பிரிட்டிஷ் கொலம்பியாவின் (B.C.) தெற்கு கரையை ஒரு வலுவான புயல் தாக்கி வரும் நிலையில், நெடுஞ்சாலைகள் வெள்ளத்தில் மூழ்கி, மிகக் குறைந்த அல்லது எவ்வித முன்னறிவிப்புமன்றி மூடப்பட வேண்டிய சூழல் ஏற்படலாம் என ஓட்டுநர்களுக்கு எச்சரிக்கை விடுக்கப்பட்டுள்ளது.
போக்குவரத்து அமைச்சகம் செவ்வாய்க்கிழமை வெளியிட்ட ஆலோசனைக் குறிப்பில், கனமழை மற்றும் பலத்த காற்று காரணமாக இந்த வாரத்தின் எஞ்சிய நாட்களில் வீதிப் போக்குவரத்து நிலவரங்கள் பாதிக்கப்படலாம் என எதிர்பார்க்கப்படுவதாகத் தெரிவித்துள்ளது.
“ஓட்டுநர்கள் சாலை நிலவரங்களைக் கண்காணிக்குமாறும், சாலைகளில் நீர் தேங்குதல், இடிபாடுகள் மற்றும் மரக்கழிவுகள் விழுதல் மற்றும் குறுகிய அவகாசத்தில் சாலைகள் மூடப்படுவதற்கான சாத்தியக்கூறுகளை எதிர்பார்த்து விழிப்புடன் இருக்குமாறும் அறிவுறுத்தப்படுகிறார்கள்” என்று அந்த ஆலோசனைக் குறிப்பில் தெரிவிக்கப்பட்டுள்ளது.
பிரதான நிலப்பரப்பில், ஃப்ரேஸர் வேலி (Fraser Valley) மற்றும் ஃப்ரேஸர் கேன்யன் (Fraser Canyon) வழியிலான 1ஆம் இலக்க நெடுஞ்சாலை (Highway 1), மற்றும் சீ டூ ஸ்கை (Sea to Sky) வழித்தடம் மற்றும் பெம்பர்ட்டன் வேலி (Pemberton Valley) வழியிலான 99ஆம் இலக்க நெடுஞ்சாலை (Highway 99) ஆகியவை அதிகம் பாதிக்கப்பட வாய்ப்புள்ளது. அதேபோல, வான்கூவர் தீவில் உள்ள மலாஹாட் (Malahaat) மற்றும் மேற்கு கடலோர சமூகங்களில் உள்ள வீதிப் பாதைகள் அதிகம் பாதிக்கப்பட வாய்ப்புள்ளதாக அமைச்சகம் தெரிவித்துள்ளது.
மாகாணப் பராமரிப்புக் குழுவினர் தங்களது கண்காணிப்புப் ரோந்துப் பணிகளை அதிகரித்து, கழிவுகளை அகற்றும் பணிகளில் ஈடுபடுவார்கள் என்றும் அந்த ஆலோசனைக் குறிப்பில் சேர்க்கப்பட்டுள்ளது.
வான்கூவர் தீவின் மேற்கு மற்றும் மத்திய பகுதிகள், ஹவ் சவுண்ட் (Howe Sound) மற்றும் சீ டூ ஸ்கை ஆகிய பிராந்தியங்களில் ஆரஞ்சு நிற மழை எச்சரிக்கைகள் அமலில் உள்ளன. இதன் பொருள், “கடுமையான” புயல்கள் கணிசமான சேதத்தையும் இடையூறுகளையும் ஏற்படுத்தக்கூடும் என்பதாகும்.
வான்கூவர் தீவின் சில பகுதிகள் 250 மில்லிமீட்டருக்கும் அதிகமான மழையைப் பெறக்கூடும் என்றும், ஹவ் சவுண்ட் மற்றும் சீ டூ ஸ்கை பகுதிகள் 160 மில்லிமீட்டருக்கும் அதிகமான மழையைப் பெறக்கூடும் என்றும் வானிலை ஆய்வு முகமை தெரிவித்துள்ளது.
மெட்ரோ வான்கூவரின் சில பகுதிகள் 160 மில்லிமீட்டர் வரை மழையைப் பெறக்கூடும்.
வான்கூவர் தீவின் பெரும்பகுதிக்கும் தெற்கு கரைக்கும் வெள்ள எச்சரிக்கைகள் அமலில் உள்ளன. இந்த மோசமான வானிலை வியாழக்கிழமை தணிவதற்கு முன், புதன்கிழமை வரை நீடிக்கும் என எதிர்பார்க்கப்படுகிறது.
