திருவாரூர்
திருவாரூர் தமிழ்நாடு மத்தியப் பல்கலைக்கழகத்தின் 11-ஆவது பட்டமளிப்பு விழாவில் கலந்துகொண்ட இந்தியக் குடியரசுத் துணைத் தலைவர் சி.பி. ராதாகிருஷ்ணன், தமிழ்த்தாய் வாழ்த்தை மூன்றாவதாகப் பாடுவது அவமானமல்ல என்று விளக்கம் அளித்துள்ளார்.
தமிழ்த்தாய் வாழ்த்து சர்ச்சை:
பட்டமளிப்பு விழாவின் தொடக்கத்தில் முதலில் தமிழ்த்தாய் வாழ்த்து பாடப்பட்டது. அப்போது குறுக்கிட்ட குடியரசுத் துணைத் தலைவர் சி.பி. ராதாகிருஷ்ணன், முதலில் வந்தே மாதரம், அடுத்து தேசிய கீதம், மூன்றாவதாகவே தமிழ்த்தாய் வாழ்த்து பாடப்பட வேண்டும் என்று அறிவுறுத்தினார். அதன்படியே பாடல்கள் ஒலிக்கப்பட்டன. பின்னர் இதுகுறித்து மேடையில் விளக்கமளித்த அவர், “தமிழ்த்தாய் வாழ்த்தை மூன்றாவதாகப் பாடுவதால் அதனை அவமானப்படுத்துவதாக எடுத்துக்கொள்ளக் கூடாது. சொந்த நாட்டையும், பெற்ற தாயையும் யாரும் அவமானப்படுத்த மாட்டார்கள் என்பதைப் போலவே இதையும் எடுத்துக்கொள்ள வேண்டும்,” என்று தெரிவித்தார்.
மேடையில் ஆளுநர் தடுமாற்றம்:
மாணவர்களுக்குப் பட்டங்களை வழங்கிய பின்பு மேடையிலிருந்து கீழே இறங்கிய தமிழகப் பொறுப்பு ஆளுநர் ராஜேந்திர விஷ்வநாத் அர்லேகர், மேடுபள்ளமாக இருந்த மேடையில் திடீரெனத் தடுமாறினார். உடனடியாக அருகிலிருந்த காவல்துறை அதிகாரிகள் அவரைப் பிடித்து முதலுதவி அளித்தனர். கடந்த ஆண்டும் இதே பல்கலைக்கழகப் பட்டமளிப்பு விழாவில் மேடை அமைப்புக் குளறுபடியால் மாணவிகள் தடுமாறி விழுந்த நிலையில், தொடர்ந்து இரண்டாவது ஆண்டாக நடைபெறும் இந்தச் சம்பவம் பல்கலைக்கழக நிர்வாகத்தின் கடும் அலட்சியத்தைக் காட்டுவதாகக் கடுமையான விமர்சனங்கள் எழுந்துள்ளன.
மாணவர்களுக்கு சி.பி.ஆர் அறிவுரை:
தொடர்ந்து மாணவர்களிடையே உரையாற்றிய குடியரசுத் துணைத் தலைவர் சி.பி.ராதாகிருஷ்ணன், “பெண்களின் உயர்கல்விச் சேர்க்கை தற்போது 42.2 சதவீதமாக அதிகரித்துள்ளது வரவேற்கத்தக்கது. பிரதமர் மோடியின் ‘விக்சித் பாரத் 2047’ என்ற இலக்கை நிறைவேற்றுவதில் இளைஞர்களின் பங்கு மிகவும் முக்கியமானது. ஒவ்வொரு செயலிலும் ‘தேசமே முதன்மை’ என்ற எண்ணத்தை மாணவர்கள் மனதில் கொள்ள வேண்டும். மேலும், இளைஞர்களின் எதிர்காலத்தைச் சீரழிக்கும் போதைப்பொருள் அச்சுறுத்தலை ஒழிக்கக் காவல்துறையினர் குற்றவாளிகள் மீது எவ்விதக் கருணையும் காட்டக் கூடாது,” என்று வலியுறுத்தினார்.
#CPRadhakrishnan #TamilThaiValthu #CUTN #Thiruvarur #GovernorArlekar #ViksitBharat2047 #TamilNaduNews #TNPolitics #ViralNewsTN #TrendingTN #LatestNewsTN #TNNewsUpdates
