கொலம்பியா (B.C.) மாகாணத்தில் உள்ள  (Surrey) நகரில், சுமார் 900,000 டொலர் பெறுமதியான சட்டவிரோத போதைப்பொருட்களை பொலிஸார் பறிமுதல் செய்துள்ளனர். இந்த விசாரணை நடவடிக்கையின் பலனாக வெளிநாட்டவர் ஒருவருக்கு எதிராகக் குற்றச்சாட்டுகள் சுமத்தப்பட்டுள்ளதுடன், மேலும் இரு வெளிநாட்டவர்கள் நாடுகடத்தப்பட்டுள்ளனர்.

‘புரொஜெக்ட் பாண்டம்’ (Project Phantom) எனப் பெயரிடப்பட்ட இந்த நான்கு மாத கால விசாரணை, கடந்த பெப்ரவரி மாதம் ஆரம்பிக்கப்பட்டது. சுரே நகரில் உள்ள ஒரு குடியிருப்புடன் தொடர்புடைய குழுவொன்று ‘ஃபெண்டானில்’ (Fentanyl) போதைப்பொருள் கடத்தலில் ஈடுபடுவதாகப் பொலிஸாருக்குக் கிடைத்த தகவலின் அடிப்படையிலேயே இந்த நடவடிக்கை முன்னெடுக்கப்பட்டது.

இதனைத் தொடர்ந்து, கடந்த மே 21 அன்று, கனடா எல்லைக் கட்டுப்பாட்டு முகவரகம் (CBSA) மற்றும் லோவர் மெயின்லேண்ட் அவசரகாலப் பிரிவு ஆகியவற்றின் உதவியுடன் பொலிஸார் அந்த வீட்டைச் சோதனையிட்டனர். இதன்போது, வெளிநாட்டவர்கள் என அடையாளம் காணப்பட்ட மூன்று ஆண்கள் கைது செய்யப்பட்டனர்.

இச்சோதனையின் போது பறிமுதல் செய்யப்பட்ட போதைப்பொருட்களின் விபரங்கள்:

• 15.9 கிலோகிராம் அபின் (Opium)

• 1.53 கிலோகிராம் கஞ்சா (Cannabis)

• 559 கிராம் கொகேயின் (Cocaine)

• 468 கிராம் ஃபெண்டானில் (Fentanyl)

• 148 கிராம் மெதாம்பேட்டமைன் (Methamphetamine)

• 35 கிராம் ஹெரோயின் (Heroin)

இதில் கைப்பற்றப்பட்ட ஃபெண்டானில் போதைப்பொருள் மட்டும் சுமார் 23,400 பேரின் உயிருக்கு ஆபத்தை விளைவிக்கக்கூடிய அளவைக் (Lethal doses) கொண்டது எனப் பொலிஸார் மதிப்பிட்டுள்ளனர்.

இச்சம்பவம் தொடர்பில் 24 வயதுடைய குர்ஜோத் சிங் (Gurjot Singh) என்பவருக்கு எதிராக, போதைப்பொருளைக் கடத்தும் நோக்குடன் கைவசம் வைத்திருந்தமை உள்ளிட்ட 5 குற்றச்சாட்டுகளும், கடத்தலில் ஈடுபட்டமைக்கான 1 குற்றச்சாட்டும் சுமத்தப்பட்டுள்ளன. அவர் தற்போது விளக்கமறியலில் வைக்கப்பட்டுள்ளதுடன், வரும் ஜூன் 26 அன்று நீதிமன்றத்தில் ஆஜர்படுத்தப்படவுள்ளார்.

கைது செய்யப்பட்ட ஏனைய இருவர் மீதும் குற்றவியல் குற்றச்சாட்டுகள் எதுவும் சுமத்தப்படாத நிலையில், அவர்கள் கனடா எல்லைக் கட்டுப்பாட்டு முகவரகத்தினால் (CBSA) ஏற்கனவே கனடாவிலிருந்து நாடுகடத்தப்பட்டுள்ளனர்.