தனது உயர்தரப் பாடசாலைக் கல்விச் சான்றிதழின் சட்டபூர்வத்தன்மை தொடர்பில் எழுந்த கடும் சர்ச்சைகளைத் தொடர்ந்து, இந்தோனேசிய உப ஜனாதிபதி கிப்ரான் ரகபுமிங் ராகா (Gibran Rakabuming Raka) தனது பதவியிலிருந்து இராஜினாமா செய்துள்ளார். அந்நாட்டில் நிலவும் பொருளாதார நெருக்கடி, ஊழல் மற்றும் காட்டுத்தீயைக் கட்டுப்படுத்துவதில் அரசாங்கம் தோல்வியடைந்தமை ஆகியவற்றை முன்னிறுத்தி, மக்கள் மத்தியில் கடும் அதிருப்தி ஏற்பட்டுள்ள பின்னணியிலேயே இந்த இராஜினாமா இடம்பெற்றுள்ளதாக ஏ.எஃப்.பி (AFP) செய்திச் சேவை சுட்டிக்காட்டியுள்ளது.
39 வயதான கிப்ரான், அந்நாட்டு வரலாற்றில் மிக இளம் வயது உப ஜனாதிபதியாகப் பதவியேற்று இரண்டு வருடங்கள் பூர்த்தியாவதற்கு முன்னதாகவே, தனது இராஜினாமா கடிதத்தை ஜனாதிபதி பிரபோவோ சுபியாந்தோ மற்றும் பாராளுமன்றத்திடம் கையளித்துள்ளார். ஊடகங்களுக்குக் கருத்துத் தெரிவித்த ஜனாதிபதி பிரபோவோ சுபியாந்தோ, “மிகுந்த மனவருத்தத்துடன் நான் இந்த இராஜினாமாவை ஏற்றுக்கொள்கின்றேன்; நாட்டினதும் மக்களினதும் நலன் கருதி அவர் எடுத்துள்ள இத்தீர்மானத்தைப் பாராட்டுகின்றேன்,” எனத் தெரிவித்துள்ளார்.
எவ்வாறாயினும், காணொளிச் செய்தியொன்றை வெளியிட்டுள்ள கிப்ரான் ரகபுமிங், இது தனது தனிப்பட்ட தீர்மானம் எனவும், உயர்தரப் பாடசாலைச் சான்றிதழ் தொடர்பான சர்ச்சைக்கும் இதற்கும் எவ்விதத் தொடர்புமில்லை எனவும் குறிப்பிட்டுள்ளார். வெளிநாட்டில் தான் பூர்த்தி செய்த அனைத்துக் கல்வி ஆவணங்களும் சட்டபூர்வமாகத் தன்னிடம் உள்ளதாகவும், அவை ஏற்கெனவே நீதிமன்றத்தில் சமர்ப்பிக்கப்பட்டுள்ளதாகவும் அவர் வலியுறுத்தியுள்ளார்.
சிங்கப்பூரில் பாடசாலைக் கல்வியைப் பெற்று, பின்னர் சந்தைப்படுத்தல் துறையில் பட்டப்படிப்பை முடித்துள்ள கிப்ரான், 2024ஆம் ஆண்டுத் தேர்தலில் போட்டியிட்டபோது தனது வெளிநாட்டுக் கல்வித் தகைமைகள் இந்தோனேசியாவின் தொழிற்கல்வி உயர்தரப் பாடசாலைக் கல்விக்குச் சமமானவை எனக் குறிப்பிடும் சான்றிதழொன்றைச் சமர்ப்பித்திருந்தார்.
ஆயினும், கடந்த மாதம் இந்தோனேசிய உயர் நீதிமன்றம் (உச்ச நீதிமன்றம்) குறித்த ஆவணத்தை இரத்துச் செய்ய உத்தரவிட்டதைத் தொடர்ந்து, அவரைப் பதவியிலிருந்து நீக்குவதற்கான நடவடிக்கைகள் பாராளுமன்றத்தில் ஆரம்பிக்கப்பட்டன.
இந்தோனேசிய அரசியலமைப்பிற்கு அமைய, வெற்றிடமாகியுள்ள உப ஜனாதிபதி பதவிக்காக இரு பெயர்களைப் பரிந்துரைப்பதற்கு ஜனாதிபதிக்கு 14 நாட்கள் கால அவகாசம் வழங்கப்பட்டுள்ளதுடன், அதனைத் தொடர்ந்து இரண்டு மாதங்களுக்குள் பாராளுமன்றத்தினால் புதிய உப ஜனாதிபதி ஒருவர் தெரிவு செய்யப்பட வேண்டும்.
கிப்ரான் ரகபுமிங், 2014 முதல் 2024 வரை இந்தோனேசியாவில் இரு தடவைகள் ஜனாதிபதியாகப் பதவி வகித்த பிரபல அரசியல்வாதியான ஜோக்கோ விடோடோவின் (ஜோகோவி) மூத்த புதல்வராவார். ஜனாதிபதித் தேர்தல்களில் எதிரணியினராகப் போட்டியிட்ட ஜோகோவி மற்றும் தற்போதைய ஜனாதிபதி பிரபோவோ சுபியாந்தோ ஆகியோருக்கு இடையில் ஏற்பட்ட அரசியல் கூட்டணியின் விளைவாகவே, கிப்ரான் உப ஜனாதிபதி வேட்பாளராகப் பெயரிடப்பட்டிருந்தார்.
இதேவேளை, அண்மைய வாரங்களில் ஏற்பட்டுள்ள பொருளாதார நெருக்கடிகள், ஆட்சியாளர்களின் சர்வாதிகாரப் போக்கு மற்றும் நச்சுப் புகையை வெளியேற்றியவாறு பல மாதங்களாக நீடித்த அழிவுகரமான காட்டுத்தீயைக் கட்டுப்படுத்த அரசாங்கம் தவறியமை ஆகியவற்றைக் கண்டித்து, பொதுமக்கள் வீதிகளில் இறங்கிப் பாரிய போராட்டங்களில் ஈடுபட்டனர்.
மேலும், ஜனாதிபதியின் தொலைபேசி உரையாடல்களை இரகசியமாக ஒட்டுக்கேட்ட குற்றச்சாட்டில் முன்னாள் பொலிஸ் மா அதிபர் உள்ளிட்ட சிரேஷ்ட அதிகாரிகள் குழுவொன்று கைது செய்யப்பட்டு, இராஜதுரோகக் குற்றச்சாட்டின் கீழ் விசாரணைகள் ஆரம்பிக்கப்பட்டுள்ள நிலையில், ஜனாதிபதி பிரபோவோவின் அரசாங்கம் கடும் அரசியல் நெருக்கடிக்கு முகங்கொடுத்துள்ளது. கிப்ரானின் இராஜினாமாவுடன், ஜோகோவி தரப்பினருக்கும் தற்போதைய ஜனாதிபதிக்கும் இடையில் நிலவும் கூட்டணியின் அதிகாரச் சமநிலையில் பாரிய மாற்றம் ஏற்படும் என எதிர்பார்க்கப்படுகின்றது.
