ஜனாதிபதி அனுர குமார திசாநாயக்க

நிதி, திட்டமிடல் மற்றும் பொருளாதார அபிவிருத்தி அமைச்சர் என்ற ரீதியில் ஜனாதிபதி அனுர குமார திசாநாயக்க 2027 ஆம் ஆண்டுக்கான வரவு செலவுத் திட்ட உரையைப் பாராளுமன்றத்தில் நிகழ்த்தியுள்ளார். இன்று (12) முற்பகல் அமைச்சரவை இதற்கு அங்கீகாரம் வழங்கியிருந்தது. இது தேசிய மக்கள் சக்தி (NPP) அரசாங்கத்தின் மூன்றாவது வரவு செலவுத் திட்டமும், நாட்டின் 81 ஆவது வரவு செலவுத் திட்ட உரையுமாகும்.

வரவு செலவுத் திட்ட உரையின் பிரதான சிறப்பம்சங்கள் வருமாறு:

சர்வதேச வர்த்தக உடன்படிக்கைகள் மற்றும் முதலீட்டுச் சட்டங்கள்

• சுதந்திர வர்த்தக உடன்படிக்கைகள்: இந்திய – இலங்கை சுதந்திர வர்த்தக உடன்படிக்கையை விரிவுபடுத்துவதற்கு அரசாங்கம் நடவடிக்கை எடுக்கும் என ஜனாதிபதி தெரிவித்தார். அத்துடன், சீனாவுடன் புதிய சுதந்திர வர்த்தக உடன்படிக்கையை (FTA) ஏற்படுத்துவதற்கான சாத்தியக்கூறுகளை ஆராய்வதுடன், ஐக்கிய அரபு இராச்சியம் (UAE) மற்றும் ஓமான் ஆகிய நாடுகளுடன் விரிவுபடுத்தப்பட்ட பொருளாதாரப் பங்குடைமை உடன்படிக்கைகளில் கைச்சாத்திடவும் எதிர்பார்ப்பதாக அவர் கூறினார்.

• சட்ட சீர்திருத்தங்கள்: முதலீட்டாளர் பாதுகாப்புச் சட்டமூலம் (Investor Protection Bill) விரைவில் பாராளுமன்றத்தில் சமர்ப்பிக்கப்படும் எனத் தெரிவித்த ஜனாதிபதி, வெளிநாட்டு முதலீடுகளை ஈர்க்கும் வகையில் கொழும்பு துறைமுக நகரப் பொருளாதார ஆணைக்குழுச் சட்டமும் திருத்தப்படும் என்றார். “எதிர்பார்க்கப்படும் பொருளாதார மாற்றத்தை அடையவும், வினைத்திறனை அதிகரிக்கவும் வலுவான புதிய சட்டக் கட்டமைப்பு அவசியம். எமது சில சட்டங்கள் 100 ஆண்டுகளுக்கும் மேலான பழமையானவை” என அவர் சுட்டிக்காட்டினார்.

சர்வதேச நாணய நிதியம் (IMF) மற்றும் பொதுக் கடன் முகாமைத்துவம்

• IMF எதிர்காலச் செயற்பாடுகள்: 2027 மார்ச் மாதத்துடன் நிறைவடையவுள்ள தற்போதைய விரிவாக்கப்பட்ட நிதி வசதி (EFF) வேலைத்திட்டத்தைத் தொடர்ந்து, சர்வதேச நாணய நிதியத்துடனான இலங்கையின் எதிர்காலத் தொடர்புகளை மதிப்பிடுவதற்கு அரசாங்கம் குழுவொன்றை நியமித்துள்ளது. தற்போதைய வேலைத்திட்டத்தை வெற்றிகரமாக நிறைவு செய்வதற்கும், வெளிநாட்டுக் கையிருப்பைத் தொடர்ந்து வலுப்படுத்துவதற்கும் அரசாங்கம் அர்ப்பணிப்புடன் உள்ளதாக ஜனாதிபதி கூறினார்.

• பொதுக் கடன் குறைப்பு: 2032 ஆம் ஆண்டளவில் மொத்த உள்நாட்டு உற்பத்தியில் (GDP) பொதுக் கடனை 95 சதவீதமாகக் குறைப்பதே ஆரம்ப இலக்காக இருந்தது. எனினும், தற்போதைய பொருளாதாரப் போக்குகள் தொடருமாயின், சர்வதேச நாணய நிதியத்தின் ஆறாவது மீளாய்வின்படி 2032 இல் கடன் சுமை 87 சதவீதமாகக் குறையும் என மதிப்பிடப்பட்டுள்ளது.

• வரவு செலவுத் திட்டப் பற்றாக்குறை: வரவு செலவுத் திட்டப் பற்றாக்குறை 5 சதவீதத்திற்குக் கீழ் பேணப்படும் என்பதுடன், மொத்த உள்நாட்டு உற்பத்தியின் முதன்மை மிகை (primary surplus) 2.3 சதவீதமாகப் பேணப்படும்.

• வெளிநாட்டுக் கடன் மீளச் செலுத்துகை: எதிர்வரும் இரண்டு ஆண்டுகளில் வெளிநாட்டுக் கடன் கடமைகளை நிறைவேற்றுவதற்கான நிதித் திறன் அரசாங்கத்திடம் உள்ளதாக ஜனாதிபதி தெரிவித்தார். 2025 இல் 3,707 மில்லியன் அமெரிக்க டொலர்களும், 2026 இல் 3,591 மில்லியன் அமெரிக்க டொலர்களும் கடன் மீளச் செலுத்துகைக்காகச் செலவிடப்பட்ட நிலையில், 2027 இல் 2,986 மில்லியன் டொலர்களும், 2028 இல் 3,574 மில்லியன் டொலர்களும் செலுத்தப்படவுள்ளன.

பொருளாதார நிலைமாற்றம், நெருக்கடிகள் மற்றும் அரச துறை சீர்திருத்தம்

• கூட்டு முயற்சியும் உற்பத்திப் பொருளாதாரமும்: 2027 வரவு செலவுத் திட்டம் ஒரு தனிநபரின் யோசனையன்றி, பல்வேறு துறைகளின் முன்மொழிவுகளை உள்ளடக்கிய கூட்டு முயற்சியாகும் எனவும், இது நாட்டின் உற்பத்திப் பொருளாதாரத்தை வலுப்படுத்த வடிவமைக்கப்பட்டுள்ளது எனவும் ஜனாதிபதி குறிப்பிட்டார். கடந்த இரண்டு ஆண்டுகளில் பொருளாதாரத்தை ஸ்திரப்படுத்திய அரசாங்கம், தற்போது பொருளாதார மாற்றத்திற்கான அடுத்த கட்டத்தை நோக்கி நகர்ந்துள்ளது.

• வெளிப்புற அழுத்தங்களும் அனர்த்த நிவாரணமும்: மத்திய கிழக்கு மோதல்களால் ஏற்பட்ட உலகளாவிய எண்ணெய் விலை உயர்வின் தாக்கத்திலிருந்து மக்களைப் பாதுகாக்க அரசாங்கம் 147 பில்லியன் ரூபா நிவாரண மானியங்களை வழங்கியுள்ளது. மேலும், ‘டித்வா’ சூறாவளியினால் (Cyclone Ditwah) ஏற்பட்ட சேதங்கள் மற்றும் புனரமைப்புப் பணிகளுக்காக சுமார் 3.4 பில்லியன் அமெரிக்க டொலர் செலவிடப்பட்டுள்ளதுடன், எதிர்வரும் ‘எல் நினோ’ (El Niño) தாக்கத்தினால் ஏற்படக்கூடிய சவால்களும் கவனத்திலெடுக்கப்பட்டுள்ளன.

• ஸ்ரீலங்கன் எயார்லைன்ஸ் மற்றும் அரச சேவை: திறைசேரிக்குத் தொடர்ந்தும் பாரிய நிதிச் சுமையை ஏற்படுத்தி வரும் ஸ்ரீலங்கன் எயார்லைன்ஸ் நிறுவனத்தின் நட்டங்களை ஆராய்ந்து தீர்வுகளைப் பரிந்துரைக்க விசேட குழுவொன்று நியமிக்கப்பட்டுள்ளதுடன், அதன் அறிக்கை பாராளுமன்றத்தில் சமர்ப்பிக்கப்படும். மேலும், நாட்டிற்குப் பாரிய அரச இயந்திரம் தேவையில்லை எனவும், மக்களின் தேவைகளுக்குப் பதிலளிக்கக்கூடிய வினைத்திறன் மிக்க அரச சேவையே அவசியம் எனவும் அவர் வலியுறுத்தினார்.

• சர்வதேச அங்கீகாரம்: ஃபிட்ச் ரேட்டிங்ஸ் (Fitch Ratings) தரப்படுத்தல் உயர்வு, ட்ரான்ஸ்பரன்சி இன்டர்நேஷனல் (Transparency International) ஊழல் சுட்டெண்ணில் முன்னேற்றம், உலகளாவிய அமைதிச் சுட்டெண்ணில் (Global Peace Index) முன்னேற்றம், முன்னணி சுற்றுலாத் தலமாக அங்கீகாரம் மற்றும் உயர்-நடுத்தர வருமானம் கொண்ட பொருளாதாரமாகத் திகழ்தல் ஆகியவை அரசாங்கத்தின் வெற்றிகளுக்குச் சான்றாகும் என ஜனாதிபதி சுட்டிக்காட்டினார்.